ଜୟପୁର, ୨୨।୧ : ସହର ଭିତରେ ଗଂଜେଇ ଗୋଦାମ । ସ୍ବତନ୍ତ୍ର ପ୍ଳାଷ୍ଟିକ ବକ୍ସରେ ପ୍ୟାକିଂ କରି ବାହାରକୁ ଚାଲାଣ କରାଯାଉଥିଲା ଗଞ୍ଜେଇ । ଖବର ପାଇ ପୋଲିସ ଚଢାଉ କରି ବିପୁଳ ପରିମାଣର ଗଞ୍ଜେଇ ଜବତ କରିବା ସହ ଜଣଙ୍କୁ ଗିରଫ କରିଛି । ଗିରଫ ବ୍ୟକ୍ତି ଜଣକ ହେଲେ ମିଥୁନ ନାଥ । ଏଥି ସହ ଘର ମାଲିକ ଏ.ଦୂର୍ଗାଙ୍କୁ ଅଟକ ରଖି ଅଧିକ ପଚରାଉଚରା କରୁଛି ପୋଲିସ ।
ମଙ୍ଗଳବାର ରାତିରେ ପ୍ରସାଦ ରାଓ ପେଟାରେ ରାତ୍ରିକାଳୀନ ପାଟ୍ରୋଲିଂ ପୋଲିସ କରୁଥିଲା। ଏହି ସମୟରେ ଏ.ଦୂର୍ଗାଙ୍କ ଘରେ ଗଞ୍ଜେଇ ଥିବା ପୋଲିସ ଜାଣିବାକୁ ପାଇଥିଲା । ପୋଲିସର ସ୍ବତନ୍ତ୍ର ଟିମ ସେହି ଘରେ ଚଢାଉ କରିଥିଲା। ଘର ଭିତରୁ ପ୍ରାୟ ଅଢେ଼ଇ କ୍ବିଣ୍ଟାଲ ଗଞ୍ଜେଇ ପୋଲିସ ଜବତ କରିଥିଲା। ପୋଲିସକୁ ଚକମା ଦେବା ପାଇଁ ମିଥୁନ ଗଞ୍ଜେଇ ଏଠାକୁ ଆଣି ସ୍ବତନ୍ତ୍ର ପ୍ଳାଷ୍ଟିକ ବକ୍ସରେ ପ୍ୟାକିଂ କରି ବାହାରକୁ ଚାଲାଣ କରୁଥିଲା । ତେବେ ଏହି କାରବାରରେ ଘର ମାଲିକଙ୍କ ସଂପୃକ୍ତି ସନ୍ଦେହ କରୁଛି ପୋଲିସ । ତେଣୁ ତାଙ୍କୁ ଅଟକ ରଖି ଅଧିକ ପଚରାଉଚରା କରାଯାଉଛି ।
