ଭଦ୍ରକ, ୨୫/୦୮: ଭଦ୍ରକ ଜିଲ୍ଲାରେ ବନ୍ୟା ସ୍ଥିତି ସୃଷ୍ଟି ହୋଇଛି । ରବିବାର ବୈତରଣୀ ନଦୀରେ ବନ୍ୟା ଜଳ କମିଥିବା ବେଳେ ପୁଣି ବିଳମ୍ବିତ ରାତିରେ ବଢିଥିଲା । କେନ୍ଦୁଝର ଓ ଆନନ୍ଦପୁରରେ ଲଗାଣ ବର୍ଷା ଯୋଗୁଁ ଭଦ୍ରକ ଜିଲ୍ଲାରେ ବନ୍ୟା ସ୍ଥିତି ସୃଷ୍ଟି ହୋଇଛି । ଭଦ୍ରକ ଜିଲ୍ଲାର ଆଖୁଆପଦା ଅନିକଟ ନିକଟରେ ବିପଦ ସଙ୍କେତ ୧୮.୩୩ ମିଟର ଥିବାବେଳେ ସକାଳ ସୁଦ୍ଧା ୧୮.୮୬ ମିଟରରେ ବନ୍ୟାଜଳ ପ୍ରବାହିତ ହେଉଛି । ବନ୍ୟା ସ୍ଥିତିକୁ ଦେଖି ଆଗୁଆ ପଦକ୍ଷେପ ନେଇଛି ଜିଲ୍ଲା ପ୍ରଶାସନ। ଧାମନଗର ବ୍ଲକରେ ଦୁଇ ଦିନ ଅଙ୍ଗନବାଡ଼ି ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ । ଧାମନଗର ବ୍ଲକ ହସନାବାଦ୍ ଓ ଅର୍ଜୁନପୁର ପଞ୍ଚାୟତର ସମସ୍ତ ଅଙ୍ଗନୱାଡ଼ି କେନ୍ଦ୍ରକୁ ସୋମବାର ଓ ମଙ୍ଗଳବାର ଦିନ ବନ୍ଦ ରଖିବା ନେଇ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ସମାନ ଭାବେ ଅର୍ଜୁନ ପୁର, ହସନାବାଦ୍ ଶୋହଡା ଓ ପଧାନି ପଞ୍ଚାୟତ ର ୨୫ ସ୍କୁଲକୁ ଦୁଇ ଦିନ ପାଇଁ ଛୁଟି ଘୋଷଣା କରାଯାଇଛି ।
ଭଦ୍ରକ ଜିଲ୍ଲାର ଭଣ୍ଡାରିପୋଖରୀ ବ୍ଲକର କଣ୍ଟି ଘାଇ, ଧାମନଗର ବ୍ଲକର ମଲ୍ଲି ମହାରା ଓ ଗୌରାଙ୍ଗ ପୁର ଏସକେପ ଦେଇ ବନ୍ୟା ଜଳ ଚାଷ ଜମିକୁ ମାଡ଼ି ଯାଇଛି । କେତେକ ସ୍ଥାନରେ ନଦୀ ବନ୍ଧ ପ୍ରଭାବିତ ହୋଇଥିବା ସୁଚନା ମିଳିଛି । ବାଲିବସ୍ତା ଓ ବଲ୍ଲା ଦେଇ ବନ୍ଧ ସୁରକ୍ଷା କରାଯାଉଛି । ଏହି ବନ୍ୟାରେ ଭଣ୍ଡାରିପୋଖରୀ ବ୍ଲକର ଆଂଶିକ, ଧାମନଗର, ତିହିଡି ଓ ଚାନ୍ଦବାଲି ବ୍ଲକ ପ୍ରଭାବିତ ହେବା ଅଶଙ୍କା କରାଯାଉଛି । ଅନେକ ପଞ୍ଚାୟତ ଜଳ ଘେରରେ ରହିଛନ୍ତି ।
