ନୂଆଦିଲ୍ଲୀ,୨୮/୧୧: ସିଙ୍ଗାପୁରରେ ଚାଲିଥିବା ବିଶ୍ୱ ଚେସ୍ ଚାମ୍ପିଅନ୍ସିପ୍ରେ ଭାରତର ଡି. ଗୁକେଶ ପ୍ରଥମ ବିଜୟ ହାସଲ କରିଛନ୍ତି । ପ୍ରଥମ ରାଉଣ୍ଡ୍ରେ ସେ ପରାଜିତ ହୋଇଥିଲେ । ଗୁକେଶ ତୃତୀୟ ରାଉଣ୍ଡ୍ରେ ଚମତ୍କାର ପ୍ରତ୍ୟାବର୍ତ୍ତନ କରିଥିଲେ । ଧଳା ଗୋଟିରେ ଖେଳି ଗୁକେଶ ଆରମ୍ଭରୁ ପ୍ରଭାବ ବିସ୍ତାର କରି ଖେଳିଥିଲେ । ପ୍ରତି ଗୋଟି ଚାଳନାରେ ସେ ଡିଫେଣ୍ଡିଂ ଚାମ୍ପିଅନ୍ ଚୀନ୍ର ଡିଙ୍ଗ ଲିରେନଙ୍କୁ ଚିନ୍ତାରେ ପକାଇ ଦେଉଥିଲେ । ୩୭ତମ ଗୋଟି ଚାଳନା ବେଳକୁ ଲିରେନଙ୍କ ନିକଟରେ ଯଥେଷ୍ଟ ସମୟ ନଥିଲା । ଶେଷରେ ସମୟ ଶେଷ ହୋଇଥିଲା ଓ ଗୁକେଶ ବିଜୟୀ ହୋଇଥିଲେ ।
ଏହା ପୂର୍ବରୁ ଗୁକେଶ ପ୍ରଥମ ରାଉଣ୍ଡ୍ରେ ପରାଜିତ ହୋଇଥିବାବେଳେ ଦ୍ୱିତୀୟ ରାଉଣ୍ଡ ଡ୍ର’ ରଖିଥିଲେ । ତୃତୀୟ ରାଉଣ୍ଡ ବେଳକୁ ତାଙ୍କୁ ଗୁକେଶ ଲୟକୁ ଫେରିଛନ୍ତି । ଫାଇନାଲ୍ ମୁକାବିଲା ୧୪ ରାଉଣ୍ଡ ବିଶିଷ୍ଟ ରହିବ । ଯେଉଁ ପ୍ରତିଯୋଗୀ ପ୍ରଥମେ ୭.୫ ପଏଣ୍ଟ ହାସଲ କରିବେ, ସେ ବିଜେତା ଘୋଷିତ ହେବେ । ତୃତୀୟ ରାଉଣ୍ଡ ଶେଷ ସୁଦ୍ଧା ଉଭୟ ୧.୫ ପଏଣ୍ଟ ଲେଖାଏଁ ଅର୍ଜନ କରିଛନ୍ତି । ସୂଚନାଯୋଗ୍ୟ, ଡିଙ୍ଗ୍ ଗତ ବର୍ଷ ରୁଷିଆର ଇଆନ୍ ନେପମନିଆଚିଙ୍କୁ ହରାଇ ଚାମ୍ପିଅନ୍ ଆଖ୍ୟା ଅର୍ଜନ କରିଥିଲେ ।
