ନୂଆଦିଲ୍ଲୀ,୧୩/୧୨: ଚାମ୍ପିଅନ୍ସ ଟ୍ରଫି ୨୦୨୫ କୁ ଏବେ ସବୁକିିଛି ସ୍ପଷ୍ଟ ହେବା ପରି ମନେହୁଏ। ଏହି ଟୁର୍ଣ୍ଣାମେଣ୍ଟ ପାଇଁ 'ହାଇବ୍ରିଡ୍ ମଡେଲ୍' ଅନୁମୋଦନ ହୋଇଥିବା ରିପୋର୍ଟରେ ଦର୍ଶାଯାଇଛି। ହାଇବ୍ରିଡ ମଡେଲ ଅଧୀନରେ ଚାମ୍ପିଅନ୍ସ ଟ୍ରଫି କରିବାକୁ ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ରାଜି ହୋଇଛି। ଏହା ବ୍ୟତୀତ ଆଇସିସି ପାକିସ୍ତାନ ବୋର୍ଡର ଏକ ବଡ଼ ସର୍ତ୍ତକୁ ମାନି ନେଇଛି।
'ସ୍ପୋର୍ଟସ୍ ଟକ୍'ରେ ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ ବିସିସିଆଇ ଏବଂ ପାକିସ୍ତାନ କ୍ରିକେଟ୍ ବୋର୍ଡ ମଧ୍ୟରେ ଚୁକ୍ତିନାମା ପରେ ନିଷ୍ପତ୍ତି ନିଆଯାଇଥିବା ଚାମ୍ପିଅନ୍ସ ଟ୍ରଫି ମ୍ୟାଚ୍ ପାକିସ୍ତାନ ଏବଂ ଦୁବାଇରେ ହାଇବ୍ରିଡ୍ ମଡେଲ୍ ଅଧୀନରେ ଖେଳାଯିବ। ଟୁର୍ଣ୍ଣାମେଣ୍ଟରେ ଟିମ୍ ଇଣ୍ଡିଆର ମ୍ୟାଚ୍ ଦୁବାଇରେ ଅନୁଷ୍ଠିତ ହେବ।
ପାକିସ୍ତାନ ଚାମ୍ପିଅନ୍ସ ଟ୍ରଫିର ୧୦ ଟି ମ୍ୟାଚ୍ ଆୟୋଜନ କରିବ। ଲିଗ୍ ପର୍ଯ୍ୟାୟରେ ଭାରତର ସମସ୍ତ ତିନୋଟି ମ୍ୟାଚ୍ ଦୁବାଇରେ ଖେଳାଯିବ। ଭାରତର ଲିଗ୍ ମ୍ୟାଚ୍ ବ୍ୟତୀତ ଟୁର୍ନାମେଣ୍ଟର ସେମିଫାଇନାଲ ଏବଂ ଫାଇନାଲ୍ ମ୍ୟାଚ୍ ମଧ୍ୟ ଦୁବାଇରେ ଅନୁଷ୍ଠିତ ହେବ। ଯଦି ନକ୍ଆଉଟ୍ ପର୍ଯ୍ୟାୟ ପୂର୍ବରୁ ଟିମ୍ ଇଣ୍ଡିଆ ବାଦ୍ପଡ଼େ, ତେବେ ସେମିଫାଇନାଲ ଏବଂ ଫାଇନାଲ ଲାହୋର ଏବଂ ରାୱଲପିଣ୍ଡିରେ ଅନୁଷ୍ଠିତ ହେବ।
ରିପୋର୍ଟରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ପାକିସ୍ତାନ କ୍ରିକେଟ୍ ବୋର୍ଡ ଆଇସିସି ପକ୍ଷରୁ ଦାବି କରିଛି ଯେ ଯଦି ଭାରତୀୟ ଦଳ ପାକିସ୍ତାନ ଗସ୍ତ କରିବାକୁ ମନା କରନ୍ତି, ତେବେ ସେମାନଙ୍କୁ କ୍ଷତିପୂରଣ ଦେବାକୁ ପଡ଼ିବ। କ୍ଷତିପୂରଣ ଦାବିକୁ ଆଇସିସି ପ୍ରତ୍ୟାଖ୍ୟାନ କରିଛି।
