ନୂଆଦିଲ୍ଲୀ,୨୪/୦୬ :ମଧ୍ୟପ୍ରାଚ୍ୟକୁ ସମସ୍ତ ବିମାନ ଉଡାଣ ବନ୍ଦ କଲା ଏୟାର ଇଣ୍ଡିଆ। ତେହେରାନର ଗୁରୁତ୍ୱପୂର୍ଣ୍ଣ ପରମାଣୁ ପ୍ରତିଷ୍ଠାନ ଉପରେ ଇସ୍ରାଏଲର କ୍ଷେପଣାସ୍ତ୍ର ଆକ୍ରମଣ ପରେ ମଧ୍ୟପ୍ରାଚ୍ୟରେ ପ୍ରବଳ ଉତ୍ତେଜନା ରହିଛି। ଇରାନ-ଇସ୍ରାଏଲ ଯୁଦ୍ଧରେ ଆମେରିକାର ପ୍ରବେଶ ଏହି ସଂଘର୍ଷକୁ ଆଗକୁ ବଢାଇବାର ସମ୍ଭାବନାକୁ ବୃଦ୍ଧି କରିଛି। ଅନ୍ୟପଟେ ସୋମବାର ରାତିରେ ଇରାନ କତାରର ରାଜଧାନୀ ଦୋହାରେ ଥିବା ଆମେରିକାର ସବୁଠାରୁ ବଡ଼ ସାମରିକ ଘାଟି ଅଲ-ଉଦେଦ ଏୟାରବେସ ଉପରେ କ୍ଷେପଣାସ୍ତ୍ର ମାଡ଼ କରିଥିଲା। ଇରାନର ଏହି କାର୍ଯ୍ୟ ମଧ୍ୟପ୍ରାଚ୍ୟ ଦେଶଗୁଡ଼ିକର ଆକାଶପଥକୁ ପ୍ରଭାବିତ କରିଛି।
ସେହିପରି ରବିବାର ଆମେରିକୀୟ ବିମାନଗୁଡ଼ିକ ଇରାନର ପରମାଣୁ ସ୍ଥାନ ଉପରେ ବୋମା ପକାଇଥିଲେ। ଏବେ ଇରାନର ଏହି କାର୍ଯ୍ୟ ଆମେରିକା ବିରୁଦ୍ଧରେ ପ୍ରତିଶୋଧ ଭାବରେ ଦେଖାଯାଉଛି। ଇରାନ ଏୟାରବେସ ଉପରେ ୬ଟି କ୍ଷେପଣାସ୍ତ୍ର ମାଡ଼ କରିଛି। ଦୋହାରେ ଆକ୍ରମଣ ପରେ, ଅନେକ ଦେଶର ବିମାନ ଚଳାଚଳ ପ୍ରଭାବିତ ହୋଇଛି। ଏନେଇ କାତାରର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, କାତାରର ବାୟୁସେନା ଅଧିକାଂଶ କ୍ଷେପଣାସ୍ତ୍ରକୁ ପ୍ରତିହତ କରିଛି।ଇରାନର ଆକ୍ରମଣକୁ କତାର ଏହାର ସାର୍ବଭୌମତ୍ୱର ଉଲ୍ଲଂଘନ ବୋଲି କହିଛି। ଏହି ଆକ୍ରମଣ ପରେ ସମଗ୍ର ଅଞ୍ଚଳରେ ବିମାନ ଚଳାଚଳ ବାଧାପ୍ରାପ୍ତ ହୋଇଛି। ବାହାରିନ ଏବଂ କୁୱେତ ଅସ୍ଥାୟୀ ଭାବରେ ସେମାନଙ୍କର ଆକାଶ ସୀମା ବନ୍ଦ କରିଦେଇଛନ୍ତି। ଇଜିପ୍ଟ ଏୟାର ମଧ୍ୟ ଉପସାଗରୀୟ ଦେଶଗୁଡ଼ିକୁ ଏହାର ଉଡ଼ାଣକୁ ସ୍ଥଗିତ ରଖିଛି।ମଧ୍ୟପ୍ରାଚ୍ୟରେ ସଙ୍କଟକୁ ଦୃଷ୍ଟିରେ ରଖି, ଏୟାର ଇଣ୍ଡିଆ ମଧ୍ୟପ୍ରାଚ୍ୟ, ଉତ୍ତର ଆମେରିକାର ପୂର୍ବତଟ ଏବଂ ୟୁରୋପକୁ ସମସ୍ତ ବିମାନ ଉଡ଼ାଣକୁ ଅସ୍ଥାୟୀ ଭାବରେ ବାତିଲ କରିବାକୁ ଘୋଷଣା କରିଛି। ଏୟାର ଇଣ୍ଡିଆ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ସୂଚନା ଦେଇଛି ଯେ, ଉତ୍ତର ଆମେରିକାରୁ ଆସୁଥିବା ସମସ୍ତ ବିମାନ ଫେରି ଆସିଛି। କିଛି ବିମାନକୁ ଭାରତ ଆଡକୁ ସ୍ଥାନାନ୍ତର କରାଯାଇଛି ଏବଂ କିଛିକୁ ବନ୍ଦ ଆକାଶ ମାର୍ଗରୁ ପଠାଯାଇଛି।।
