ଅନେକ ଲୋକ ମିଠା ଖାଇବାକୁ ବେଶ ପସନ୍ଦ କରନ୍ତି । ଜନ୍ମଦିନ ହେଉକି କୌଣସି ପର୍ବପର୍ବାଣୀ, ବିଭିନ୍ନ ପ୍ରକାର ମିଷ୍ଠାନ୍ନ ପ୍ରସ୍ତୁତ ହୋଇଥାଏ ଘରେ । ହେଲେ ଏସବୁ ମିଠା ଜାତୀୟ ଖାଦ୍ୟରେ ଅଧିକ ମାତ୍ରାରେ ଚିନି ରହିଥାଏ ଯାହାକି ଆମ ସ୍ବାସ୍ଥ୍ୟ ଉପରେ ଗୁରୁତର ପ୍ରଭାବ ପକାଏ । ସାଧାରଣତଃ ଅଧିକ ମିଠା ଖାଇବାକୁ ଡାକ୍ତରମାନେ ମନା ମଧ୍ୟ କରଥାନ୍ତି । କାରଣ ଏଥିରେ ଥିବା ଚିନି ଡାଇବେଟିସ୍ ଠାରୁ ନେଇ, ଲିଭର, ହୃଦରୋଗ, ବ୍ଲଡ ପ୍ରେସର ଭଳି ଗମ୍ଭୀର ସ୍ବାସ୍ଥ୍ୟ ସମସ୍ୟାର କାରଣ ହୋଇଥାଏ । ତେବେ ଆସନ୍ତୁ ଜାଣିବା ଜଣେ ବ୍ୟକ୍ତି ଦିନକୁ କେତେ ଚିନି ଖାଇବା ଆବଶ୍ୟକ ।
ଆମେରିକା ହାର୍ଟ ଆସୋସିଏସନ ଅନୁସାରେ, ଜଣେ ପୁରୁଷ ପ୍ରତିଦିନ ୧୫୦ କ୍ୟାଲୋରୀ ଅର୍ଥାତ ୯ ଚାମଚ ଚିନି ସେବନ କରିପାରିବେ । ସେହିପରି ମହିଳା ପ୍ରତିଦିନ ୧୦୦ କ୍ୟାଲୋରୀ ଅର୍ଥାତ ୬ ଚାମଚ ଚିନି ସେବନ କରିବା ଉଚିତ୍ । ତେବେ ମହିଳାମାନଙ୍କୁ ପରାମର୍ଶ ଦିଆଯାଏ ଯେ, ସେମାନେ ଦୈନିକ ୨୫ ଗ୍ରାମରୁ ଅଧିକ ଚିନି ଖାଇବା ଉଚିତ୍ ନୁହେଁ । ସେହିପରି ଅନ୍ୟପଟେ ଆମେରିକୀୟ ଡାଏଟାରୀ ଗାଇଡଲାଇନ ଲୋକଙ୍କୁ ଦୈନିକ କ୍ୟାଲୋରୀ ସେବନର ୧୦ ପ୍ରତିଶତରୁ କମ୍ ଚିନି ଗ୍ରହଣ କରିବାକୁ ପରାମର୍ଶ ଦିଏ । ଏହି ଅନୁସାରେ ପ୍ରତିଦିନ ୨୦୦୦ କ୍ୟାଲୋରୀ ଖାଉଥିବା ବ୍ୟକ୍ତି ୫୦ ଗ୍ରାମ ଚିନି ଖାଇପାରିବେ, ଯଦି ଆପଣ ସୁସ୍ଥ ଓ ସକ୍ରିୟ ରହିଥାନ୍ତି ତ । ଧ୍ୟାନ ରଖିବା ଜରୁରୀ କି, ଯେପରି ଖାଦ୍ୟରେ ଅତିରିକ୍ତ ଚିନି ସେବନ ନ କରନ୍ତି ।
ଅଧିକ ଚିନି ଖାଉଥିଲେ ହେଉଥିଲେ ଅନେକ ସ୍ବାସ୍ଥ୍ୟ ସମସ୍ୟା ଦେଖାଦେଇଥାଏ। ଯେପରିକି,ଅଧିକ ଚିନି ଖାଇଲେ ଓଜନ ବୃଦ୍ଧି ପାଇପାରେ । ସେହିପରି ଅତ୍ୟଧିକ ଚିନି ହୃଦରୋଗ ଆଶଙ୍କା ବଢାଇଥାଏ । ଏହାସହିତ ହାଇ ବ୍ଲଡପ୍ରେସର, ଲିଭର ରୋଗ ଆଶଙ୍କା ମଧ୍ୟ ଥାଏ । ମୁହଁରେ ଦାଗ, ବ୍ରଣ ଉଠୁଥିଲେ ଅଧିକ ଚିନି ଖାଇବାରୁ ଦୂରେଇ ରୁହନ୍ତୁ । ଏହାଦ୍ବାରା ବ୍ରଣ ଓ ଚର୍ମ କୁଞ୍ଚନ ଭଳି ସମସ୍ୟା ହୋଇଥାଏ । ଚିନି ଖାଇଲେ ଟାଇପ୍-୨ ଡାଇବେଟିସ୍ ହେବାର ଆଶଙ୍କା ବୃଦ୍ଧି ପାଏ। ଅଧିକ ଚିନି ଥିବା ଖାଦ୍ୟପଦାର୍ଥ ବ୍ଲଡସୁଗାର ବଢାଇ ଶରୀରରେ ଏନର୍ଜି ସ୍ତର କମ୍ କରିପାରେ ।
