ଦାରିଙ୍ଗବାଡି,୧୧/୧(ଆପ୍ର): ଓଡ଼ିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡି ଠାରେ ଶନିବାର ଶୀତ ମହୋତ୍ସବ ଉଦଘାଟିତ ହୋଇଯାଇଛି । ଉଦଘାଟନୀ ଉତ୍ସବରେ ବ୍ଲକ ଅଧ୍ୟକ୍ଷ ସୁଶାନ୍ତ ପ୍ରଧାନ ସଭାପତିତ୍ବ କରିଥିବା ବେଳେ ମୁଖ୍ୟ ଅତିଥି ଭାବେ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ ଯୋଗ ଦେଇଥିଲେ । ଅତିଥି ଭାବେ ଆସ୍କା ସାଂସଦ ଅନିତା ଶୁଭଦର୍ଶୀନି ପଟ୍ଟନାୟକ, ପୂର୍ବତନ ବିଧାୟକ ଯାକବ ପ୍ରଧାନ, ସରପଞ୍ଚ ଚନ୍ଦ୍ରିକା ମଲିକ, ଜିଲ୍ଲା ପରିଷଦ ସଦସ୍ୟା ଦୀପିକା ମାଝୀ ପ୍ରମୁଖ ଯୋଗ ଦେଇଥିଲେ । ମୁଖ୍ୟବକ୍ତା ଭାବେ ଜି.ଉଦୟଗିରି ବିଧାୟକ ପ୍ରଫୁଲ୍ଲ ଚନ୍ଦ୍ର ପ୍ରଧାନ ଯୋଗଦେଇଥିଲେ ।
ମୁଖ୍ୟ ଅତିଥି କହିଥିଲେ କି ଏହି ଶୀତ ମହୋତ୍ସବ ରାଷ୍ଟ୍ରୀୟ ଉତ୍ସବ ଠୁ କମ ନୁହଁ । ଆଗାମୀ ଦିନରେ କେନ୍ଦ୍ରୀୟ ସ୍ତରରେ ନେତା ଆସି ଉକ୍ତ କାର୍ଯ୍ୟକ୍ରମ ରେ ଯୋଗ ଦେବେ । ଆଗାମୀ ଦିନରେ ଦାରିଙ୍ଗବାଡି ର ରହିଥିବା ବିଭିନ୍ନ ପର୍ଯ୍ୟଟନ ସ୍ଥଳୀର ବିକାଶ ହେବ । ଅଞ୍ଚଳର ବିକାଶ ପ୍ରତି ଗୁରୁତ୍ଵ ଦେବୀ ବୋଲି କହିଥିଲେ ।
ସାଂସ୍କୃତିକ କାର୍ଯ୍ୟକ୍ରମର ମୁଖ୍ୟ ଆକର୍ଷଣ ରହିଥିଲା କଣ୍ଠଶିଳ୍ପୀ ସତ୍ୟଜିତ ପ୍ରଧାନ ଓ ସୌରଭ ଭରଦ୍ୱାଜ ଙ୍କ ସଙ୍ଗୀତ । ସଙ୍ଗୀତରେ ଝୁମିଥିଲେ ଦର୍ଶକ । ଏଥି ସହିତ ସ୍ଥାନୀୟ କଳାକାର ତଥା କନ୍ଧମାଳ ଜିଲ୍ଲାର ପାରମ୍ପରିକ ନୃତ୍ୟ ମଧ୍ୟ ପରିବେଷଣ ହୋଇଥିଲା । ଏଙ୍କର ଶିବାନନ୍ଦ ଓ ଲିସା ମଞ୍ଚ ସଞ୍ଚାଳନ କରୁଥିଲେ । କମିଟିର ସମ୍ପାଦକ ତଥା ବିଡ଼ିଓ ଗଦାଧର ପାତ୍ର, ତହସିଲଦାର ଶରତ ଶବର ଙ୍କ ସମେତ କମିଟିର ଅନ୍ୟ କର୍ମକର୍ତ୍ତା ସହୋହୋଗ କରିଥିଲେ । ଥାନା ଅଧିକାରୀ କନକ ମାଝୀ ଙ୍କ ନେତୃତ୍ୱରେ ସୁରକ୍ଷା ବ୍ୟବସ୍ଥା କଡାକଡି କରାଯାଇଥିଲା। କାର୍ଯ୍ୟକ୍ରମରେ ହଜାର ହଜାର ଦର୍ଶକ ଉପସ୍ଥିତ ଥିଲେ । ଆଜି ଦାରିଙ୍ଗବାଡି ଅଞ୍ଚଳରେ ଅଧିକ ମାତ୍ରାରେ ତୁଷାରପାତ ହୋଇଥିଲା । ଫଳରେ ଶୀତ ମହୋତ୍ସବରେ ଲୋକେ ପ୍ରକୃତ ଶୀତର ମଜା ନେଇଥିଲେ ।
