ନୂଆଦିଲ୍ଲୀ, ୦୪/୦୭ : ଇ-ରିକ୍ସାରୁ ଆରମ୍ଭ କରିଥିଲେ ସଫର୍... ଏବେ ଇନଷ୍ଟାଗ୍ରାମ ଏବଂ ୟୁଟ୍ୟୁବରେ ହଜାର ହଜାର ଫଲୋୟର୍ସ। କିଏ ଏହି ଗ୍ରାଜୁଏଟ୍ ରିକ୍ସାବାଲା ? ଯିଏ ନିଜ ପିତାଙ୍କ ଖରାପ ସ୍ଵାସ୍ଥ୍ୟାବସ୍ଥା ଯୋଗୁଁ ରିକ୍ସା ଚଳାଇବା ଆରମ୍ଭ କରିଥିଲେ ସତ... ହେଲେ ହାର୍ ମାନି ନାହାଁନ୍ତି। ଏବେ ସୋସିଆଲ୍ ମିଡିଆରେ ଜଣେ ଷ୍ଟାର ପାଲଟିଛନ୍ତି। ଆମେ କହୁଛୁ ଉତ୍ତର ପ୍ରଦେଶ ମୁଜାଫରନଗର ଜିଲ୍ଲାର ସୁମିତ ପ୍ରଜାପତିଙ୍କ କଥା। ତେବେ ବ୍ଲଗିଂ ଦୁନିଆରେ ଇନଷ୍ଟାଗ୍ରାମରେ ୭୦ ହଜାର ଫଲୋୟର୍ସ ଏବଂ ୟୁଟ୍ୟୁବରେ ପ୍ରାୟ ୧୦ ହଜାର ସବସ୍କ୍ରାଇବର୍ ଏହି ସଂଖ୍ୟା କମ୍ ଲାଗୁଥିବ ନିଶ୍ଚୟ। ହେଲେ ଏହା ପଛରେ ରହିଛି ସୁମିତଙ୍କ ଏକ ଲମ୍ଵା ଏବଂ ସଙ୍ଘର୍ଷଭରା କାହାଣୀ।
ଗରିବ ପରିବାରରୁ ଆସିଥିବା ସୁମିତଙ୍କ ପିଲାଦିନ ଅଭାବ ଅନଟନରେ କଟିଛି। ଛୋଟବେଳେ ସେ କ୍ଷେତକୁ ଯାଇ କାମ କରୁଥିଲେ। ପେଟ ପୋଷିବାକୁ ପରିବା ବେପାର ଏବଂ ସାଇକେଲ୍ ମେକାନିକ୍ କାମ ବି କରୁଥିଲେ। ସୁମିତଙ୍କ ବାପା ଇ-ରିକ୍ସା ଚଳାଉଥିବା ଯୋଗୁଁ ଯେତିକି ରୋଜଗାର କରୁଥିଲେ ତାହା ଘର ଚଳିବାକୁ ନିଅଣ୍ଟ ପଡ଼ୁଥିଲା। ତେଣୁ ସୁମିତ ମନସ୍ଥ କଲେ, ପାଠ ପଢିବାକୁ ଯେତିକି ହୋଇପାରିବ ନିଜେ ରୋଜଗାର କରିବେ। କଷ୍ଟେ ମଷ୍ଟେ ଏମିତି ପରିବାର ଚଳି ଯାଉଥିଲା। ହେଲେ ଦଇବ ଦାଉ ସାଧିଲା। ସୁମିତଙ୍କ ସୁନ୍ଦର କ୍ୟାରିଅର ଗଢିବାର ସ୍ଵପ୍ନ ଭାଙ୍ଗିଦେଲା। ସୁମିତ ଯେତେବେଳେ ଗ୍ରାଜୁଏସନ କରୁଥିଲେ ଏକ ଦୁର୍ଘଟଣାରେ ତାଙ୍କ ବାପା ଗୁରୁତର ହୋଇଗଲେ। ପରିବାରର ସବୁ ବୋଝ ସୁମିତଙ୍କ କାନ୍ଧରେ ମାଡ଼ି ବସିଲା। ସେ ଚାକିରି ଖୋଜିଲେ, ହେଲେ ତାଙ୍କୁ ସଫଳତା ମିଳିଲାନି।
ସୁମିତ ଚିନ୍ତା କଲେ, ବାପାଙ୍କ ଇ-ରିକ୍ସାକୁ ଚଳାଇବେ। କିଛି ନଭାବି ସେ ରିକ୍ସା ଚଳାଇବାକୁ ଆରମ୍ଭ କଲେ। ଲୋକମାନେ ତାଙ୍କୁ ଗ୍ରାଜୁଏଟ୍ ରିକ୍ସାବାଲା କହି ମଜାକ୍ ବି ଉଡାଇଲେ। ହେଲେ ସୁମିତ ସ୍ଵାଭିମାନର ସହ ସେହି କାମକୁ ଆପଣେଇ ନେଲେ। ଏହି ମଧ୍ୟରେ ସେ ବ୍ଲିଗିଂ କରିବାକୁ ଚିନ୍ତା କଲେ। ଧୀରେ ଧୀରେ ସେ ଭିଡିଓ କରିବା ଆରମ୍ଭ କଲେ। ଦିନର ଖଟା ମିଠା ଅନୁଭୂତିକୁ ସେ ମୋବାଇଲ୍ କ୍ୟାମେରାରେ କଏଦ କରି ସୋସିଆଲ୍ ମିଡିଆରେ ସେୟାର କଲେ। ଦେଖୁ ଦେଖୁ ତାଙ୍କର ଫଲୋୟର୍ସ ସଂଖ୍ୟା ବଢିଲା। ସେ ସୋସିଆଲ ମିଡିଆରେ ଷ୍ଟାର ପାଲଟିଗଲେ। ୟୁଟ୍ୟୁବ ଏବଂ ଇନଷ୍ଟାଗ୍ରାମ୍ ଜରିଆରେ ତାଙ୍କର ରୋଜଗାରର ଆଉ ଏକ ମାଧ୍ୟମ ଖୋଲିଗଲା। ଏବେ ସେ ଗ୍ରାଜୁଏଟ୍ ରିକ୍ସାବାଲା। ତେବେ କୌଣସି କାମ ଛୋଟ କିମ୍ଵା ବଡ଼ ହୋଇନଥାଏ।
