ତିହିଡ଼ି,୧୨/୦୬: ଦୀର୍ଘ ୧୧ ଦିନ କାଳ ଗୁରୁତର ଆହାତ ହୋଇ ବେସରକାରୀ ଡାକ୍ତରଖାନାରେ ଚିକିତ୍ସିତ ହେଉଥିବା ସନ୍ତୋଷ ପରିଡ଼ା ଜୀବନ ଯୁଦ୍ଧରେ ହାରିଯାଇଛନ୍ତି । ବୁଧବାର ସରକାରୀ ଭାବେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଶବ ବ୍ୟବଚ୍ଛେଦ ପରେ ଗୁରୁବାର ତାଙ୍କର ପୈତୃକ ଘର ତିହିଡ଼ି ବ୍ଲକର କୁବେରା ପଞ୍ଚାୟତ ଅନ୍ତର୍ଗତ କଷଟି ଗ୍ରାମକୁ ଅଣାଯିବ । ଏଥିପାଇଁ ବୁଧବାରଠାରୁ ଜିଲ୍ଲା ଏପସିଙ୍କ ନିର୍ଦ୍ଦେଶରେ ପୁଲିସ ଛାଉଣି କରାଯାଇଛି । କଷଟି, ତୁଳସୀପୁର ଏବଂ ଗୁଜିଦରଡ଼ା ଅଞ୍ଚଳରେ ୪ ପ୍ଲାଟୁନ୍ ଫୋର୍ସ ଓ ୧୦ ଜଣ ବଛାବଛା ଅଧିକାରୀ ନିୟୋଜିତ ହୋଇଛନ୍ତି । ଅଞ୍ଚଳରେ ଉତ୍ତେଜନାକୁ ଆଖିରେ ରଖି ଭଦ୍ରକରେ ୨୪ ଘଣ୍ଟିଆ ଇଣ୍ଟରନେଟ ସେବା ବନ୍ଦ କରାଯାଇଛି । ଗୁରୁବାର ସକାଳ ୬ଟାରୁ ଶୁକ୍ରବାର ସକାଳ ୬ଟା ଯାଏ ଇଣ୍ଟରନେଟ ସେବା ବନ୍ଦ ରହିବ । ଭଦ୍ରକ ପୌରାଞ୍ଚଳ, ଭଦ୍ରକ ବ୍ଲକ, ତିହିଡିରେ ଇଣ୍ଟରନେଟ ସେବା ବନ୍ଦ ରହିବ । ନିଜେ ତିହିଡ଼ି ଥାନାଧିକାରୀ ସତ୍ୟବ୍ରତ ଗ୍ରହାଚାର୍ଯ୍ୟ ଏବଂ ଏସ୍ଡିପିଓ ତ୍ରିଲୋଚନ ସେଠୀ ଘଟଣା ଉପରେ ତୀକ୍ଷ୍ମ ନଜର ରଖିଛନ୍ତି ।
ଅବସ୍ଥାରେ ମୃତ୍ୟୁ ଘଟିଛି।
— Bhadrak Police (@SpBhadrak) June 11, 2025
ଏହି ଘଟଣାରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଗଭୀର ଦୁଃଖ ପ୍ରକାଶ କରିଛନ୍ତି । ଏ ଘଟଣାରେ ଦୋଷୀଙ୍କ ବିରୋଧରେ ଆଇନ ଅନୁଯାୟୀ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଏବଂ ମୃତ୍ୟୁବରଣ କରିଥିବା ଯୁବକଙ୍କ ପରିବାରକୁ ନ୍ୟାୟ ପ୍ରଦାନ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଗତ ମେ ୩୦ ତାରିଖରେ ଗୋ ଚାଲାଣରୁ ସଂଘର୍ଷ ଓ ରକ୍ତପାତ ହୋଇଥିଲା । ଯେଉଥିପାଇଁ ଆଜି ଯାଏ କଷଟି ଓ ତୁଳସୀପୁର ଗାଁରେ ତିହିଡ଼ି ଥାନା ତରଫରୁ ପୁଲିସ ଫୋର୍ସ ମୁତୟନ କରି ରଖାଯାଇଥିବାବେଳେ ଗୁଜିଦରଡ଼ା ଥାନା ଅଞ୍ଚଳରେ ମଧ୍ୟ ବ୍ୟାପକ ଫୋର୍ସ ମୁତୟନ ହୋଇରହିଥିଲା । ମେ ୩୦ ତାରିଖ ଦିନ ଗୋ-ଚାଲାଣକୁ ନେଇ ବଚସା ଓ ଧସ୍ତାଧସ୍ତି ହେବା ପରେ ଯେଉଁ ଉତ୍ତେଜନା ପ୍ରକାଶ ପାଇଥିଲା ତାହାକୁ ପ୍ରଶମିତ କରିବାକୁ ଓ ସଂଖ୍ୟାଲଘୁଙ୍କୁ ବୁଝାଇବା ପାଇଁ ମଧ୍ୟସ୍ତି କରିବାକୁ ଯାଉଥିବା କଷଟି ଗାଁର ସନ୍ତୋଷ ପରିଡ଼ାଙ୍କୁ ୫୦ ରୁ ଅଧିକ ସଂଖ୍ୟାଲଘୁ ଯୁବକ ମରଣାନ୍ତକ ଆକ୍ରମଣ କରି ଫେରାର ହୋଇଯାଇଥିଲେ । ରାଜଧାନୀର ଏକ ଘରୋଇ ଡାକ୍ତରଖାନାରେ ସନ୍ତୋଷ ୧୧ ଦିନକାଳ କୋମାରେ ରହିବା ପରେ ଶେଷରେ ଜୀବନ ଯୁଦ୍ଧରେ ହାରିଗଲେ । ଏହାକୁ ଲକ୍ଷ୍ୟ କରି ଏସପି ଘଟଣାସ୍ଥଳ ପରିଦର୍ଶନ କରିବା ସହ ତିହିଡ଼ି ଥାନାଧିକାରୀ ଓ ଏସ୍ଡିପିଓ ବାରମ୍ବାର କଷଟି ଓ ତୁଳସୀପୁର ଗାଁରେ ପଇଁତରା ମାରୁଛନ୍ତି ।
ତେବେ ନୂଆ ଏସପି ମନୋଜ ରାଉତ ଯୋଗ ଦେବା ପରେ ନୂଆ ଟିମ୍ ଗଠନ କରିଥିଲେ । ଏହି ଟିମ୍ ବିଭିନ୍ନ ସ୍ଥାନରେ ଚଢ଼ଉ କରି ଫେରାର ହୋଇଥିବା ମୁଖ୍ୟ ଅଭିଯୁକ୍ତଙ୍କୁ ଗିରଫ କରିଛନ୍ତି । ତେବେ ବର୍ତ୍ତମାନ ପର୍ଯ୍ୟନ୍ତ ୧୦ଜଣ ଗିରଫ ହୋଇଥିବାବେଳେ ବୁଧବାର ସକାଳୁ ପୁଣି ୨ ଜଣଙ୍କୁ ଗିରଫ କରାଯାଇଛି । ଏହି ଘଟଣାରେ ମୋଟ ୧୨ ଜଣ ଗିରଫ ହେଲେଣି । ମୃତ ସନ୍ତୋଷ ପରିଡ଼ାଙ୍କ ଧର୍ମପତ୍ନୀ ମିନତୀ ବେହେରାଙ୍କ ଏତଲା ବଳରେ କେସ୍ ନଂ ୧୯୭/୨୫, ଦଫା ୧୨୬(୨), ୧୧୮(୨), ୧୦୯(୧), ୩୫୧(୨), ୨୯୬, ୩(୫) ଆଦି ଲଗାଯାଇଥିଲା । ସନ୍ତୋଷଙ୍କୁ ମୃତ ଘୋଷଣା ପରେ ପୁଲିସ ୧୦୯(୧) ଦଫାକୁ ହଟାଇ ହତ୍ୟାମାମଲା ୧୦୩ ଲଗାଇଛି । ଗିରଫ ଅଭିଯୁକ୍ତମାନେ ହେଲେ ସେକ୍ ମୁଜାଫର, ସେକ୍ କାଦିର, ସେକ୍ ସମ୍ସୁଦ୍ଦିନ୍, ମଞ୍ଜୁର ଅଲ୍ଲୀ ଖାଁ, ସେକ୍ ପରୱାନ, ସେକ୍ କୌଶର । ମୁଖ୍ୟ ଅଭିଯୁକ୍ତ ଗୁଜିଦରଡ଼ାରୁ ଫେରାର ହୋଇଯାଇ ବାହାର ଜିଲ୍ଲା ଓ ବାହାର ରାଜ୍ୟରେ ରହିଥିଲେ ।
ଗତ ମଙ୍ଗଳବାର ରାତିରେ କଟକ ନିଶ୍ଚନ୍ତ କୋଇଲିର ବସ୍ତି ଉପରେ ଚଢ଼ଉ କରି ଧରାଯାଇଛି । ମୁଖ୍ୟଅଭିଯୁକ୍ତଙ୍କ ମଧ୍ୟରୁ ଭଦ୍ରକ ଗୁଜିଦରଡ଼ାର ସେକ୍ଦାମ ହୁସେନ ଓ କାଶିମୁଦ୍ଦିନ୍ ଖାନ୍ ବାହାର ରାଜ୍ୟରୁ ଧରାଯାଇଛନ୍ତି । ସେହପରି ଏହି ଅଭିଯୁକ୍ତଙ୍କୁ ଘରେ ରଖି ଖସାଇବାରେ ସହାୟତା କରିଥିବାରୁ ନିଶ୍ଚିନ୍ତ କୋଇଲି ବସ୍ତିର ସେକ୍ ସଇଫୁର ରହମାନ ଏବଂ ସେକ୍ ସୁଜିଲଙ୍କୁ ମଧ୍ୟ ଗିରଫ କରାଯାଇଛି । ମୋଟ ଉପରେ କଷଟି ଓ ତୁଳସୀପୁର ଅଞ୍ଚଳରେ ଚାପା ଉତ୍ତେଜନା ଥିବାରୁ ପୁଲିସ ପହରା ବ୍ୟବସ୍ଥା ଦୃଢ଼ କରାଯାଇଛି ।
