ବ୍ରହ୍ମପୁର, ୯।୧୦ : ବ୍ରହ୍ମପୁର ସଦର ଥାନା କୁକୁଡାଖଣ୍ଡି ଅଞ୍ଚଳରେ ନିଆଁରେ ପୋଡି ହୋଇ ଯୁବତୀ ମୃତ୍ୟୁ ଘଟଣାରେ ସଦର ପୁଲିସ ବାପା ଓ ସାବତ ମାଆଙ୍କୁ ଗିରଫ କରିଛି। ଗିରଫ ୨ ଜଣ ହେଲେ ବାପା ଅଶୋକ ପ୍ରଧାନ ଓ ସାବତ ମାଆ ଜ୍ୟୋସ୍ନା ପ୍ରଧାନ । ଗତ ୭ ତାରିଖ ସନ୍ଧ୍ୟାରେ ଝିଅ ରାଣୀ ପ୍ରଧାନ ବାପାଙ୍କ ଅକଥନୀୟ ଅତ୍ୟାଚାର ସହି ନପାରି ବ୍ଲକ କାର୍ଯ୍ୟାଳୟ ସମ୍ମୁଖରେ ନିଜ ଶରୀରରେ ପେଟ୍ରୋଲ ଢାଳି ନିଆଁ ଲଗେଇ ଗୁରୁତର ହୋଇଥିଲେ। ଚିକିତ୍ସାଧିନ ଅବସ୍ଥାରେ ୮ ତାରିଖରେ ରାଣୀଙ୍କ ମୃତ୍ୟୁ ହୋଇଥିଲା।
ମୃତ ଯୁବତୀ ଯୁକ୍ତ ୩ ବିଜ୍ଞାନ ଶେଷ ବର୍ଷର ଛାତ୍ରୀ ଥିଲେ । ପିଲାଟି ଦିନରୁ ମାଆଙ୍କୁ ହରାଇ ଥିଲେ । ସେ ସାବତ ମାଆ ଓ ବାପାଙ୍କ ସହ ରହୁଥିଲେ । ଗତ କିଛି ବର୍ଷ ହେଲା ବାପା ମଦ ପିଇ ଝିଅକୁ ନିର୍ଯାତନା ଦେଇ ଆସୁଥିଲେ। ସୋମବାର ଘରେ କେହି ନଥିବାବେଳେ ବାପା-ଝିଅଙ୍କର ଝଗଡା ହୋଇଥିଲା । ଏହାପରେ ଦେହରେ କିରାସିନି ଢାଳି ସେ ଆତ୍ମାହୁତି ଉଦ୍ୟମ କରିଥିଲେ । ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ବାପାଙ୍କ ଅତ୍ୟାଚାର ନେଇ ରାଣୀ ଅଭିଯୋଗ କରୁଥିବା ଭିଜୁଆଲ ଭାଇରାଲ ହୋଇଥିଲା। ଏହି ଘଟଣାର ତଦନ୍ତ ପରେ ପୁଲିସ ଉଭୟ ବାପା ଓ ସାବତ ମାଆଙ୍କୁ ଗିରଫ କରିଛି।
