ଖଲ୍ଲିକୋଟ, ୧୩।୧୧:  ଖଲ୍ଲିକୋଟ ବ୍ଲକ ଅନ୍ତର୍ଗତ ଚିକିଲି ଗ୍ରାମରେ ଅଘଟଣ। ଗାଧୋଉଥିବା ବେଳେ  ୪ ଭାଇ ଭଉଣୀ ଗ୍ରାମର ରଗିଆ ପୋଖରୀରେ ବୁଡି ଯାଉଥିଲେ।  ୩ ଜଣଙ୍କୁ ଗ୍ରାମବାସୀ ଉଦ୍ଧାର କରିଥିବା ବେଳେ ବଡ଼ ଭଉଣୀର ମୃତ୍ୟୁ ଘଟିଛି।

ମିଳିଥିବା ସୂଚନା ଅନୁଯାୟୀ, ବ୍ରହ୍ମପୁର ବ୍ରହ୍ମାନଗର ଅଞ୍ଚଳର ରବିରାମ ପ୍ରଧାନଙ୍କ ତିନି ଝିଅ ଜେଲିନା ପ୍ରଧାନ (୧୭),ସେଲିନା ପ୍ରଧାନ (୧୨) ଓ ଏଲିନା ପ୍ରଧାନ (୮) ଚିକିଲି ଗ୍ରାମରେ ରହୁଥିବା ସେମାନଙ୍କ ମଉସା ଜୟ ରାମ ଖୁଣ୍ଟିଆଙ୍କ ଘରକୁ ଯାତ୍ରା ଦେଖିବା ପାଇଁ ଆସିଥିଲେ। ତେବେ ଆଜି ପୂର୍ବାହ୍ନରେ ତିନି ଭଉଣୀ ଗାଧୋଇବା ପାଇଁ ମଉସା ଜୟରାମ ଖୁଣ୍ଟିଆଙ୍କ ପୁଅ ଶ୍ରୀହରି ଖୁଣ୍ଟିଆ (୯) ସହ ଚିକିଲି ଗ୍ରାମର ରଗିଆ ପୋଖରୀକୁ ଯାଇଥିଲେ। କିନ୍ତୁ ଗାଧୋଉ ଥିବା ବେଳେ ଅସାବଧାନତା ବଶତଃ ଗୋଡ଼ ଖସି ଯିବାରୁ ହାତ ଧରାଧରି ହୋଇ ସମସ୍ତେ ପାଣିରେ ବୁଡି ଯାଇଥିଲେ। ଚିତ୍କାର ଶୁଣି ନିକଟରେ ଥିବା କେତେକ ଗ୍ରାମବାସୀ ଦୌଡ଼ି ଯାଇ ସେମାନଙ୍କୁ ପାଣିରୁ ଉଦ୍ଧାର କରି ବାହାରକୁ ଆଣିଥିଲେ। ତେବେ ବଡ଼ ଭଉଣୀ ଜେଲିନାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଖଲ୍ଲିକୋଟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। କିନ୍ତୁ ଡାକ୍ତର ଏଠାରେ ବଡ଼ ଭଉଣୀ ଜେଲିନାଙ୍କୁ ମୃତ ଘୋଷଣା କରିଥିଲେ। ଗୁରୁତର ଅବସ୍ଥାରେ ଅନ୍ୟ ୩ ଜଣଙ୍କୁ ଚିକିଲି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା।ତେବେ ସେମାନେ ବିପଦମୁକ୍ତ ଥିବା ଜଣାପଡ଼ିଛି। ଖବର ପାଇ ଖଲ୍ଲିକୋଟ ପୁଲିସ ମେଡିକାଲରେ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠେଇଥିଲା। ଏ ସମ୍ପର୍କରେ ଖଲ୍ଲିକୋଟ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।