ବୌଦ୍ଧ ୨୩/୫: ବୌଦ୍ଧ ଜିଲ୍ଲା ପୁଲିସ ପକ୍ଷରୁ ଜିଲ୍ଲାରେ ଗଞ୍ଜେଇ ମୁକ୍ତ ଅଭିଯାନ ଚାଲିଥିବା ବେଳେ ବୌଦ୍ଧ ପୁଲିସ ପକ୍ଷରୁ ବିଭିନ୍ନ ସ୍ଥାନରେ ଚଢଉ କରାଯାଇ ୭୭ କିଲୋ ଗଞ୍ଜେଇ ଜବତ କରାଯାଇଛି । ଏହି ମାମଲାରେ ଦୁଇ ଜଣ ଆନ୍ତଃରାଜ୍ୟ ବ୍ୟବସାୟୀ, ଜଣେ ମହିଳା ସମେତ ସମୁଦାୟ ୧୦ ଜଣକୁ ଗିରଫ କରାଯାଇଥିବା ଜଣାଯାଇଛି । ତେବେ ତଦନ୍ତରେ ଏହି ବ୍ୟବସାୟର ଚେର ବୌଦ୍ଧରୁ ପଶ୍ଚିମବଙ୍ଗ ପର୍ଯ୍ୟନ୍ତ ଲମ୍ବି ଥିବା ପୁଲିସ ଜାଣିବାକୁ ପାଇଛି। ଆଜି ସନ୍ଧ୍ୟାରେ ଏକ ସାମ୍ବାଦିକ ସମ୍ମିଳନୀରେ ଏସଡିପିଓ ଲରେନ ରାଉତରାୟ ସୂଚନା ଏହି ଦେଇଛନ୍ତି। ପୁଲିସ ପକ୍ଷରୁ ଦିଆଯାଇଥିବା ସୂଚନା ମୁତାବକ ବୌଦ୍ଧ ଏନଏସିର ରାଜନପାଲି ପୋଖରୀର ଏକ ବୁଦା ନିକଟରେ ଦୁଇଟି ମୋଟର ସାଇକେଲରେ ଜରି ବସ୍ତା ବନ୍ଧା ହୋଇ ରହିଥିବା ବେଳେ ବିଶ୍ୱସ୍ତ ସୁତ୍ରରୁ ସୂଚନା ପାଇ ପୁଲିସ ବାଇକ୍ ସମେତ ବସ୍ତା ଭିତରେ ଥିବା ୭୦ କିଲୋ ଗଞ୍ଜେଇ ଜବତ କରିଥିଲା। ଏହି ମାମଲାରେ ପୁଲିସ ପଶ୍ଚିମବଙ୍ଗ ୨୪ ପ୍ରଗଣା ମଧୁସୁଦନପୁରର ରଥିନ ସରଦାର (୩୬) ଓ ସୁରଜିତ ନସ୍କର (୨୦), ବୌଦ୍ଧ ଥାନା ଅନ୍ତର୍ଗତ ନୂଆପାଲି ଗ୍ରାମର ରୋହିତ କୁମାର ବିଶି(୪୦),ଏରଡା ଗ୍ରାମର ଦିବ୍ୟ ଲୋଚନ ପ୍ରଧାନ (୩୬) ଓ ଗଣେଷ ପ୍ରଧାନ (୩୮), ଆନନ୍ଦପୁର ଗ୍ରାମର ମଳୟ ବେହେରା (୨୦) ଓ ସାବିତ୍ରୀ ମାଝି (୨୦)ଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେହପରି ମହାନଦୀ ବ୍ରିଜ ଛକ ନିକଟରୁ ଏକ କାର୍ ଭିତରୁ ୭ କିଲୋ ଗଞ୍ଜେଇ ଜବତ କରାଯିବା ସହିତ ମାମଲାରେ ସୁନ୍ଦଋଗଡ ଜିଲ୍ଲା ଲହୁଣିପଡାର ସୁମିତ କୁମାର ରାୟ (୨୯), ଶରଧାପୁର ଗ୍ରାମର ସୁଧିର କୁମାର ମହନ୍ତ(୩୨), ଗୁଡିଲି ଗ୍ରାମର ଗଙ୍ଗାଧର ମହନ୍ତ(୨୪)ଙ୍କୁ ଗିରଫ କରାଯାଇଥିଲା। ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଛି। ଏହି ସାମ୍ବାଦିକ ସମ୍ମିଳନୀରେ ବୌଦ୍ଧ ଥାନା ଅଧିକାରୀ ରଞ୍ଜିତ କୁମାର ମୁନୀ ଉପସ୍ଥିତ ଥିଲେ ।