ନୂଆଦିଲ୍ଲୀ: ଆରବ ଦେଶ ‘କୁଏତ’କୁ ଦୁଇ ଦିବସୀୟ ଗସ୍ତ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଦୀର୍ଘ ୪୩ ବର୍ଷ ପରେ କୌଣସି ଭାରତୀୟ ପ୍ରଧାନମନ୍ତ୍ରୀ କୁଏତ ଗସ୍ତ କରିଛନ୍ତି । ଏହି ସମୟରେ ପିଏମ ମୋଦୀ ସେଠାକାର ଶୀର୍ଷସ୍ତରୀୟ ନେତାଙ୍କ ସହ ଦ୍ବିପାକ୍ଷିକ ସଂପର୍କ ମଜଭୁତ କରିବା ଉପରେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ଏପରିକି ମୋଦୀ ସେଠାରେ ରହୁଥିବା ଜଣେ ଭାରତର ପୂର୍ବତନ ଆଇଏଫଏସ୍‌ (ଭାରତୀୟ ବିଦେଶ ସେବା) ଅଧିକାରୀ ମଙ୍ଗଳ ସୈନ ହାଣ୍ଡାଙ୍କୁ ଭେଟିଛନ୍ତି । କିନ୍ତୁ ପୂର୍ବତନ ଆଇଏଫଏସ୍‌ ଅଧିକାରୀଙ୍କୁ ଭେଟିବେ ବୋଲି ମୋଦୀ ଜଣେ ଯୁବତୀଙ୍କୁ ପ୍ରତିଶ୍ରୁତି ଦେଇଥିଲେ । ପ୍ରକୃତରେ ୧୦୧ ବର୍ଷୀୟ ପୂର୍ବତନ ଭାରତୀୟ ଅଧିକାରୀଙ୍କ ନାତୁଣୀ ଶ୍ରେୟା ଜୁନେଜା ମୋଦୀଙ୍କୁ ଟ୍ବିଟ୍‌ କରି ତାଙ୍କ ଅଜାଙ୍କୁ ଭେଟିବାକୁ ଅନୁରୋଧ କରିଥିଲେ । 




ଶୁକ୍ରବାର ଶ୍ରେୟା ଏକ୍ସ (ପୂର୍ବରୁ ଟ୍ବିଟର)ରେ ଲେଖିଥିଲେ, ‘ମାନନୀୟ ପ୍ରଧାନମନ୍ତ୍ରୀଙ୍କୁ ଅନୁରୋଧ କରୁଛି ସେ ଆସନ୍ତାକାଲି କୁଏତ ଗସ୍ତ କରିବା ପରେ ଭାରତୀୟ ବଂଶୋଦ୍ଭବଙ୍କୁ ସାକ୍ଷାତ ସମୟରେ ମୋ ଅଜା ଏବଂ ପୂର୍ବତନ ଆଇଏଫଏସ୍‌ ଅଧିକାରୀ ମଙ୍ଗଳ ସୈନ ହାଣ୍ଡାଙ୍କୁ ଭେଟନ୍ତୁ । ସେ ଆପଣଙ୍କର ଜଣେ ବଡ଼ ପ୍ରଶଂସକ । ବିସ୍ତୃତ ସୂଚନା ଆପଣଙ୍କ କାର୍ଯ୍ୟାଳୟକୁ ମେଲ୍‌ କରିଛି ।’ ଶ୍ରେୟାଙ୍କ ଏହି ଟ୍ବିଟ୍‌ରେ ରିପ୍ଲାଏ କରି ପିଏମ ମୋଦୀ ଲେଖିଥିଲେ, ‘ନିଶ୍ଚିତ ! ଆଜି କୁଏତରେ ମଙ୍ଗଳ ସୈନ ହାଣ୍ଡାଙ୍କୁ ଭେଟିବାକୁ ଚେଷ୍ଟା କରିବି।’ ତେବେ ମୋଦୀ ଦେଇଥିବା ପ୍ରତିଶ୍ରୁତି ପୂରଣ କରିଛନ୍ତି । ସେ ଆଜି କୁଏତରେ ୧୦୧ ବର୍ଷୀୟ ମଙ୍ଗଳ ସୈନ ହାଣ୍ଡାଙ୍କୁ ସାକ୍ଷାତ କରିଛନ୍ତି । 

ସେପଟେ ମଙ୍ଗଳ ହାଣ୍ଡା ପ୍ରଧାନମନ୍ତ୍ରୀ ମୋଦୀଙ୍କର ଜଣେ ବଡ଼ ପ୍ରଶଂସକ । ସେପ୍ଟେମ୍ବର ୨୦୨୩ରେ ତାଙ୍କର ୧୦୦ତମ ଜନ୍ମଦିନରେ ମୋଦୀ ତାଙ୍କୁ ପତ୍ର ଲେଖି ଶୁଭେଚ୍ଛା ମଧ୍ୟ ଜଣାଇଥିଲେ । ଭାରତର କୂଟନୈତିକ ସମ୍ବନ୍ଧ ଦିଗରେ ତାଙ୍କର ଯେଗାଦାନକୁ ପ୍ରଶଂସା କରିବା ସହ ହାଣ୍ଡାଙ୍କ ଉନ୍ନତ୍ତ ସ୍ବାସ୍ଥ୍ୟର କାମନା କରିଥିଲେ ମୋଦୀ । ଏହା ପରେ ମଙ୍ଗଳ ହାଣ୍ଡା ଏକ୍ସରେ ମୋଦୀଙ୍କୁ ଧନ୍ୟବାଦ ଜଣାଇଥିଲେ । ଏପରିକି ମୋଦୀଙ୍କ ନେତୃତ୍ବର ଭାରତର ବିକାଶ ଦେଖିବାକୁ ମିଳିଥିବାରୁ ତାଙ୍କର ୧୦୦ ବର୍ଷର ଜୀବନ ସାର୍ଥକ ହୋଇଛି ବୋଲି ଲେଖିଥିଲେ ମଙ୍ଗଳ ସୈନ ହାଣ୍ଡା ।