କଣାସ, ୨୨/୦୧: ଦୟା ନଦୀର ଦୂଷିତ ପାଣି ପିଇ କଣାସରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ସ୍ଥିତି ପ୍ରତି ପ୍ରଶାସନ ତତ୍ପରତା ହୋଇଛି । ବ୍ୟାପିଥିବା ଝାଡା ବାନ୍ତିର ସ୍ଥିତି ସମୀକ୍ଷା କରି କଣାସ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପରିଦର୍ଶନ କରିଲେ ଜନସ୍ୱାସ୍ଥ୍ୟ ନିର୍ଦ୍ଦେଶକ । ସ୍ଥିତି ସମୀକ୍ଷା ପରିବା ପରେ ବର୍ତ୍ତମାନ ସ୍ଥିତି ନିୟନ୍ତ୍ରଣ ଥିବା ସହ କେସ ନମ୍ବର କମିଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ । ଏହି ସମୟରେ ପୁରୀ ସିଡିଏମ୍ଓ ଏବଂ କଣାସ ବିଡିଓ ଉପସ୍ଥିତ ରହିଥିଲେ । କଣାସ ମେଡିକାଲରେ ବେଡ଼ ଓ ମାସ୍କ ନଥିବା ନେଇ ଲୋକେ ଅଭିଯୋଗ କରିଥିଲେ । ଏ ଅଭିଯୋଗ ପରେ ପୁରୀରୁ ବେଡ଼ ପଠାଯାଇଥିବା କହିଛନ୍ତି ପୁରୀ ସିଡିଏମ୍ଓ ।
ଦୂଷିତ ନଦୀ ଜଳ ବ୍ୟବହାର କରି ଝାଡା ବାନ୍ତିରେ କଣାସରେ ୪ଜଣଙ୍କ ମୃତ୍ୟୁ ହୋଇଛି । ସରଦେଇପୁର ଠାରୁ ଚିଲିକା ଯାଏ ପ୍ରାୟ ୯୦ କିମି ପ୍ରବାହମାନ ଦୟା ନଦୀ କଡ଼ରେ ଶତାଧିକ ଗାଁ ଗଣ୍ଡା । ଜଳ ନମୁନା ପରୀକ୍ଷଣରୁ ଜଣାପଡ଼ିଛି ଯେ, କଣାସ ଅଞ୍ଚଳ ଦେଇ ପ୍ରବାହିତ ଦୟା ପାଣିଠୁ ୫୦ ଗୁଣ ଅଧିକ ପ୍ରଦୂଷିତ ପାଲଟିଛି ଉପରମୁଣ୍ଡରେ । ସରକାର କଣାସ ଅଞ୍ଚଳରେ ଦୟା ପାଣି ବ୍ୟବହାରକୁ ନିଷିଦ୍ଧ କରିଛନ୍ତି । ହେଲେ ଏହାର ଉପରମୁଣ୍ଡରେ ବାସ କରୁଥିବା ଲୋକେ ଉକ୍ତ ଘନ ପ୍ରଦୂଷିତ ଜଳକୁ ବ୍ୟବହାର କରୁଛନ୍ତି । ଫଳରେ ଏସବୁ ଅଞ୍ଚଳରେ ମଧ୍ୟ ଝାଡ଼ାବାନ୍ତି ବ୍ୟାପିବା ଆଶଙ୍କାକୁ ଏଡ଼ାଇଦେଇ ହେବନାହିଁ । ଏହାକୁ ଦୃଷ୍ଟିରେ ରଖି ସରକାର ବେଳହୁଁ ସତର୍କତା ଅବଲମ୍ବନ କରିବା ଅନିବାର୍ଯ୍ୟ ହୋଇପଡ଼ିଛି । କଣାସ ଝାଡ଼ାବାନ୍ତିର ମୁଖ୍ୟ କାରଣ ହେଉଛି ପାଣିରେ ଥିବା ମାତ୍ରାଧିକ ଇ କୋଲି ଜୀବାଣୁ । ନଦୀ ପାଣି ସମେତ ଏହାର ଅବବାହିକାରେ ଥିବା ସମସ୍ତ ଜଳାଶୟକୁ ଏହି ମାରାତ୍ମକ ଜୀବାଣୁ ମାଡ଼ିଯାଇଛନ୍ତି । ଏହାକୁ ବ୍ୟବହାର କରି ଲୋକେ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଜନସ୍ୱାସ୍ଥ୍ୟ ବିଭାଗ କହିଛି ।
