ଭୁବନେଶ୍ୱର ୨୪/୦୭: ସୁସ୍ଥ ରହିବା, ଓଜନ ନିୟନ୍ତ୍ରଣ କରିବା ଓ ଶରୀରକୁ ସୁଦୃଢ଼ ରଖିବା ପାଇଁ ନିୟମିତ ୱାର୍କଆଉଟ୍ ଜରୁରୀ । କିନ୍ତୁ କେବଳ ବ୍ୟାୟାମ କଲେ ହେବ ନାହିଁ । ବ୍ୟାୟାମ ପରେ ସନ୍ତୁଳିତ ଖାଦ୍ୟ, ପର୍ଯ୍ୟାପ୍ତ ପାଣି, ଭଲ ନିଦ୍ରା ଏବଂ ବିଶ୍ରାମ ମଧ୍ୟ ସେତିକି ଗୁରୁତ୍ୱପୂର୍ଣ୍ଣ । ଏହି ସମୟରେ ଶରୀର ନିଜକୁ ପୁନର୍ଗଠନ କରି ପରବର୍ତ୍ତୀ ୱାର୍କଆଉଟ୍ ପାଇଁ ପ୍ରସ୍ତୁତ କରେ ।
ବ୍ୟାୟାମ ସମୟରେ ମାଂସପେଶୀରେ ସୂକ୍ଷ୍ମ କ୍ଷତ ସୃଷ୍ଟି ହୁଏ । ବିଶ୍ରାମ ସମୟରେ ଶରୀର ସେହି କ୍ଷତକୁ ମରାମତି କରି ମାଂସପେଶୀକୁ ଅଧିକ ସୁଦୃଢ଼ କରେ । ପର୍ଯ୍ୟାପ୍ତ ବିଶ୍ରାମ ନ ମିଳିଲେ କ୍ଲାନ୍ତି ବଢ଼ିବା, ମାଂସପେଶୀରେ ଯନ୍ତ୍ରଣା ଲାଗି ରହିବା, ଆଘାତ ଲାଗିବାର ଆଶଙ୍କା ବଢ଼ିବା ଏବଂ ବ୍ୟାୟାମ କ୍ଷମତା କମିଯିବା ଭଳି ସମସ୍ୟା ଦେଖାଦେଇପାରେ । ଦୀର୍ଘଦିନ ଧରି ବିଶ୍ରାମ ବିନା ଅତ୍ୟଧିକ ବ୍ୟାୟାମ କଲେ 'ଓଭରଟ୍ରେନିଂ ସିଣ୍ଡ୍ରୋମ୍' ହେବାର ଆଶଙ୍କା ମଧ୍ୟ ରହିଥାଏ ।
ଆହୁରି ପଢ଼ନ୍ତୁ...Benefits of walking after dinner : ରାତି ଭୋଜନ ପରେ ଚାଲିବା କାହିଁକି ଜରୁରୀ ? ଜାଣନ୍ତୁ ୩ଟି ବଡ଼ କାରଣ
ବିଶ୍ରାମର ସମୟ ସମସ୍ତଙ୍କ ପାଇଁ ସମାନ ନୁହେଁ । ଏହା ବ୍ୟାୟାମର ପ୍ରକାର, ତୀବ୍ରତା, ବୟସ ଏବଂ ଶାରୀରିକ କ୍ଷମତା ଉପରେ ନିର୍ଭର କରେ । ବିଶେଷକରି ଷ୍ଟ୍ରେନ୍ଥ ଟ୍ରେନିଂ କିମ୍ବା ଅଧିକ ତୀବ୍ର ୱାର୍କଆଉଟ୍ ପରେ ଶରୀରକୁ ପୁନରୁଦ୍ଧାର ପାଇଁ ଅଧିକ ସମୟ ଲାଗିପାରେ । ତେବେ ବିଶ୍ରାମର ଅର୍ଥ ସାରାଦିନ ଶୋଇ ରହିବା ନୁହେଁ । ହାଲୁକା ଚାଲିବା, ଷ୍ଟ୍ରେଚିଂ, ଯୋଗ କିମ୍ବା ଧୀରେ ସାଇକେଲ୍ ଚଳାଇବା ଭଳି 'ଆକ୍ଟିଭ୍ ରିକଭରି' ଶରୀରକୁ ଶୀଘ୍ର ସୁସ୍ଥ ହେବାରେ ସାହାଯ୍ୟ କରେ ।
