ଭୁବନେଶ୍ୱର, ୨୪।୮: ଏଣିକି ସହରରୁ ବାହାରୁଥିବା ବର୍ଜ୍ୟବସ୍ତୁରୁ ବାହାରିବ ସବୁଜ ଇନ୍ଧନ । ଓଡ଼ିଶାରେ ଏହି ଟେକ୍ନୋଲୋଜି ଲାଗୁ କରିବାକୁ ଯୋଜନା କରିଛି ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ । ଶନିବାର ମନ୍ତ୍ରୀ ଡ. କୃଷ୍ଣଚନ୍ଦ୍ର ମହାପାତ୍ର ବାରଣାସୀରେ ଥିବା ୱେଷ୍ଟ ଟୁ ଚାରକୋଲ୍ ପ୍ଲାଣ୍ଟ ବା ବର୍ଜ୍ୟରୁ ଅଙ୍ଗାର ପ୍ଲାଣ୍ଟ ବୁଲି ଦେଖିଛନ୍ତି । ବାରଣାସୀର ଏହି ପ୍ଲାଣ୍ଟରୁ ଦୈନିକ ୧୦୦ ଟନ୍ ସବୁଜ ଅଙ୍ଗାର ସୃଷ୍ଟି ହେବା ସହ ଏହା ପ୍ରାୟ ୩୦୦ ଟନ୍ ଅଙ୍ଗାରକାମ୍ଳ ନିର୍ଗମନକୁ ହ୍ରାସ କରୁଛି । ବାରଣାସୀ ହରିତ୍ କୋୟଲା ପରିଯୋଜନା ଅଧୀନରେ ଏହି ପ୍ରକଳ୍ପ କାର୍ଯ୍ୟକାରୀ ହେଉଛି । ଟାରେଫାକ୍ସନ ପ୍ରକ୍ରିୟାରେ ସହରରୁ ନିର୍ଗତ ବର୍ଜ୍ୟକୁ ଥର୍ମୋକେମିକାଲ ଟ୍ରିଟ୍ମେଣ୍ଟ ଦ୍ୱାରା ୨୫୦ରୁ ୩୦୦ ଡିଗ୍ରୀ ତାପମାତ୍ରା ଦେବା ସହ ନିୟନ୍ତ୍ରିତ ଅମ୍ଲଜାନ ପରିବେଶରେ ସବୁଜ ଅଙ୍ଗାରରେ ପରିଣତ କରାଯାଉଛି ।
ପ୍ଲାଣ୍ଟର ଦୈନିକ ବର୍ଜ୍ୟ ଟ୍ରିଟମେଣ୍ଟ୍ କ୍ଷମତା ୪୦୦ ଟନ୍ ଥିବାବେଳେ ଏହା ୧୩ ଟନ୍ ମିଥେନ୍ ନିର୍ଗମକୁ କମ୍ କରିପାରୁଛି । ୧୬ ଏକର ଜାଗାରେ ହୋଇଥିବା ଏହି ପ୍ଲାଣ୍ଟରେ ଏନ୍ଟିପିସି ଏହି ସ୍ୱତନ୍ତ୍ର ମଡେଲ ଆପଣାଇ ବର୍ଜ୍ୟବସ୍ତୁରୁ ସବୁଜ ଇନ୍ଧନ ଉତ୍ପାଦନ ପାଇଁ ପଦକ୍ଷେପ ଆରମ୍ଭ କରିଛି । ଏହି ଟୋରିଫାଏଡ୍ ଚାରକୋଲ୍ ବା ସବୁଜ ଅଙ୍ଗାରକୁ ନେଇ ଏନଟିପିସି ନିଜ ତାପଜ ବିଦ୍ୟୁତ ପ୍ରକଳ୍ପରେ ବ୍ୟବହାର କରୁଛି । ପାରମ୍ପରିକ କୋଇଲା ଉପରେ ନିର୍ଭରଶୀଳତା କମାଇବା ଲକ୍ଷ୍ୟରେ ସାମାଜିକ କର୍ପୋରେଟ ଦାୟିତ୍ୱବୋଧ ଅଧୀନରେ ଏହି ପ୍ରକଳ୍ପ ଆରମ୍ଭ ହୋଇଛି । ଏଥିରେ ବର୍ଜ୍ୟ ବ୍ୟବହାର ହେଉଥିବାରୁ ବର୍ଜ୍ୟର ଲ୍ୟାଣ୍ଡଫିଲ୍ ଆବଶ୍ୟକତାକୁ କମାଇବା ସହ ଅଙ୍ଗାରକାମ୍ଲ ନିର୍ଗମନ କମାଇବ ଓ ଶକ୍ତି ସୁରକ୍ଷାକୁ ନିଶ୍ଚିତ କରିପାରିବ । ଓଡ଼ିଶାରେ ଏଭଳି ପ୍ରକଳ୍ପ ଦ୍ୱାରା ବର୍ଜ୍ୟକୁ ଉପଯୋଗ କରି ସବୁଜ ଇନ୍ଧନ ସୃଷ୍ଟି କରିବାକୁ ପଦକ୍ଷେପ ନିଆଯିବ ବୋଲି ମନ୍ତ୍ରୀ ଶ୍ରୀ ମହାପାତ୍ର କହିଛନ୍ତି । ମନ୍ତ୍ରୀଙ୍କ ପରିଦର୍ଶନ ସମୟରେ ନଗର ଉନ୍ନୟନ ବିଭାଗର ଅତିରିକ୍ତ ସଚିବ ତଥା ସ୍ୱଚ୍ଛ ଭାରତ ମିଶନ ନିର୍ଦ୍ଦେଶକ ବିନୟ କୁମାର ଦାସ, ଏନ୍ଟିପିସି ବାରଣାସୀର ଡିଜିଏମ୍ ଆଶିଷ ରଞ୍ଜନ ପ୍ରମୁଖ ଉପସ୍ଥିତ ଥିଲେ ।
