ନୂଆଦିଲ୍ଲୀ,୧୦/୦୮: କିଛି ବର୍ଷ ପୂର୍ବେ ହୁଏତ ଆପଣ ଜାଣି ନଥିବେ ଯେ, ଆପଣ କେଉଁ ପିଢ଼ି ବା ଜେନେରେସନରେ ଜନ୍ମ ହୋଇଛନ୍ତି। କିନ୍ତୁ ଆଜିକାଲିର ବ୍ୟକ୍ତିମାନେ କେଉଁ ଜେନେରେସନର ତାହା ସମସ୍ତଙ୍କ ମୁହଁରେ ଅଛି। କିଏ କାହାକୁ ମିଲେନିୟଲ୍ ବୋଲି ଡାକୁଛି ତ ଆଉ କିଏ କାହାକୁ ଜେନ୍‌ଜି ବୋଲି ଡାକୁଛନ୍ତି। ଏବେ ଆଲଫାରୁ ବିଟା ପିଢ଼ି ମଧ୍ୟ ଆସିଗଲାଣି, ଯେଉଁମାନେ ଆଗାମୀ କିଛି ବର୍ଷ ମଧ୍ୟରେ ଜେନ୍‌ ଜି ପରି ହୋଇଯିବେ। ଏବେ ଆପଣ ଭାବୁ‌ଥିବେ ଯେ, ବିଭିନ୍ନ ପିଢ଼ିର ଏହି ନାଁଗୁଡ଼ିକ କେଉଁଠାରୁ ଆସିଲା ଏବଂ ସେଗୁଡ଼ିକର ନାମକରଣ କିପରି କରାଯାଇଛି। ଆସନ୍ତୁ ଜାଣିବା ଏ ବିଷୟରେ କିଛି ଗୁରୁତ୍ବପୂର୍ଣ୍ଣ ତଥ୍ୟ...

ଆଜି, ଯଦି ଆମେ କୌଣସି ବୟସର ଲୋକଙ୍କ ବିଷୟରେ କଥା ହେବା, ତେବେ ସେମାନଙ୍କ ପାଇଁ କିଶୋର, ଯୁବକ କିମ୍ବା ବୟସ୍କ ଶବ୍ଦ କମ୍ ବ୍ୟବହାର କରାଯାଏ, ବରଂ ଲୋକମାନେ ସେମାନଙ୍କୁ ସେମାନଙ୍କ ପିଢ଼ିର ନାଁରେ ଡାକୁଛନ୍ତି। ଉଦାହରଣ ସ୍ୱରୂପ, ଯଦି ଆମେ ପୁରୁଣା ସମୟ ବିଷୟରେ କଥା ହେବା, ତେବେ ସାଇଲେଣ୍ଟ ଜେନେରେସନ କିମ୍ବା ବେବି ବୁମର୍ସ ନାଁଟି ସାମ୍ନାକୁ ଆସେ...

* ୧୯୮୧ ରୁ ୧୯୯୬ ମଧ୍ୟରେ ଜନ୍ମିତ ଲୋକଙ୍କ ପାଇଁ "ମିଲେନିୟଲ୍ସ" ଶବ୍ଦଟି ବ୍ୟବହୃତ ହୁଏ

* ସେହିପରି, ୧୯୯୬ ପରେ ଅର୍ଥାତ୍ ୧୯୯୭ ରୁ ୨୦୧୨ ପର୍ଯ୍ୟନ୍ତ ଜନ୍ମିତ ଲୋକମାନଙ୍କୁ ଜେନ୍‌ ଜି (Gen-Z) ବୋଲି କୁହାଯାଏ

* ୨୦୧୩ ରୁ ୨୦୨୪ ମଧ୍ୟରେ ଜନ୍ମିତ ପିଲାମାନଙ୍କୁ ଜେନେରେସନ୍ ଆଲଫା କୁହାଯାଏ। ଏମାନେ ଜନ୍ମ ହେବା ମାତ୍ରେ ସମସ୍ତ ପ୍ରଯୁକ୍ତିବିଦ୍ୟା ବା ଟେକ୍ନୋଲୋଜୀ ପାଇଥିଲେ।

* ବର୍ତ୍ତମାନ ୨୦୨୫ ରେ ଜନ୍ମିତ ପିଲାମାନଙ୍କୁ ବିଟା ପିଢ଼ିରେ ରଖାଯାଇଛି। ୨୦୩୯ ପର୍ଯ୍ୟନ୍ତ ଜନ୍ମିତ ପିଲାମାନେ ଏହି ପିଢ଼ିରେ ଯାଉଛନ୍ତି

କେମିତି ରଖାଯାଏ ଜେନେରେସନ ନାଁ?

ଏବେ ଆସନ୍ତୁ ଏହି ନାଁଗୁଡ଼ିକୁ କିପରି ରଖାଯାଏ ସେହି ପ୍ରଶ୍ନକୁ ଯିବା। ପ୍ରକୃତରେ, ସେହି ସମୟର ପରିସ୍ଥିତି ଅନୁସାରେ ପିଢ଼ିର ନାମକରଣ କରାଯାଏ। ଉଦାହରଣ ସ୍ୱରୂପ, ଯେଉଁମାନେ ବିଶ୍ୱଯୁଦ୍ଧ ସମୟରେ ଜନ୍ମଗ୍ରହଣ କରିଥିଲେ ଏବଂ ସଂଘର୍ଷର ସାକ୍ଷୀ ଥିଲେ ସେମାନଙ୍କୁ ସର୍ବଶ୍ରେଷ୍ଠ ପିଢ଼ି ବା ଗ୍ରେଟେଷ୍ଟ ଜେନେରେସନ (୧୯୦୧-୧୯୨୭) ବୋଲି କୁହାଯାଏ। ଯୁଦ୍ଧ, ବେକାରୀ ଏବଂ ମାନସିକ ଅବସାଦର ପ୍ରଭାବ ଦେଖିଥିବା ପିଢ଼ିକୁ ନୀରବ ପିଢ଼ି ବା ସାଇଲେଣ୍ଟ ଜେନେରେସନ (୧୯୨୮-୧୯୪୫) ବୋଲି କୁହାଯାଏ। ସେହିପରି, ଯେଉଁ ସମୟରେ ସର୍ବାଧିକ ସଂଖ୍ୟକ ଶିଶୁ ଜନ୍ମ ହୋଇଥିଲେ ସେହି ପିଢ଼ିକୁ ବେବି ବୁମର ପିଢ଼ି (୧୯୪୬-୧୯୬୪) ବୋଲି କୁହାଯାଏ। ଟେକ୍ନୋଲୋଜୀ ଯୁଗରେ ପ୍ରଥମେ ପାଦ ଦେଇଥିବା ବ୍ୟକ୍ତିମାନଙ୍କୁ ଜେନେରେସନ ଏକ୍ସ (୧୯୬୫-୧୯୮୦) କୁହାଯାଏ। ଏହି ନାଁ 'କ୍ଲାସ୍: ଏ ଗାଇଡ୍ ଥ୍ରୁ ଦି ଆମେରିକାନ ଷ୍ଟାଟସ୍ ସିଷ୍ଟମ୍' ନାମକ ଏକ ପୁସ୍ତକରୁ ନିଆଯାଇଛି।

କିଏ ରଖିଛନ୍ତି ଏହି ନାମକରଣ?

ଦି ହିନ୍ଦୁରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ପିଢ଼ିର ନାମକରଣ ପରମ୍ପରା ବିଂଶ ଶତାବ୍ଦୀରେ ଆରମ୍ଭ ହୋଇଥିଲା। ଏହି ନାମଗୁଡ଼ିକ ପ୍ରାୟତଃ ପୁସ୍ତକ କିମ୍ବା କିଛି ପ୍ରସିଦ୍ଧ ଗୀତରୁ ନିଆଯାଇଛି। ସମାଜବିଜ୍ଞାନୀ ଏବଂ ଜନସଂଖ୍ୟା ବିଶେଷଜ୍ଞମାନେ ସେଗୁଡ଼ିକୁ ସ୍ଥିର କରନ୍ତି। ସେହିପରି, ଆଗାମୀ ପିଢ଼ିର ନାମ ମଧ୍ୟ ସ୍ଥିର କରାଯିବ।