ନୂଆଦିଲ୍ଲୀ, ୧/୦୩: ଚଳିତ ଆର୍ଥିକବର୍ଷ ଭାରତୀୟ ଅର୍ଥନୀତି ୬.୫% ହାରରେ ବଢ଼ିବ । ଜାତୀୟ ପରିସଂଖ୍ୟାନ କାର୍ଯ୍ୟାଳୟ(ଏନ୍ଏସ୍ଓ)ର ଦ୍ୱିତୀୟ ଅଗ୍ରିମ ଆକଳନରେ ଏହା କୁହାଯାଇଛି । ତେବେ ଏହା ହେବ ୪ ବର୍ଷର ସର୍ବନିମ୍ନ ସ୍ତର । ପ୍ରଥମ ଅଗ୍ରିମ ଆକଳନରେ ୬.୪% ଅଭିବୃଦ୍ଧି ଅନୁମାନ କରିଥିଲା ଏନ୍ଏସ୍ଓ । ଅର୍ଥନୀତିଜ୍ଞଙ୍କ ମତରେ, ୬.୫% ଅଭିବୃଦ୍ଧି ହାସଲରେ ବଡ଼ ଯୋଗଦାନ ଦେବ କୁମ୍ଭମେଳା ।
ଏନ୍ଏସ୍ଓ ପକ୍ଷରୁ ଜାରି ତଥ୍ୟ ଅନୁସାରେ ଚଳିତ ଆର୍ଥିକବର୍ଷର ଅକ୍ଟୋବର-ଡିସେମ୍ବର ଅର୍ଥାତ୍ ତୃତୀୟ ତ୍ରୟମାସରେ ଜିଡିପି ଅଭିବୃଦ୍ଧି ୬.୨% ରହିଛି, ଯାହାକି ପୂର୍ବ ତ୍ରୟମାସରେ ୫.୬% ଥିଲା । ଉତ୍ତମ ମୌସୁମୀ ଏବଂ ସରକାରୀ ଖର୍ଚ୍ଚରେ ବୃଦ୍ଧି କାରଣରୁ ତୃତୀୟ ତ୍ରୟମାସ ଅଭିବୃଦ୍ଧିରେ ସୁଧାର ଆସିଛି । ସେହଭିଳି ଗ୍ରାମାଞ୍ଚଳରେ ଚାହିଦା ବୃଦ୍ଧି ବି ଅର୍ଥନୀତିକୁ ତ୍ୱରାନ୍ୱିତ କରିଛି । ନିକଟରେ ଶେଷ ହୋଇଥିବା ମହାକୁମ୍ଭ ୨୦୨୪-୨୫ ଆର୍ଥିକବର୍ଷରେ ଭାରତର ୬.୫% ଅଭିବୃଦ୍ଧି ଲକ୍ଷ୍ୟ ହାସଲରେ ସହାୟକ ହେବ ବୋଲି ମୁଖ୍ୟ ଅର୍ଥନୈତିକ ଉପଦେଷ୍ଟା(ସିଇଏ) ଭି. ଅନନ୍ତ ନାଗେଶ୍ୱରନ ପ୍ରକାଶ କରିଛନ୍ତି ।
ସିଇଏ କହିଛନ୍ତି ଯେ, କୁମ୍ଭମେଳାରେ ଲୋକଙ୍କ ଦ୍ୱାରା ହୋଇଥିବା ଖର୍ଚ୍ଚ ଅର୍ଥନୀତିକୁ ତ୍ୱରାନ୍ୱିତ କରିବ । ଉତ୍ତର ପ୍ରଦେଶ ସରକାରଙ୍କ ଦ୍ୱାରା ପ୍ରୟାଗରାଜରେ ଆୟୋଜିତ ମହାକୁମ୍ଭ ମେଳାରେ କେନ୍ଦ୍ର ଏବଂ ରାଜ୍ୟ ସରକାରଙ୍କ ପକ୍ଷରୁ ପ୍ରାୟ ୧୨,୬୭୦ କୋଟି ଟଙ୍କା ଖର୍ଚ୍ଚ କରିବାକୁ ଲକ୍ଷ୍ୟ ରଖାଯାଇଥିଲା । କୁମ୍ଭମେଳାରେ ପ୍ରାୟ ୩ ଲକ୍ଷ କୋଟିର କାରବାର ହୋଇଥିବା ରିପୋର୍ଟରୁ ଜଣାପଡ଼ିଛି । ଏହା ଦେଶର ଅର୍ଥନୈତିକ ଅଭିବୃଦ୍ଧିରେ ବଡ଼ ଯୋଗଦାନ ଦେବ ବୋଲି ସିଇଏ ଶ୍ରୀ ନାଗେଶ୍ୱରନ କହିଛନ୍ତି । ତେବେ ଟ୍ରମ୍ପଙ୍କ ଶୁଳ୍କନୀତିକୁ ନେଇ ଚିନ୍ତା ରହିଥିବା ବିଶେଷଜ୍ଞମାନେ ପ୍ରକାଶ କରିଛନ୍ତି ।
ଏନ୍ଏସ୍ଓ ତଥ୍ୟ ଅନୁସାରେ, ତୃତୀୟ ତ୍ରୟମାସରେ କୃଷି ବିକାଶ ହାର ୫.୬% ରହିଛି, ଯାହାକି ପୂର୍ବ ଆର୍ଥିକବର୍ଷ ତୃତୀୟ ତ୍ରୟମାସରେ ୧.୫% ଥିଲା । ବିନିର୍ମାଣ କ୍ଷେତ୍ର ମନ୍ଥର ରହିଛି । ଏହା ପୂର୍ବ ଆର୍ଥିକବର୍ଷ ତୃତୀୟ ତ୍ରୟମାସରେ ୧୪% ବଢ଼ିଥିବାବେଳେ ଏ ବର୍ଷ ମାତ୍ର ୩.୫% ବଢ଼ିଛି । ନିର୍ମାଣ କ୍ଷେତ୍ର ପୂର୍ବ ବର୍ଷର ୧୦% ତୁଳନାରେ ୭% ବଢ଼ିଛି । ସେହିଭଳି ଔଦ୍ୟୋଗିକ ବିକାଶ ପୂର୍ବବର୍ଷର ୧୧.୮%ରୁ ଖସି ୪.୫% ରହିଛି । ସେବା କ୍ଷେତ୍ର ୭.୪% ବଢ଼ିଛି, ଯାହାକି ପୂର୍ବ ଆର୍ଥିକବର୍ଷ ସମାନ ସମୟରେ ୮.୩% ଅଭିବୃଦ୍ଧି କରିଥିଲା
