ପୁରୀ,୨୪/୦୨: ଆଧ୍ୟାତ୍ମିକ ସହର ଶ୍ରୀକ୍ଷେତ୍ରକୁ ଧୀରେ ଧୀରେ କଳୁଷିତ କରୁଛି କିଛି ଅନୈତିକ କାରବାର । ଗତ କିଛି ବର୍ଷ ହେବ ଏହି ଅନୈତିକ କାରବାର ତାହାର ଚେର ବିସ୍ତାର କରିବାରେ ଲାଗିଛି । ଏହାକୁ ନେଇ ବୁଦ୍ଧିଜୀବୀମାନେ ଚିନ୍ତା ପ୍ରକଟ କରିଥିଲେ ସୁଦ୍ଧା ପୁଲିସ ରୋକିବାରେ ବିଫଳ ହେଉଛି । ଏସ୍କର୍ଟ ସର୍ଭିସ ନାମରେ କାୟା ବିସ୍ତାର କରି ଚାଲିଛି ଏହି ଅନୈତିକ କାରବାର । ଅନ୍ଲାଇନ୍ରେ ଚାଲୁଛି ଏହି ଏସ୍କର୍ଟ ସର୍ଭିସ । ନିର୍ଦ୍ଦିଷ୍ଟ କିଛି ଲୋକଙ୍କୁ ଜଣା ଏହି ଏସ୍କର୍ଟ ସର୍ଭିସ୍ ବାବାଦରେ । ଏହି ନାଁ କାହାରି ମନକୁ ସନ୍ଦେହ ଆସିବ ନାହିଁ । ଏହି ନାଁ ଆଳରେ ଚାଲିଛି ଦେହ ବେପାର । ଏଭଳି ର୍ୟାକେଟ୍ ଚଳାଉଛନ୍ତି ସ୍ୱତନ୍ତ୍ର କିଛି ଦଲାଲ୍ । ବଡ଼ ବଡ଼ ସହରରେ ବହୁ ଆଗରୁ ଏହି ଏସ୍କର୍ଟ ସର୍ଭିସ ଚାଲିଛି । ଗତ କିଛି ମାସ ହେବ ଏହି ସର୍ଭିସ ଏବେ ପୁରୀକୁ କବଳିତ କରିଗଲାଣି । ପୁରୀ ତୀର୍ଥସ୍ଥଳ ହୋଇଥିବାରୁ ଏଠାରେ ଛୋଟ ବଡ଼ ହୋଇ ୭୦୦ରୁ ଉଦ୍ଧ୍ୱର୍ ହୋଟେଲ ବ୍ୟତୀତ ଶତାଧିକ ଲଜ୍ ଓ ଗେଷ୍ଟହାଉସ ରହିଛି ।
ୱେବ୍ସାଇଟ୍ରେ ଏହି ନାମରେ ଖୋଜିଲେ ପୁଳା ପୁଳା ସାଇଟ୍ ରହିଛି । ଏଭଳି କି ଓଡ଼ିଆରେ ମଧ୍ୟ ଅନେକ ରୂପଜୀବୀଙ୍କ ସହିତ ସେମାନଙ୍କର ସମ୍ପୂର୍ଣ୍ଣ ଯୋଗାଯୋଗ ତଥ୍ୟ ଉପଲବ୍ଧ ହେଉଛି । କିଛି ରୂପଜୀବୀଙ୍କୁ ଦଲାଲ୍ଙ୍କ ମାଧ୍ୟମରେ ଯୋଗାଯୋଗ କରିବାକୁ ବି ହୋଇାଏ । ଗ୍ରାହକମାନେ ଫଟୋ ଦେଖି ନିଜ ପସନ୍ଦର ରୂପଜୀବୀ ବାଛିଥାନ୍ତି । ସବୁକିଛି କିଛି ଅନ୍ଲାଇନ୍ ମାଧ୍ୟମରେ ହୋଇଥାଏ । ଅନେକ ରୂପଜୀବୀ ଦଲାଲ୍ଙ୍କ ମାଧ୍ୟମରେ ଯୋଗାଯୋଗ କରି କ୍ୟୁଆର୍ କୋର୍ଡ ପଠାଇ ଟଙ୍କା ନେଇଥାନ୍ତି । ଏହି କାରବାର ସରିବା ପରେ କାର୍ ଯୋଗେ ଗ୍ରାହକଙ୍କୁ ନେଇ ରୂପଜୀବୀଙ୍କ ପାଖରେ ପହଞ୍ଚାଇ ଦେଉଛନ୍ତି ଦଲାଲ୍ । ନଚେତ୍ ଗ୍ରାହକ ରହୁଥିବା ହୋଟେଲ୍ରେ ମଧ୍ୟ ରୂପଜୀବୀଙ୍କୁ ନେଇ ପହଞ୍ଚାଇ ଦେଇଥାନ୍ତି ଦଲାଲ । କେତେକ ହୋଟେଲ୍ରେ ଜମୁଛି ଏହି ଅନୈତିକ କାରବାର । ହୋଟେଲ୍ରେ ଅନେକ ସମୟରେ ଗ୍ରାହକ ମଧ୍ୟ ଠକାମିର ଶିକାର ହୋଇଥାନ୍ତି । ପସନ୍ଦ କରିଥିବା ରୂପଜୀବୀ ବଦଳରେ ଅନ୍ୟ ଜଣଙ୍କୁ ନେଇ ଦଲାଲ୍ ପହଞ୍ଚୁଛନ୍ତି । ଠକାମିରେ ପଡ଼ିଲେ ବି ଗ୍ରାହକ ମୁହଁ ଖୋଲନ୍ତି ନାହିଁ । ଅନେକ ସମୟରେ ମଧ୍ୟ ଗ୍ରାହକ ଲୁଟ୍ର ଶିକାର ହେଉଛନ୍ତି । ରୂପଜୀବୀ ମାଧ୍ୟମରେ ଦଲାଲ୍ମାନେ ଗ୍ରାହକଙ୍କଠାରୁ ଲୁଟ୍ପାଟ୍ କରୁଥିବା ଖବର ମିଳିଛି । କିଛି ଗ୍ରାହକ ମଧ୍ୟ କ୍ୟୁଆର୍ କୋର୍ଡରେ ଟଙ୍କା ଦେବା ପରେ ଏସ୍କର୍ଟ ସର୍ଭିସ୍ ପାଇବାରୁ ବଞ୍ଚିତ ହେଉଥିବା ନଜରକୁ ଆସିଛି । ଗତ ବୁଧବାର ବଳିଆପଣ୍ଡା ଅଞ୍ଚଳର ଏକ ହୋଟେଲ୍ରେ ଥିବା ତାଳଚେରର ଜଣେ ଯୁବକ ଏହି ଏସ୍କର୍ଟ ସର୍ଭିସରେ ଟଙ୍କା ପସନ୍ଦ କରି ଅଗ୍ରିମ ଟଙ୍କା ପଠାଇଥିଲେ । କିନ୍ତୁ ପରେ ତାଙ୍କୁ କୌଣସି ସୁବିଧା ମିଳିନଥିଲା । ପରେ ଯୋଗାଯୋଗ କରି ଶେଷରେ ନିରାଶ ହୋଇଥିଲେ । ରାଜ୍ୟ ବାହାରରୁ ଆସୁଥିବା ଅନେକ ପର୍ଯ୍ୟଟକ ଏହି ଅନୈତିକ କାରବାର ଜାଲରେ ଛନ୍ଦି ହୋଇ ଠକାମି ପଡୁଥିବା ନଜରକୁ ଆସିଛି ।
ଅଫ୍ଲାଇନ୍ ବେପାର ବି ଅଣାୟତ୍ତ
ପୁରୀକୁ ଆସୁଥିବା ଅନେକ ପର୍ଯ୍ୟଟକ ନିଶା ଓ ଅନୈତିକ କାର୍ଯ୍ୟ କରିବାକୁ ପସନ୍ଦ କରୁଥିବା ଜଣେ ପୁଲିସ ଅଧିକାରୀ କହିଛନ୍ତି । ଧାର୍ମିକ ସହର ଏବେ ଅଧିକ ପର୍ଯ୍ୟଟନ ସହର ହୋଇପଡ଼ିଛି । ଜନବହୁଳ ରହୁଥିବାରୁ ଏଠାରେ କାହା ଉପରେ ନଜର ରଖିବା ମୁସ୍କିଲ୍ । ନିଶାଦ୍ରବ୍ୟ ସହଜରେ ଉପଲବ୍ଧ ହେଉଥିବା ସହ ଏସ୍କର୍ଟ ସର୍ଭିସ କାୟା ବିସ୍ତାର କରିଥିବାରୁ ପର୍ଯ୍ୟଟକମାନେ ଏଠାକୁ ଆସୁଥିବା କହିଛନ୍ତି ସାମାଜିକ କର୍ମୀ ତଥା କଂଗ୍ରେସ ନେତା ସ୍ୱାଧୀନ ପଣ୍ଡା । ପୁରୀରେ ବିନା କାଗଜପତ୍ର ତଥା ବିନା ଅନୁମତିରେ ଛତୁ ଫୁଟିଲା ଭଳି ହୋଟେଲ୍ ଓ ଲଜ୍ ରହିଛି । ଯେଉଁଠାରେ ଏସବୁକୁ ବେଶୀ ପ୍ରେତ୍ସାହନ ଦିଆଯାଉଛି । ଏସବୁ କାର୍ଯ୍ୟରେ ଗ୍ରାହକଙ୍କଠାରୁ ଶୋଷଣ କରିବା ସହଜ ବୋଲି କିଛି ମାଲିକ କିମ୍ବା ଲିଜ୍ ଧାରୀ ଏହି ବେଆଇନ୍ ଧନ୍ଦାକୁ ଆପଣାଇଛନ୍ତି । ଏକ ପ୍ରକାର ର୍ୟାକେଟ୍ ଏଥିପାଇଁ କାର୍ଯ୍ୟ କରୁଛି । ଏଥିରେ ହୋଟେଲ୍ର କର୍ମଚାରୀ ବି ସାଲ୍ ରହୁଛନ୍ତି । ସ୍ୱଳ୍ପ ସମୟର ପ୍ୟାକେଜ୍ ମାଧ୍ୟମରେ ଭଲ ଅର୍ଥ ରୋଜଗାର କରୁଛନ୍ତି । ଦିନକୁ ଦିନ ଏହା ଅଣାୟତ୍ତ ହୋଇ ଚାଲିଥିବା ଶ୍ରୀ ପଣ୍ଡା କହିଛନ୍ତି ।
ନିକଟରେ ଏକ ସେକ୍ସ ର୍ୟାକେଟ୍ରେ ନାବାଳିକାଙ୍କୁ ନିୟୋଜିତ କରାଯାଉଥିବା ଜଣାପଡିଥିଲା । ସେହିପରି କେତେକ ହୋଟେଲ୍ର କର୍ମଚାରୀଙ୍କ ସହ ଦଲାଲଙ୍କୁ ପୁଲିସ ଗିରଫ କରିଥିଲା । ପ୍ରାୟତଃ ସାମାଜିକ ଗଣମାଧ୍ୟମ ଜରିଆରେ ଏସବୁ କାର୍ଯ୍ୟ ଚାଲୁଛି । ଯଦି କେତେବେଳେ ଚଢ଼ଉ ହେଉଛି ତେବେ ଧରାପଡ଼ୁଥିବା ପୁଅଝିଅ ଲିଭ୍ ଇନ୍ ରିଲେସନ୍ରେ ଥିବା କହି ଖସୁଛନ୍ତି । ଏଭଳି କ୍ଷେତ୍ରରେ ଦେହକାରବାରକୁ ପ୍ରମାଣିତ କରାଇବା କଷ୍ଟକର ବୋଲି ଜଣେ ପୁଲିସ ଅଧିକାରୀ କହିଛନ୍ତି । ତଥାପି ଏଭଳି ଅନେକ ନିର୍ଦ୍ଦିଷ୍ଟ ହୋଟେଲ୍କୁ ଚିହ୍ନଟ କରାଯାଇଛି । ଖୁବ୍ଶୀଘ୍ର ଏହି ହୋଟେଲ୍ ଓ ଲଜ୍ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ତେବେ ଏସମ୍ପର୍କରେ ଅତିରିକ୍ତ ଏସ୍ପି ସୁଶୀଲ ମିଶ୍ର କହିଛନ୍ତି, ଏକ ସ୍ୱତନ୍ତ୍ର ଆପ୍ ଯୋଗେ ସମସ୍ତ ହୋଟେଲ୍ ଓ ଲଜ୍ମାନଙ୍କ ଉପରେ ନଜର ରଖାଯିବ । ଯାହା ଫଳରେ ଏହି କାରବାରକୁ ନିୟନ୍ତ୍ରଣ କରାଯାଇପାରିବ । ଏସ୍ପି ଏବେ ଏହାକୁ ଗୁରୁତର ଭାବେ ନେଇ ଦୃଷ୍ଟି ଦେଇଥିବା ସେ କହିଛନ୍ତି ।
