ନୂଆଦିଲ୍ଲୀ,୧୫/୦୬: ସନ୍ତାନ ହେବା ସହଜ ହୋଇପାରେ ହେଲେ ବାପା ହେବା ଭାରି କଷ୍ଟ । ସେ ହାତ ଧରି ଚାଲିବା ଶିଖାଇଛନ୍ତି । ଏ ପିଣ୍ଡର କର୍ତ୍ତା ସେ । ହସି ହସି ସନ୍ତାନର ଅଳି ଅଝଟକୁ ଆଦରିଛନ୍ତି । କେବେ କିଛି ଚାହିଁ ନଥିବା ବାପା ଖାଲି ଦେଇ ଚାଲନ୍ତି ଜୀବନ ତମାମ...ବିଶ୍ୱାସର ବରଗଛ ସେ ବାପା । ଛାତିର କଷ୍ଟକୁ ଛପାଇ ସ୍ନେହ ଅଜାଡ଼ି ଦିଅନ୍ତି ସେ । ଭୋକରେ ହସୁଥିବା ଦୁଃଖରେ କାନ୍ଧୁଥିବା ମଣିଷ ଧୈର୍ଯ୍ୟର ପାହାଡ଼ ସେ ବାପା । ସନ୍ତାନର ଜୀବନରେ ବାପାଙ୍କ ଭୂମିକାକୁ ନେଇ ପ୍ରତିବର୍ଷ ଜୁନ୍ ତୃତୀୟ ରବିବାରକୁ ପିତୃ ଦିବସ ଭାବେ ପାଳନ କରାଯାଏ ।
କଥାରେ ଅଛି ବାପା ଥିଲେ ପୁଅ ସଭାରେ ହାରେନା । ବାପା ଥିଲେ ସାହସ ଭାଙ୍ଗେନା । ସମସ୍ତଙ୍କ ଜୀବନରେ ବାପାଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଛି । ସନ୍ତାନର ଦୁଃଖରେ ମଜବୁତ୍ କାନ୍ଥ ହୋଇଥାନ୍ତି ସେ । ଜୀବନର ସବୁ ରାସ୍ତାକୁ ସହଜ କରନ୍ତି । ସେ ପାଖରେ ଥିଲେ ସବୁ ଦୁଃଖ ଭୁଲିଯାଏ ସନ୍ତାନ । ବାପା ଯିଏ ସ୍ନେହ ଆଦରରେ ନୁହେଁ ଗାଳି କରି ପ୍ରେରଣା ଦିଅନ୍ତି । ସନ୍ତାନର ଜୀବନର ବାପାଙ୍କ ଭୂମିକାକୁ ଗୁରୁତ୍ୱ ଦେଇ ପ୍ରତିବର୍ଷ ଜୁନ୍ ତୃତୀୟ ରବିବାରକୁ ପିତୃ ଦିବସ ଭାବେ ପାଳନ କରାଯାଏ । ୧୯୦୭ ମସିହାରେ ଆମେରିକାରେ ଅନୌପଚାରିକ ଭାବେ ପିତାଙ୍କ ଦିବସ ପାଳନ ହୋଇଥିଲା । ୧୯୧୦ରେ ଆନୁଷ୍ଠାନିକ ଭାବେ ସୋନୋରା ସ୍ମାର୍ଟ ଡୋଡ୍ ଦ୍ୱାରା ଏହି ଦିନ ପାଳନ ଆରମ୍ଭ ହୋଇଥିଲା । ସୋନେରା ଛୋଟ ଥିବା ବେଳେ ତାଙ୍କ ମାଆଙ୍କର ମୃତ୍ୟୁ ହୋଇଥିଲା । ପିଲା ୱିଲିୟମ ସ୍ମାର୍ଟ ତାଙ୍କୁ ଉଭୟ ମାଆ ଏବଂ ପିତାଙ୍କ ପ୍ରେମ ଦେଇଥିଲେ । କ୍ୟାପଟେନ୍ ୱିଲିୟମ୍ ଜ୍ୟାକସନ ସ୍ମାର୍ଟଙ୍କ ଝିଅ ସୋନୋରା ତାଙ୍କ ବାପାଙ୍କ ବଳିଦାନ ଏବଂ ସଂଗ୍ରାମକୁ ସମ୍ମାନ ଦେଇ ୧୯୦୯ ଜୁନ୍ ୫ରେ ପିତା ଦିବସ ପାଳନ କରିଥିଲେ ।
ପ୍ରତିଟି ସନ୍ତାନର ଜୀବନରେ ଉଭୟ ମାତା ଓ ପିତାଙ୍କର ଭୂମିକା ରହିଛି । କିନ୍ତି କେବେ କେବେ ପରିସ୍ଥିତି ଆସେ ପିତାଙ୍କୁ ଉଭୟ ମାତା ଓ ପିତାର କର୍ତ୍ତବ୍ୟ କରିବାକୁ ପଡିଥାଏ । ଦୁନିଆରେ ସେହି ଲୋକଙ୍କୁ କେବେ ଭୁଲିବା କଥା ନୁହେଁ ଯିଏ ଆମକୁ ଜିତାଇବାକୁ ଯାଇ ନିଜେ ହାରିଯାଆନ୍ତି । ଯାହାଙ୍କ ଆଶୀର୍ବାଦ ପାଇଁ ଆମେ ସବୁ କିଛି ପାଇଛେ । ଆଜି ଆମେ ଯାହା ବି ହୋଇ ପାରିଛେ ପିତାଙ୍କର ଅସୀମ ତ୍ୟାଗ ଓ ମାର୍ଗଦର୍ଶନର ଫଳ । ସତରେ ବାପା ସେ କେତେ ମହାନ୍ । ଆଜି ପିତୃ ଦିବସରେ ସବୁ ପିତାଙ୍କୁ ପ୍ରମେୟ ପରିବାର ତରଫରୁ ଅନେକ ଶୁଭେଚ୍ଛା ।
