ଇନ୍ଦୋର, ୦୭/୧୦: ଚଳିତ ମହିଳା ଦିନିକିଆ ବିଶ୍ୱକପ୍ରେ ଦକ୍ଷିଣ ଆଫ୍ରିକା ବିଜୟ ଖାତା ଖୋଲିଛି । ସୋମବାର ଅନୁଷ୍ଠିତ ସପ୍ତମ ଲିଗ୍ ମ୍ୟାଚ୍ରେ ଦଳ ୬ ୱିକେଟରେ ନ୍ୟୁଜିଲାଣ୍ଡକୁ ପରାସ୍ତ କରିଥିଲା । ବାମ ହାତି ସ୍ପିନର ନନ୍କୁଲୁଲେକୋ ମ୍ଳାବାଙ୍କ ଘାତକ ବୋଲିଂ ସାଙ୍ଗକୁ ଓପନର ତାଜମିନ ବ୍ରିଟ୍ସଙ୍କ ଶତକ ଓ ସୁନି ଲସ୍ଙ୍କ ଅପରାଜିତ ଅର୍ଦ୍ଧଶତକ ବଳରେ ଦଳର ବିଜୟ ସହଜ ହୋଇଥିଲା । ସପ୍ତମ ଦିନିକିଆ ଶତକ ଅର୍ଜନ କରିଥିବା ତାଜ୍ମିନ ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲା ।
ଇଂଲଣ୍ଡ ବିପକ୍ଷ ପ୍ରଥମ ମ୍ୟାଚ୍ରେ ଦକ୍ଷିଣ ଆଫ୍ରିକା ୧୦ ୱିକେଟରେ ଶୋଚନୀୟ ଭାବେ ପରାଜିତ ହୋଇଥିଲା । ଏହି ମ୍ୟାଚ୍ରେ ଦଳ ମାତ୍ର ୬୯ରନ୍ରେ ଅଲଆଉଟ୍ ହୋଇଥିଲା । ମାତ୍ର ସୋମବାର ନ୍ୟୁଜିଲାଣ୍ଡ ବିପକ୍ଷରେ ଦଳ ସବୁ ବିଭାଗରେ ଚମକପ୍ରଦ ପ୍ରଦର୍ଶନ ସହ ପଏଣ୍ଟ ଖାତା ଖୋଲିଛି । ଟସ୍ ଜିତି ନ୍ୟୁଜିଲାଣ୍ଡ ବ୍ୟାଟିଂ କରି ୪୭.୫ ଓଭରରେ ୨୩୧ରନ୍ କରି ଅଲଆଉଟ୍ ହୋଇଥିଲା । ପ୍ରଥମ ମହିଳା ବ୍ୟାଟର ଭାବେ ୩୫୦ ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ଓପନର ସୁଜି ବେଟ୍ସ ଆଜି ଖାତା ଖୋଲି ପାରିନଥିଲେ । ଅନ୍ୟମାନଙ୍କ ମଧ୍ୟରେ ଜର୍ଜିଆ ପ୍ଲିମର ୩୧, ଆମେଲିଆ କେର ୨୩, ଅଧିନାୟିକା ସୋଫି ଡିଭାଇନ୍ ୮୫ (୯ଚୌକା), ବ୍ରୁକ ହାଲିଡେ ୪୫ (୬ଚୌକା) ରନ୍ ସଂଗ୍ରହ କରିଥିଲେ । ଦକ୍ଷିଣ ଆଫ୍ରିକା ପକ୍ଷରୁ ମ୍ଳାବା ୪୦ରନ୍ ପ୍ରଦାନ କରି ୪ଟି ୱିକେଟ୍ ଅକ୍ତିଆର କରିଥିଲେ ।
୨୩୨ରନ୍ ବିଜୟ ଲକ୍ଷ୍ୟର ପିଛା କରି ଦକ୍ଷିଣ ଆଫ୍ରିକା ୫୫ଟି ବଲ୍ ବାକି ଥାଇ ୪ ୱିକେଟ୍ ବିନିମୟରେ ଆବଶ୍ୟକ ରନ୍ ସଂଗ୍ରହ କରି ନେଇଥିଲା । ଅଧିନାୟିକା ଲାଉରା ଉଲଭାର୍ଟ (୧୪) ସହଳ ପାଭିଲିୟନ ଫେରିଥିଲେ । ମାତ୍ର ଅନ୍ୟ ଓପନର ତାଜମିନ୍ଙ୍କ ସହ ମିଶି ଲସ୍ ଦୃଢ଼ ବ୍ୟାଟିଂ କରିଥିଲେ । ତାଜମିନ ୮୭ଟି ବଲ୍ରେ ଶତକ ପୂରଣ କରିଥିଲେ । ଏହାପରେ ସେ ଧୈର୍ଯ୍ୟ ହରାଇଥିଲେ । ତାଜମିନ ୧୦୧ (୧୫ଚୌକା, ୧ଛକା) ରନ୍ କରି ଆଉଟ୍ ହୋଇଥିଲେ । ପରେ ପରେ ଦଳ ଆଉ ୨ଟି ୱିକେଟ୍ ହରାଇଥିଲେ ମଧ୍ୟ ଲସ୍ ଅପରାଜିତ ରହି ଦଳକୁ ଜିତାଇଥିଲେ । ସେ ୧୦ଚୌକା, ୧ଛକା ବଳରେ ୮୩ରନ୍ କରିଥିଲେ।
