ନୂଆଦିଲ୍ଲୀ: ଅଲକାଏଦା ସହ ଜଡ଼ିତ ଏକ ଆତଙ୍କବାଦୀ ମ୍ୟଡ୍ୟୁଲର ପର୍ଦ୍ଦାଫାସ କରିଛି ଗୁଜରାଟ ଏଟିଏସ୍ । ଶମା ପରବୀନଙ୍କ ସମେତ ୫ ଅଭିଯୁକ୍ତଙ୍କୁ ଏଟିଏସ୍ ଗିରଫ କରିଥିବା ଜଣାପଡ଼ିଛି । ସେମାନେ ସୋସିଆଲ ମିଡିଆରେ ଆତଙ୍କବାଦର ପ୍ରଚାର କରୁଥିଲେ । ଏହା ସହ ଉଗ୍ରବାଦୀ ଚିନ୍ତାଧାରା ଏବଂ ଗଜବା-ଏ-ହିନ୍ଦର ଷଡ଼ଯନ୍ତ୍ରରେ ସାମିଲ ଥିଲେ । ସେମାନଙ୍କଠାରୁ ଷଡ଼ଯନ୍ତ୍ର ସହିତ ଜଡିତ ଡକ୍ୟୁମେଣ୍ଟ ଏବଂ ଡିଜିଟାଲ୍ ପ୍ରମାଣ ମଧ୍ୟ ଉଦ୍ଧାର କରାଯାଇଛି । ବେଙ୍ଗାଲୁରୁରୁ ATS ଦ୍ୱାରା ଗିରଫ ହୋଇଥିବା ଶମା ପରବୀନଙ୍କୁ ମଡ୍ୟୁଲର ମାଷ୍ଟରମାଇଣ୍ଡ କୁହାଯାଉଛି । ଏଟିଏସ୍ ଏହି ମାମଲାର ତଦନ୍ତ ବହୁତ ଦିନ ଧରି କରିଆସୁଛି ।
ଅନେକ ସ୍ଥାନରେ ଚଢାଉ ମଧ୍ୟ କରାଯାଉଛି । ଜୁଲାଇ ୨୩ ରେ, ଅଲକାଏଦା ସହିତ ଜଡିତ ଚାରି ଜଣ ଆତଙ୍କବାଦୀଙ୍କୁ ଗିରଫ କରାଯାଇଥିଲା। ସେମାନେ ଶମା ପରବୀନଙ୍କ ନାଁ ନେଇଥିଲେ । ଏହା ପରେ ଏଟିଏସ୍ ଶମା ପରବୀନଙ୍କୁ ଗିରଫ କରିବାକୁ ଯୋଜନା ପ୍ରସ୍ତୁତ କରିଥିଲା । ଶେଷରେ ବେଙ୍ଗାଲୁରୁରୁ ଶମା ପରବୀନଙ୍କୁ ଗିରଫ କରିଛି । ତାଙ୍କଠାରୁ ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର, ମାନଚିତ୍ର, ମୋବାଇଲ୍ ନମ୍ବର, ସ୍ଥାନର ସୂଚନା ପାଇଛି ଏଟିଲସ୍ । ସେ ପାକିସ୍ତାନୀ ଲୋକଙ୍କ ସହିତ ସିଧାସଳଖ ସମ୍ପର୍କରେ ଥିଲେ।
ଗୁଜରାଟ ଏଟିଏସ୍ର ସୂଚନା ଅନୁଯାୟୀ, ଶମା ପରବୀନଙ୍କ ବୟସ ୩୦ ବର୍ଷ ଏବଂ ସେ ବେଙ୍ଗାଲୁରୁରେ ରହୁଥିଲେ । ସେ ଗତ କିଛି ମାସ ଧରି ପାକିସ୍ତାନ ସହିତ ଯୋଗାଯୋଗରେ ଥିଲେ। ଅଲ-କାଏଦା ବିଚାରଧାରା ପ୍ରଚାର କରିବା ପାଇଁ ଶମାଙ୍କୁ ଦିଲ୍ଲୀ ଏବଂ ଉତ୍ତର ଭାରତର ଗୋଷ୍ଠୀ ସହିତ ସଂଯୋଗ କରାଯାଉଥିଲା । ଶମା ପରବୀନ ଏହି ସମ୍ପୂର୍ଣ୍ଣ ମଡ୍ୟୁଲର ମୁଖ୍ୟ ଷଡ଼ଯନ୍ତ୍ରକାରୀ ଥିଲେ ଏବଂ କିଛି ଲୋକଙ୍କୁ ପ୍ରବର୍ତ୍ତାଇ ଆତଙ୍କବାଦୀ କାର୍ଯ୍ୟକଳାପ ପାଇଁ ପ୍ରସ୍ତୁତ କରୁଥିଲେ। ଶମା ଇନଷ୍ଟାଗ୍ରାମ ଭଳି ସୋସିଆଲ ମିଡିଆ ପ୍ଲାଟଫର୍ମରେ ଆତଙ୍କବାଦ ଚିନ୍ତାଧାରା ସେୟାର କରୁଥିଲେ । ଯେଉଁଥିରେ ଭିଡିଓ, ଭାଷଣ ଏବଂ ଆତଙ୍କବାଦକୁ ପ୍ରୋତ୍ସାହିତ କରୁଥିବା ପୋଷ୍ଟ ଅନ୍ତର୍ଭୁକ୍ତ ଥିଲା ।
ଗୁଜରାଟ ଏଟିଏସ୍ ଶମା ପରବୀନଠାରୁ ପାକିସ୍ତାନ ସହ ଜଡିତ କିଛି ଗୁରୁତ୍ୱପୂର୍ଣ୍ଣ କାଗଜପତ୍ର, ମାନଚିତ୍ର, ମୋବାଇଲ ନମ୍ବର, ସ୍ଥାନର ସୂଚନା ପାଇଛି। ଗିରଫ ହୋଇଥିବା ଏହି ପାଞ୍ଚ ଜଣ ଅଭିଯୁକ୍ତ ସୋସିଆଲ ମିଡିଆ ମାଧ୍ୟମରେ ପରସ୍ପର ସହିତ ଯୋଗାଯୋଗ କରୁଥିଲେ । ସେମାନେ ସଂଗଠିତ ଭାବରେ ଅନଲାଇନ୍ ଆତଙ୍କୀ ମଡ୍ୟୁଲ୍ ଚଳାଉଥିଲେ । ଏହି ମାମଲାରେ ସେମାନଙ୍କର ହ୍ୟାଣ୍ଡଲରମାନେ ପାକିସ୍ତାନରେ ଥିବା ନେଇ ମଧ୍ୟ ସୂଚନା ମିଳିଛି ।
