ତ୍ରୀକୁଟ: ମଙ୍ଗଳବାର ଅପରାହ୍ନ ସମୟରେ ମାତା ବୈଷ୍ଣୋଦେବୀଙ୍କ ମନ୍ଦିର ଥିବା ତ୍ରୀକୁଟ ପାହାଡରେ ଭୂସ୍ଖଳନ ହେବା ଯୋଗୁଁ ପାଞ୍ଚ ଜଣ ଲୋକଙ୍କ ମୃତ୍ୟୁ ହୋଇଥିବା ବେଳେ ୧୪ ଜଣ ଗୁରୁତର ଆହତ ହୋଇଛନ୍ତି। ଏହାସହ ସ୍ଥାନୀୟ ଅଞ୍ଚଳରେ ଭାରି ବୃଷ୍ଟିପାତ ଲାଗି ରହିଥିବା କାରଣରୁ ଆଗକୁ ମୃତାହତଙ୍କ ସଂଖ୍ୟା ବୃଦ୍ଧି ପାଉପାରେ ବୋଲି ଅନୁମାନ କରାଯାଉଛି। ତେବେ ଏହି ଦୁର୍ଘଟଣା ପରେ ଜମ୍ମୁ ଏବଂ କାଶ୍ମୀରର ରିଆସି ଜିଲ୍ଲାରେ ଥିବା ଏହି ପବିତ୍ର ତୀର୍ଥଯାତ୍ରାକୁ ସ୍ଥଗିତ ରଖାଯାଇଥିବା ନେଇ ଅଧିକାରୀମାନେ ସୂଚନା ପ୍ରଦାନ କରିଛନ୍ତି।
ଖବର ମୁତାବକ, ଅଧକ୍ୱାରି ନିକଟରେ ଥିବା ଇନ୍ଦ୍ରପ୍ରସ୍ଥ ଭୋଜନାଳୟ ନିକଟରେ ଅପରାହ୍ନ ୩ଟା ସମୟରେ ହଠାତ୍ ଏକ ଭୂସ୍ଖଳନ ହୋଇଥିଲା। ମନ୍ଦିରକୁ ଯାଇଥିବା ରାସ୍ତାର ମଧ୍ୟଭାଗରେ ପଡୁଥିବାରୁ ଅନେକ ଲୋକ ଏଠାରେ ବିଶ୍ରାମ ନେବା ସହ ଖାଦ୍ୟ ଖାଉଥିଲେ ବୋଲି ଜଣାପଡିଛି। ମନ୍ଦିରଠୁ ଏହି ସ୍ଥାନ ମାତ୍ର ୧୨ କିଲୋମିଟର ଦୁରରେ ରହିଥିବାରୁ ଏହା ତୀର୍ଥଯାତ୍ରୀଙ୍କ ପାଇଁ ଏକ ରହଣୀସ୍ଥଳଭାବେ କାର୍ଯ୍ୟ କରୁଥିଲା। ତେବେ ଦୁର୍ଘଟଣା ଘଟିବା ନେଇ ସୂଚନା ମିଳିବା ପରେ ସ୍ଥାନୀୟ ଲୋକ ଓ ସେନା ମିଳିତ ଭାବେ ଉଦ୍ଧାରକାର୍ଯ୍ୟ ଜାରି ରଖିଛନ୍ତି।
ଦୀର୍ଘ ୩ଦିନ ହେବ ଜମ୍ମୁ ଓ କାଶ୍ମୀରର ବିଭିନ୍ନ ଅଞ୍ଚଳରେ ବୃଷ୍ଟିପାତ ଲାଗି ରହିଛି। ଏହାକୁ ଦୃଷ୍ଟିରେ ରଖି ହିମକୋଟି ଟ୍ରେକ ରୁଟରେ ହେଉଥିବା ଯାତ୍ରାକୁ ଆଜି ପାଇଁ ରଦ୍ଦ କରାଯାଇଥିଲା। ଏଣୁ ତୀର୍ଥଯାତ୍ରୀମାନେ ଏହି ପୁରୁଣା ରାସ୍ତା ଦେଇ ବୈଷ୍ଣୋଦେବୀ ମନ୍ଦିର ଯାତ୍ରା କରୁଥିଲେ। ତେବେ ବୃଷ୍ଟିପାତ ନକମିବାରୁ ଅଧିକାରୀମାନେ ଦିନ ୧ଟା ୩୦ରେ ଏହି ରାସ୍ତା ଦେଇ ହେଉଥିବା ଯାତ୍ରାକୁ ମଧ୍ୟ ରଦ୍ଦ କରିଥିଲେ। ନଚେତ୍ ମୃତାହତଙ୍କ ସଂଖ୍ୟା ଆହୁରି ବୃଦ୍ଧି ଘଟିଥାନ୍ତା ବୋଲି ବିଶେଷଜ୍ଞମାନେ ମତ୍ତ ପ୍ରକାଶ କରିଛନ୍ତି।
ସେହିଭଳି ଆଜି ଡୋଡା ଜିଲ୍ଲାରେ ବାଦଲଫଟା ବୃଷ୍ଟିପାତ ଯୋଗୁଁ ଚାରିଜଣ ଲୋକଙ୍କ ମୃତ୍ୟୁ ଘଟିଥିଲା। ମାତ୍ର ୨୪ ଘଣ୍ଟା ମଧ୍ୟରେ ଜମ୍ମୁ ଓ କାଶ୍ମୀର ଅଞ୍ଚଳରେ ଭାରି ବୃଷ୍ଟିପାତ ଯୋଗୁଁ ୯ ଜଣ ଲୋକଙ୍କ ମୃତ୍ୟୁ ଘଟି ସାରିଲାଣି। ସେହିଭଳି ଡାଉନପୁର ଅଞ୍ଚଳରେ ବୃଷ୍ଟିପାତ ଯୋଗୁଁ ୧୦ରୁ ଅଧିକ ଘର ଭାସିଯାଇଥିବା ବେଳେ ଅପଟିକାଲ କେବୁଲ ଛିଡିଯିବା ଯୋଗୁଁ ନେଟୱାର୍କ ସେବାରେ ବ୍ୟାଘାତ ସୃଷ୍ଟି ହୋଇଛି। ଅନ୍ୟପଟେ ବିପର୍ଯ୍ୟୟୁ ଦୃଷ୍ଟିରେ ରଖି ନର୍ଥେନ ରେଲୱେ କଟରା, ଉଦ୍ଧମପୁର ଓ ଜମ୍ମୁ ରେଳ ଷ୍ଟେସନରୁ ୧୮ଟି ଟ୍ରେନକୁ ବାତିଲ କରିଛି।
ଜମ୍ମୁ ଓ କାଶ୍ମୀର ସମସ୍ତ ନଦୀ ବିରଦ ସଙ୍କେତ ଉପରେ ପ୍ରବାହିତ ହେବା ଲହ ତଳିଆ ଅଞ୍ଚଳରେ ବନ୍ୟାର ପ୍ରକୋପ ଦେଖିବାକୁ ମିଳିଲାଣି। ଏଣୁ ସ୍ଥାନିୟ ଅଧିକାରିମାନେ ତଳିଆ ଅଞ୍ଚଳ ଓ ପାହାଡ ପାଦଦେଶରୁ ଦୁରେଇ ରହିବାକୁ ପରାମର୍ଶ ଜାରି କରିଛନ୍ତି।
