ମୁମ୍ୱାଇ, ୧୬।୩: ନିଜ ପିଲାଙ୍କ ପାଇଁ ବାପା-ମା’ ତାଙ୍କ ଜୀବନର ସବୁ ଖୁସି ତ୍ୟାଗ କରନ୍ତି । ମୋ ପିଲାଟି କେମିତି ଭଲ ପାଠ ପଢ଼ୁ । ଭଲ ଚାକିରି ଖଣ୍ଡେ କରୁ । ଭଲ ମଣିଷଟେ ହଉ । ପିଲାଙ୍କ ଭବିଷ୍ୟତ ଗଢ଼ିବାରେ ଟିକିଏ ବି ଅବହେଳା କରନ୍ତିନି । ଭବିଷ୍ୟତରେ ତାଙ୍କ ପିଲାଟି କେମିତି ସଫଳ ହେଉ ସେଥିପାଇଁ ପିଲାକୁ ଆଶିର୍ବାଦ ଦିଅନ୍ତି । କିନ୍ତୁ, ଯେତେବେଳେ ସେଇ ପିଲା ଦିନେ ବଡ଼ ହୋଇ ବାପା-ମା’ଙ୍କ ଆଖିରେ ଲୁହ ଦିଏ, ଅଭିଶାପରେ ପରିଣତ ହୋଇଯାଏ ସେ ଆଶିର୍ବାଦ । ଯେଉଁ ପିଲାମାନେ ବାପାଙ୍କ ସଂଘର୍ଷରେ ଅନୁପ୍ରାଣିତ ହୋଇ ବଢ଼ିଥିଲେ, ଆଜି ସେଇ ପିଲା ଭଗବାନ ସଦୃଶ ବାପା-ମାଆଙ୍କୁ ରାସ୍ତାକଡ଼ରେ ମରିବା ପାଇଁ ଛାଡ଼ି ଦେଉଛନ୍ତି । ମୁମ୍ବାଇରେ ଠିକ୍ ଏଭଳି ଏକ ହୃଦୟବିଦାରକ ଘଟଣା ସମସ୍ତଙ୍କୁ ଦୋହଲାଇ ଦେଇଛି ।
ମୁମ୍ବାଇରେ ଜଣେ ବାପାଙ୍କ ଅବସ୍ଥା ଏପରି ଥିଲା ଯେ, ସେ କିଛି ଦିନ ହେବ ରାସ୍ତାର ଫୁଟପାଥରେ ପଡ଼ି ରହିଥିଲେ । ଖାଇବାକୁ ନ ପାଇ ବୃଦ୍ଧ ଜଣକ ଅତ୍ୟନ୍ତ ଦୁର୍ବଳ ହୋଇପଡ଼ିଥିଲେ । କେତେକ ସ୍ଥାନୀୟ ବାସିନ୍ଦା ବୃଦ୍ଧ ଜଣଙ୍କୁ ଖାଇବାକୁ ଦେଇ ତାଙ୍କ ଘର ଠିକଣା ପଚାରିଥିଲେ । ବୃଦ୍ଧ ଜଣକ ଉତ୍ତରରେ ଯାହା କହିଲେ ତାହା ଶୁଣି ସମସ୍ତେ ତାଜୁବ୍ ହୋଇଯାଇଥିଲେ । ସେ କହିଥିଲେ, 'ମୁଁ ମୋ ପିଲାମାନଙ୍କର ଭବିଷ୍ୟତ ଗଢ଼ିବାରେ ମୋର ସାରା ଜୀବନ ବିତେଇ ଦେଇଛି, କିନ୍ତୁ ଏବେ ମୋ ପାଖରେ କେହି ନାହାନ୍ତି, ମୁଁ ପୂରା ଏକା । ମୋର ୨ ପୁଅ । ଗତ ୪ ବର୍ଷ ହେବ ଗୋଟେ ପୁଅ ମୋର ଲଣ୍ଡନରେ ରହୁଛି ଆଉ ଜଣେ ପୁଅ ମୋର ଓକିଲ । ମୁମ୍ୱାଇରେ ସେ ନିଜ ପରିବାର ସହ ରହୁଛି । ବୁଢ଼ା ବାପାଟିର ଦାୟିତ୍ୱ ତୁଲାଇବାକୁ ଦୁଇ ପୁଅ ମୋର ସିଧା ସିଧା ମନା କରିଦେଲେ । ଆଉ ବା ମୋ ପାଖରେ ଚାରା କ’ଣ ? ୨-୨ ଟା ପୁଅ ଯଉଠି ମୋତେ ବେସାହାରା କରିଦେଲେ ମୁଁ ରାସ୍ତାକଡ଼ରେ ରହିବାକୁ ବାଧ୍ୟ ହେଲି ।
ବୃଦ୍ଧଙ୍କ ସମ୍ପର୍କରେ ସ୍ଥାନୀୟ ବାସିନ୍ଦା ଏକ ସ୍ୱେଚ୍ଛାସେବୀ ସଙ୍ଗଠନକୁ ଜଣାଇଥିଲେ । ଖବର ପାଇବା ପରେ ସେହି ସଙ୍ଗଠନ ବୃଦ୍ଧ ଜଣଙ୍କୁ ନେଇଯାଇଛନ୍ତି । ଏହି ବୃଦ୍ଧ ଜଣଙ୍କର ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଯାହା ପରେ ୟୁଜର୍ସ ଏଭଳି ପୁଅକୁ ନିନ୍ଦା କରିଛନ୍ତି । ବାପା ସାରା ଜୀବନ କଷ୍ଟ କରି ଦୁଇ ପୁଅଙ୍କୁ ମଣିଷ କରିଥିବା ବେଳେ ସେମାନେ ବୃଦ୍ଧାବସ୍ଥାରେ ତାଙ୍କୁ ରାସ୍ତାକଡ଼ରେ ରହିବାକୁ ଛାଡ଼ି ଦେବା ଅମାନବିକତା ବୋଲି କହିଛନ୍ତି । ସତରେ କେତେ ବିଡ଼ମ୍ୱନାର ବିଷୟ ନାଁ । ଦୁଇ ପୁଅକୁ ଯୋଗ୍ୟ କରେଇ ଆଜି ସେ ବାପା ନିଜେ ବେସାହାରା । ସେପଟେ ପୁଅ ଲଣ୍ଡନରେ ଆରାମଦାୟକ ଜୀବନ ବିତାଉଛି, ଆଉ ଏଠି ବାପା ପାଖରେ ଗୋଟେ ଓଳି ଖାଇବାକୁ ବି ନାହିଁ । ଏଭଳି ପୁଅ ସମାଜ ପାଇଁ କଳଙ୍କ !
