ନୂଆଦିଲ୍ଲୀ,୨୦/୧୨: ଯଦି ଆପଣ ବେଆଇନ ଭାବେ କିଛି କୋଠାବାଡି କିମ୍ବା ଘର ନିର୍ମାଣ କାର୍ଯ୍ୟ କରୁଛନ୍ତି ତେବେ ସାବଧାନ । କାରଣ ଏଭଳି ବେଆଇନ ଘରକୁ ଭାଙ୍ଗି ଦିଆଯିବ । ନିକଟରେ ସୁପ୍ରିମକୋର୍ଟ ଏଭଳି ନିର୍ଦ୍ଦେଶନାମା ଜାରି କରିଛନ୍ତି ।
କେବଳ ଏତିକି ନୁହେଁ, ଅକ୍ୟୁପାନ୍ସି ସାର୍ଟିଫିକେଟ (ଓସି) ନଥିଲେ ସମ୍ପୃକ୍ତ ଘରକୁ ପାଣି, ବିଜୁଳି କିମ୍ବା ସ୍ୱେରେଜ ସଂଯୋଗ ମଧ୍ୟ ମିଳିବ ନାହିଁ । ଏଥିସହ ବେଆଇନ ନିର୍ମାଣ କାର୍ଯ୍ୟ ପାଇଁ ଦାୟୀ ସରକାରୀ ଅଧିକାରୀଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ମଧ୍ୟ ନିଆଯିବ । ମୀରଟରେ ଏକ ଆବାସିକ ଅଞ୍ଚଳରେ ଚାଲିଥିବା ବେଆଇନ ନିର୍ମାଣକୁ ଭାଙ୍ଗିବା ଲାଗି ଆହ୍ଲାବାଦ ହାଇକୋର୍ଟ ଦେଇଥିବା ଆଦେଶକୁ ଚାଲେଞ୍ଜ କରି ଆଗତ ଏକ ରିଟ୍ ପିଟିସନ ଉପରେ ଶୁଣାଣି କରି ସୁପ୍ରିମକୋର୍ଟ ଏଭଳି କଡା ଆଭିମୁଖ୍ୟ ଗ୍ରହଣ କରିଛନ୍ତି ।
ଏଥିସହ ବେଆଇନ ନିର୍ମାଣ ଭଙ୍ଗାଯିବା ମାମଲାରେ ରାୟ ଦେବା ବେଳେ ସର୍ବୋଚ୍ଚ ଅଦାଲତଙ୍କ ଏହି ନିର୍ଦ୍ଦେଶ ପାଳନ କରିବାକୁ ଖଣ୍ଡପୀଠ ସବୁ ହାଇକୋର୍ଟମାନଙ୍କୁ ଏହି ରାୟର ଗୋଟିଏ ଲେଖାଏ କପି ପଠାଯିବା ଲାଗି ନିର୍ଦ୍ଦେଶ ଦେଇଛନ୍ତି । ଆବାସିକ କିମ୍ବା ବ୍ୟବସାୟିକ ସ୍ଥାନରେ ବେଆଇନ ଭାବେ କୌଣସି ନିର୍ମାଣ କରାଯାଉଛି କି ନାହିଁ ମ୍ୟୁନିସିପାଲିଟି ତାର ତଦାରଖ କରିବ । ସେପଟେ ରିୟଲ ଇଷ୍ଟେଟ ଆସୋସିଏସନ କହିଛି ରେରା (ରିୟଲ ଇଷ୍ଟେଟ ରେଗୁଲେନ ଆକ୍ଟ) ଲାଗୁ ହେବା ପରେ ବିନା ଆକ୍ୟୁପାନ୍ସି ସାର୍ଟିଫିକେଟରେ ଆବାସିକ ପ୍ରକଳ୍ପ ହସ୍ତାନ୍ତର କରିବା ସମ୍ଭବ ନୁହେଁ । ପୂର୍ବରୁ ବିନା ଅକ୍ୟୁପାନ୍ସ ସାର୍ଟିଫିକେଟରେ ଆବାସିକ ପ୍ରକଳ୍ପ ହୋଇଛି।
