ନୂଆଦିଲ୍ଲୀ, ୨୩/୦୪ : ପହଲଗାମ୍ ଆଟାକ୍କୁ ନେଇ ଶୁଭେଚ୍ଛା ଜଣାଇଥିବା ଯୁବକ ଗିରଫ। ଝାଡ଼ଖଣ୍ଡ ବୋକାରୋର ମଖଦୁମପୁରରୁ ମହମ୍ମଦ ନୌଶାଦକୁ ପୋଲିସ ଗିରଫ କରିଛି। ନୌଶାଦ ତାର ସୋସିଆଲ ମିଡିଆ ମାଧ୍ୟମରେ ଲସ୍କର-ଏ-ତୋଏବା ଏବଂ ପାକିସ୍ତାନକୁ ଶୁଭେଚ୍ଛା ଜଣାଇଥିଲା।
୩୫ ବର୍ଷୀୟ ମହମ୍ମଦ ନୌଶାଦ ବିହାର ମଦରସାରେ କୁରାନର ତାଲିମ ନେଇ ଡିଗ୍ରୀ ହାସଲ କରିଥିଲା। ଏବେ ସେ ବୋକାରୋରେ ରହୁଛି। ନୌଶାଦ ତାର ଭାଇ ନାଁରେ ଥିବା ଏକ ସିମ୍ କାର୍ଡ ବ୍ୟବହାର କରି ସୋସିଆଲ ମିଡିଆ ଚଳାଉଛି। ଜାମ୍ମୁ କାଶ୍ମୀର ପହଲଗାମ୍ ଆତଙ୍କବାଦୀ ଆକ୍ରମଣକୁ ନେଇ ପୁରା ଦେଶ ଶୋକ ପାଳୁଥିବା ବେଳେ ଏହି ଘଟଣା ପାଇଁ ନୌଶାଦ ଲସ୍କର-ଏ-ତୋଏବା ଏବଂ ପାକିସ୍ତାନକୁ ଶୁଭେଚ୍ଛା ଜଣାଇଥିଲା।
ନୌଶାଦ ତାର ଏକ୍ସ ଆକାଉଣ୍ଟରେ ଉର୍ଦ୍ଦୁରେ ଲେଖିଥିଲା ଯେ, ଶୁଭେଚ୍ଛା ପାକିସ୍ତାନ, ଶୁଭେଚ୍ଛା ଲସ୍କର-ଏ-ତୋଏବା, ଆହ୍ଲା ତୁମକୁ ସବୁବେଳେ ଖୁସିରେ ରଖନ୍ତୁ। ଅମିନ, ଅମିନ। ଏହା ସହ ସେ ତିନୋଟି ସ୍ମାଇଲ୍ ଇମୋଜି ପଠାଇଥିଲା। ଏହି ଟ୍ଵିଟ୍ ପରେ ସୋସିଆଲ୍ ମିଡିଆରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ୟୁଜରମାନେ ଝାଡଖଣ୍ଡ ପୋଲିସକୁ ଟ୍ୟାଗ୍ କରି ଦୃଢ କାର୍ଯ୍ୟାନୁଷ୍ଠାନ ଦାବି କରିଥିଲେ। ଏହା ପୂର୍ବରୁ ମଧ୍ୟ ନୌଶାଦ ବହୁ ବିବାଦୀୟ ଟ୍ଵିଟ୍ କରିଥିଲା। ଏହି ଘଟଣାକୁ ଗମ୍ଭୀରତାର ସହ ନେଇ ଏସପି ମନୋଜ ସ୍ଵର୍ଗୀୟାରି ଏସଆଇଟି ଗଠନ କରିଥିଲେ। ବୁଧବାର ସକାଳେ ନୌଶାଦକୁ ଗିରଫ କରାଯାଇଥିଲା। ଅଭିଯୁକ୍ତକୁ ଏବେ ପଚରାଉଚରା କରାଯାଉଛି। ଖୁବଶୀଘ୍ର ତାକୁ କୋର୍ଟରେ ହାଜର କରାଯିବ।
ଏହି ଖବରଟିକୁ ପଢନ୍ତୁ-ପହଲଗାମ ଆତଙ୍କୀ ଆକ୍ରମଣ ; ସାମ୍ନାକୁ ଆସିଲା ୩ ଆତଙ୍କୀଙ୍କ ସ୍କେଚ୍
