ଦୋହା,୨୦/୧୨: ରିୟଲ ମାଦ୍ରିଦ ୩-୦ ଗୋଲରେ ପାଚୁକାକୁ ପରାଜିତ କରି ଫିଫା ଇଣ୍ଟରକଣ୍ଟିନେଣ୍ଟାଲ କପ୍ରେ ଚାମ୍ପିଅନ ହୋଇଛି । ଷ୍ଟାର ଖେଳାଳି କିଲିୟାନ ଏମ୍ବାପେ ଚମତ୍କାର ପ୍ରଦର୍ଶନ କରି ଦଳକୁ ବିଜୟୀ କରିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ ।
ମ୍ୟାଚ୍ଟି ସଂପୂର୍ଣ୍ଣ ଏକତରଫା ରହିଥିଲା । ମେକ୍ସିକୋର ପାଚୁକା ଦଳ ବହୁ ପ୍ରୟାସ କରି ଶେଷ ପର୍ଯ୍ୟନ୍ତ ଗୋଲ ଖାତା ଖୋଲି ପାରି ନଥିଲା। ରିୟଲ ମାଦ୍ରିଦ ପ୍ରଥମାର୍ଦ୍ଧରେ ଗୋଟିଏ ଏବଂ ଦ୍ୱିତୀୟାର୍ଦ୍ଧରେ ୨ଟି ଗୋଲ୍ ଦେଇ ମ୍ୟାଚ୍ ଜିତି ନେଇଥିଲା ।
୩୬ ମିନିଟ ପର୍ଯ୍ୟନ୍ତ ଖେଳ ସଂଘର୍ଷପୂର୍ଣ୍ଣ ହୋଇଥିଲା । ୩୭ ମିନିଟରେ ଜୁନିୟର ଭିନିସିୟସଙ୍କ ଏକ ଚମତ୍କାର ପାସ୍କୁ ଏମ୍ବାପେ ଗୋଲରେ ରୂପାନ୍ତରିତ କରି ଦଳକୁ ପ୍ରଥମାର୍ଦ୍ଧରେ ଅଗ୍ରଣୀ କରାଇଥିଲେ । ଦ୍ୱିତୀୟାର୍ଦ୍ଧରେ ରୋଡ୍ରିଗୋ (୫୩ ମିନିଟ୍) ଏବଂ ଭିନିସିୟସ (୮୪ ମିନିଟ) ୨ଟି ଗୋଲ୍ ସ୍କୋର କରିଥିଲେ । ରୋଡ୍ରିଗୋଙ୍କୁ ସହାୟତା କରିଥିଲେ ଏମ୍ବାପେ । ୮୪ ମିନିଟରେ ରିୟଲ ମାଦ୍ରିଦ ପାଇଥିଲା ପେନାଲ୍ଟି । ଭିନିସିୟସ ଆଦୌ ତ୍ରୁଟି ନକରି ବଲକୁ ପାଚୁକା ଗୋଲପୋଷ୍ଟରେ ପୂରାଇଥିଲେ ।
ଏମ୍ବାପେ ସୁସ୍ଥ ହେବା ପରେ ସିଧାସଳଖ ଦୋହାରେ ଦଳ ସହ ଯୋଗ ଦେଇଥିଲେ । ପ୍ରତ୍ୟାବର୍ତ୍ତନ ମ୍ୟାଚ୍ରେ ତାଙ୍କ ପ୍ରଦର୍ଶନ ବେଶ ପ୍ରଭାବଶାଳୀ ରହିଥିଲା । ଗୋଟିଏ ଗୋଲ ଦେବା ସହ ଗୋଟିଏରେ ସହାୟତା କରିଥିଲେ ।
