ନୂଆଦିଲ୍ଲୀ, ୧୭।୩: ଭାରତକୁ ୫ ଦିନିଆ ଗସ୍ତରେ ଆସିଛନ୍ତି ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସନ । ପୂର୍ବରୁ ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଏକାଧିକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଛି । ଏବେ ଉଭୟ ଦେଶ ମଧ୍ୟରେ ଏକ ପ୍ରତିରକ୍ଷା ସହଯୋଗ ଚୁକ୍ତିନାମା ସ୍ୱାକ୍ଷରିତ ହୋଇଛି । ପ୍ରଧାନମନ୍ତ୍ରୀ ମୋଦି କହିଲେ ଆମେ ଏକାଠି କାମ କରିବୁ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସନଙ୍କ ମଧ୍ୟରେ ଆଲୋଚନା ପରେ ଏକ ପ୍ରତିରକ୍ଷା ସହଯୋଗ ଚୁକ୍ତିନାମା ସ୍ୱାକ୍ଷର କରିଛନ୍ତି । ଏହା ପରେ ପ୍ରଧାନମନ୍ତ୍ରୀ ମୋଦି ଗଣମାଧ୍ୟମ ସହ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, "ଆଜି ଆମର ଦ୍ୱିପାକ୍ଷିକ ସମ୍ପର୍କର ବିଭିନ୍ନ ଦିଗ ଉପରେ ଆମେ ବିସ୍ତୃତ ଆଲୋଚନା କରିଛୁ । ଆମେ ଆମର ପ୍ରତିରକ୍ଷା ଏବଂ ସୁରକ୍ଷା ସହଭାଗୀତାକୁ ମଜବୁତ ଏବଂ ପ୍ରତିଷ୍ଠାନଗତ କରିବାକୁ ନିଷ୍ପତ୍ତି ନେଇଛୁ । ମିଳିତ ଅଭ୍ୟାସ, ତାଲିମ ଏବଂ ପ୍ରତିରକ୍ଷା ଶିଳ୍ପରେ ପାରସ୍ପରିକ ସହଯୋଗ ପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରାଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, "ଦୁଇ ଦେଶ ମଧ୍ୟରେ ଏକ ପାରସ୍ପରିକ ଲାଭଦାୟକ ମୁକ୍ତ ବାଣିଜ୍ୟ ଚୁକ୍ତିନାମା ଉପରେ ଆଲୋଚନା ଆରମ୍ଭ କରିବାକୁ ନିଷ୍ପତ୍ତି ନିଆଯାଇଛି । ଏହା ପାରସ୍ପରିକ ବାଣିଜ୍ୟ ଏବଂ ନିବେଶର ସମ୍ଭାବନାକୁ ଆହୁରି ବୃଦ୍ଧି କରିବ । ଦୁଗ୍ଧ, ଖାଦ୍ୟ ପ୍ରକ୍ରିୟାକରଣ ଏବଂ ଔଷଧ ଭଳି କ୍ଷେତ୍ରରେ ପାରସ୍ପରିକ ସହଯୋଗ ଏବଂ ନିବେଶକୁ ପ୍ରୋତ୍ସାହିତ କରାଯିବ ।" ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, ଭାରତ ଏବଂ ନ୍ୟୁଜିଲ୍ୟାଣ୍ଡ ଅବୈଧ ପ୍ରବାସ ସମସ୍ୟାର ମୁକାବିଲା ପାଇଁ ଏକ ଚୁକ୍ତିନାମା ପ୍ରସ୍ତୁତ କରିବା ଦିଗରେ କାର୍ଯ୍ୟ କରିବେ । ଆତଙ୍କବାଦ ଉପରେ ଆମର ସମାନ ମତ ରହିଛି ।
ମୋଦି ଆହୁରି କହିଛନ୍ତି, ୧୫ ମାର୍ଚ୍ଚ ୨୦୧୯ରେ କ୍ରାଏଷ୍ଟଚର୍ଚ୍ଚରେ ହୋଇଥିବା ଆତଙ୍କବାଦୀ ଆକ୍ରମଣ ହେଉ କିମ୍ବା ମୁମ୍ବାଇ ୨୬/୧୧, ଆତଙ୍କବାଦ ପ୍ରତ୍ୟେକ ପ୍ରକାରରେ ଗ୍ରହଣୀୟ ନୁହେଁ । ଆତଙ୍କବାଦୀ ଆକ୍ରମଣ ପାଇଁ ଦୋଷୀମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଆବଶ୍ୟକ । ଆମେ ଆତଙ୍କବାଦୀ, ବିଚ୍ଛିନ୍ନତାବାଦୀ ଏବଂ ଉଗ୍ରବାଦୀ ତତ୍ତ୍ୱମାନଙ୍କ ବିରୁଦ୍ଧରେ ଏକାଠି କାମ କରିବୁ । ଆମେ ନ୍ୟୁଜିଲ୍ୟାଣ୍ଡରେ ଭାରତ ବିରୋଧୀ କାର୍ଯ୍ୟକଳାପ ବିଷୟରେ ଆମର ଚିନ୍ତା ବାଣ୍ଟିଛୁ । ଆମେ ନିଶ୍ଚିତ ଯେ, ଏହି ବେଆଇନ କାର୍ଯ୍ୟକଳାପ ବିରୁଦ୍ଧରେ ଆମର ଲଢ଼େଇରେ ଆମେ ନ୍ୟୁଜିଲ୍ୟାଣ୍ଡ ସରକାରଙ୍କ ସମର୍ଥନ ପାଇବୁ ।
