ଭୁବନେଶ୍ୱର/ରାଉରକେଲା,୧୪/୦୧: ତାମିଲନାଡୁ ଡ୍ରାଗନ୍ସ ଚଳିତ ଏଚ୍ଆଇଏଲ୍ରେ ମଚତ୍କାର ପ୍ରଦର୍ଶନ ଜାରି ରଖିଛି । ସୋମବାର ୩-୨ ଗୋଲରେ ଦିଲ୍ଲୀ ଏସ୍ଜି ପିପର୍ସକୁ ପରାଜିତ କରି ପଏଣ୍ଟ ଟେବୁଲର ଶୀର୍ଷ ସ୍ଥାନକୁ ଅଧିକ ଦୃଢ଼ କରିଛି ।
ଦିଲ୍ଲୀ ଖେଳର ଦ୍ୱିତୀୟ ମିନିଟରେ ପ୍ରଥମ ଗୋଲ୍ ଦେଇଥିଲା । ଥୋମାସ ଡୋମେନ ଏହି ଗୋଲ୍ ଦେଇ ଆରମ୍ଭରୁ ଦଳକୁ ଅଗ୍ରଣୀ କରାଇଥିଲେ । ଷଷ୍ଠ ମିନିଟ୍ରେ ଡ୍ରାଗନ୍ସର ଜିପ୍ ଜାନସେନ ଗୋଲ୍ ଦେଇ ସ୍ଥିତି ୧-୧ ଗୋଲରେ ବରାବର କରିଥିଲେ ।
ଦ୍ୱିତୀୟ କ୍ୱାର୍ଟରରେ ଡ୍ରାଗନ୍ସ ଆଉ ୨ଟି ଗୋଲ୍ ଦେବାରେ ସଫଳ ରହିଥିଲା । ୧୯ ମିନିଟରେ ନାଥନ ଏଫରାଉମସ ଏବଂ ୨୧ ମିନିଟରେ ବ୍ଲେକ ଗୋଭର୍ସ ଗୋଲ୍ ଦେଇ ଦଳର ସ୍ଥିତି ମଜବୁତ କରିଥିଲେ । ୩୭ ମିନିଟରେ (ଡୋମେନ) ଦିଲ୍ଲୀ ଦ୍ୱିତୀୟ ଗୋଲ୍ ଦେଇ ପ୍ରତ୍ୟାବର୍ତ୍ତନ କରିଥିଲା । ମାତ୍ର ପରବର୍ତ୍ତୀ ସମୟରେ ଖେଳ ପ୍ରବଳ ସଂଘର୍ଷପୂର୍ଣ୍ଣ ହେବାରୁ ଆଉ ଗୋଲ୍ ସମ୍ଭବ ହୋଇ ପାରିନଥିଲା । ଶେଷରେ ୩-୨ ଗୋଲରେ ଅଗ୍ରଣୀ ସହ ଡ୍ରାଗନ୍ସ ବିଜୟୀ ହୋଇଥିଲା ।
ସିଜନରେ ଏ ପର୍ଯ୍ୟନ୍ତ ଡ୍ରାଗନ୍ସ ୬ଟି ମ୍ୟାଚ୍ ଖେଳି ୫ଟି ବିଜୟ ସହ ମୋଟ୍ ୧୫ ପଏଣ୍ଟ ପାଇଛି । ତୁଫାନ ସମାନ ମ୍ୟାଚ୍ ଖେଳି ୧୦ ପଏଣ୍ଟ ସହ ଟେବୁଲରେ ଦ୍ୱିତୀୟ ଏବଂ ୟୁପି ରୁଦ୍ରସ ୫ଟି ମ୍ୟାଚରୁ ୯ ପଏଣ୍ଟ ପାଇ ତୃତୀୟ ସ୍ଥାନରେ ରହିଛି ।
