କେସିଙ୍ଗା,୧୧/୦୭: କଳାହାଣ୍ଡି ଜିଲ୍ଲା କେସିଙ୍ଗା ସହରର ଜଗନ୍ନାଥ ମନ୍ଦିର ଛକରେ ଡିଜିଟାଲ ଟ୍ରାଫିକ ସିଗ୍ନାଲ ବ୍ୟବସ୍ଥା ଅବ୍ୟବସ୍ଥିତ ଢଙ୍ଗରେ ରହିଛି । ଟ୍ରାଫିକ ସିଗ୍ନାଲ ନିୟମକୁ ଲୋକେ ଯେଉଁ ଭଳି ଭାବେ ମାନିବା କଥା ତାହା ହେଉନାହିଁ । ସଠିକ ଭାବରେ ଟ୍ରାଫିକ ସିଗ୍ନାଲକୁ ପରିଚାଳନା କରିବା ପାଇଁ ଟ୍ରାଫିକ ପୁଲିସ ମଧ୍ୟ ନାହାନ୍ତି । ଏପରିକି ସ୍ଥାନୀୟ ପୁଲିସ ମଧ୍ୟ ନିଜ କାମ ଠିକ ଭାବରେ କରୁନାହିଁ ।
ଅପରପକ୍ଷରେ ଡିଜିଟାଲ ଟ୍ରାଫିକ ସିଗ୍ନାଲକୁ ନେଇ ଲୋକଙ୍କ ମଧ୍ୟରେ ସଚେତନତାର ଅଭାବ ରହିଥିବା ପରିଲକ୍ଷିତ ହେଉଛି । ଜେବ୍ରା କ୍ରସିଂ ନିୟମ ସମ୍ପର୍କରେ ଲୋକେ ଜାଣିଛନ୍ତି କି ନାହିଁ, ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହେଉଛି ? ଟ୍ରାଫିକ ଛକରେ ଛିଡ଼ା ହେବା ବେଳେ ପଥଚାରୀଙ୍କୁ ରାସ୍ତା ଅତିକ୍ରମ କରିବା ପାଇଁ ଅପେକ୍ଷା କରିବାକୁ ପଡୁଛି । ଗୋଟିଏ ପଟେ ସିଗ୍ନାଲ ଛଡ଼ା ହେଲେ ସେପଟେ ଲୋକ ଯିବା ନିୟମ ଥିବାବେଳେ ସଙ୍କୁଚିତ ରାସ୍ତାରେ ଅମାନିଆ ବାଇକ୍ ଚାଳକ ରାସ୍ତା ଛାଡୁ ନାହାନ୍ତି । ତେଣୁ ଟ୍ରାଫିକ ଓ ଜେବ୍ରା କ୍ରସିଂ ନିୟମ କଡାକଡି ଲାଗୁ କରିବା ସହିତ ନିୟମ ଭାଙ୍ଗୁଥିବା ଲୋକଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ହେବା ଆବଶ୍ୟକ ବୋଲି ସଚେତନ ନାଗରିକ ମହଲରେ ମତ ପ୍ରକାଶ ପାଇଛି । ତେଣୁ ଏଥିପ୍ରତି ପ୍ରଶାସନ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ଦାବି ହେଉଛି ।
