ନୂଆଦିଲ୍ଲୀ, ୩୦/୧୧: ବୁଝୁନି ପିସିବି । ପାକିସ୍ତାନକୁ ଜିଦ୍ ପଡିପାରେ ମହଙ୍ଗା । ଚମ୍ପିଆନ୍ସ ଟ୍ରଫିରୁ ବିଦା ହୋଇପାରେ ପାକିସ୍ତାନ । ପୁଣି ବିସିସିଆଇ ଓ ପିସିବିକୁ ସମୟ ଦେଇଛି ଆଇସିସି । ଦୁଇ ଦିନ ଭିତରେ ସମାଧାନ ବାଟ ବାହାରି ପାରେ । ନିଷ୍ପତ୍ତିକୁ ମାନି ଯାଅ ନଚେତ ହାତରୁ ଖସି ଯାଇପାରେ ଚମ୍ପିଆନ୍ସ ଟ୍ରଫି । ପାକିସ୍ତାନ କ୍ରିକେଟ ବୋର୍ଡକୁ ଅଲଟିମେଟ୍ ଦେଇଛି ଆଇସିସି ।

ଆଇସିସି ପାକିସ୍ତାନକୁ ଦେଲା ଅଲଟିମେଟ୍

ଆଇସିସ ଚମ୍ପିଆନ୍ସ ଟ୍ରଫିର ୧୦୦ ଦିନ ପୂର୍ବରୁ କ୍ରୀଡା ସୂଚୀ ଚୂଡାନ୍ତ ହେବା କଥା । ମାତ୍ର ଏ ଯାଏଁ ଆଇସିସି ସୂଚୀ ଘୋଷଣା କରି ନାହିଁ । ଆୟୋଜକ ପାକିସ୍ତାନ କ୍ରିକେଟ ବୋର୍ଡ ନିଜ ଜିଦରେ ଅଟଳ  ରହିଛି । ପୁଣି ପିସିବି ଓ ବିସିସିଆଇକୁ ବୁଝାମାଣା ପାଇଁ ସମୟ ଦେଇଛି ଆଇସିସି । ଆସନ୍ତା ଦୁଇ ଦିନ ଭିତରେ ସମାଧାନ ବାହାରିବ ବୋଲି ଆଶା କରାଯାଉଛି । ଏଥର ୨୦୨୫ ଚମ୍ପିଆନ୍ସ ଟ୍ରଫି ପାକିସ୍ତାନ ଆୟୋଜନ କରୁଛି । ଆସନ୍ତା ଫେବୃଆରୀ ୧୯ରୁ ଲାହୋର, କରାଚୀ ଓ ରାୱଲପିଣ୍ଡିରେ ଟୁର୍ଣ୍ଣାମେଣ୍ଟ ଖେଳାଯିବ । କିନ୍ତୁ ଭାରତ ପାକିସ୍ତାନ ଯିବ ନାହିଁ ବୋଲି ବିସିସିଆଇ ସ୍ପଷ୍ଟ କରିଛି । 

ତେବେ ଏ ନେଇ ହାଇବ୍ରିଡ ଫର୍ମୁଲା ଆପଣାଯାଇପାରେ ବୋଲି ଆଲୋଚନା ହେଉଛି । ହାଇବ୍ରିଡ ଫର୍ମୁଲାରେ ଚମ୍ପିଆନ୍ସ ଟ୍ରଫି ଟୁର୍ଣ୍ଣାମେଣ୍ଟ କରିବାକୁ ଆଇସିସି ଯୋଜନା କରୁଛି । କିନ୍ତୁ ପିସିବି ଅଧ୍ୟକ୍ଷ ନକଭି ଏହା ସପକ୍ଷରେ ନାହାନ୍ତି । ପାକିସ୍ତାନରେ ଟୁର୍ଣ୍ଣାମେଣ୍ଟ ଖେଳାଯାଉ ବୋଲି ଜିଦରେ ଅଟଳ ରହିଛନ୍ତି  । ଅନ୍ୟ ଦଳ ହାଇବ୍ରିଡ ଫର୍ମୁଲା ପାଇଁ ରାଜି ଅଛନ୍ତି । ଯଦି ପାକିସ୍ତାନ ରାଜି ନହୁଏ ତେବେ ଚମ୍ପିଆନ୍ସ ଟ୍ରଫିରୁ ବାଦ ପଡିପାରେ ବୋଲି ଆଇସିସି ଅଲଟିମେଟ  ଦେଇଛି ।

କୋଟି ଟଙ୍କାର କ୍ଷତି ସହିବ ପିସିବି- ବର୍ତ୍ତମାନ ଚମ୍ପିଆନ୍ସ ଟ୍ରଫି ପାଇଁ ହାଇବ୍ରିଡ ଫର୍ମୁଲା ହିଁ ଏକମାତ୍ର ସମାଧାନ ବାଟ । ଯଦି ଟୁର୍ଣ୍ଣାମେଣ୍ଟକୁ ସ୍ଥଗିତ କରାଯାଏ ତେବେ ପିସିବିକୁ ୬୦ ଲକ୍ଷ ଡଲାର ( ୫୦ କୋଟି)ର କ୍ଷତି ସହିବାକୁ ପଡିବ । ଯଦି ପାକିସ୍ତାନ ହାତରୁ ଟୁର୍ଣ୍ଣାମେଣ୍ଟ ଖସିଯାଏ ତେବେ ପୁରା ଟୁର୍ଣ୍ଣାମେଣ୍ଟ ଦୁବାଇ କିମ୍ବା ଅନ୍ୟ ସ୍ଥାନରେ ଖେଳାଯାଇପାରେ ବୋଲି ଆଲୋଚନା ହେଉଛି ।