ଜୟପୁର,୧୩।୧୧: ରାଜସ୍ଥାନର ଏକ ମତଦାନ କେନ୍ଦ୍ରରୁ ବୁଧବାର ଏକ ଚକିତ କରିଦେବା ଭଳି ଘଟଣା ସାମନାକୁ ଆସିଛି। ମିଳିଥିବା ସୂଚନା ଅନୁସାରେ, ଦେଭଲି-ଉନିୟାରା ନିର୍ବାଚନ କ୍ଷେତ୍ରରୁ ଏକ ନିର୍ଦ୍ଦଳୀୟ ପ୍ରାର୍ଥୀ ନରେଶ ମିନା ଏସ୍ଡିଏମ୍ଙ୍କୁ ଚାପୁଡା ମାରିଛନ୍ତି। ଏହି ଘଟଣା ସମରଭତା ମତଦାନ କେନ୍ଦ୍ରର ବୋଲି କୁହାଯାଉଛି। ନରେଶ ମୀନା ମତଦାନ କେନ୍ଦ୍ରରେ ପଶିବା ମାତ୍ରେ ଓ ନିର୍ବାଚନ ପ୍ରୋଟୋକଲ୍ ପାଳନ କରିବା ପାଇଁ ଡ୍ୟୁଟିରେ ଥିବା ଏସ୍ଡିଏମ୍ ଅମିତ ଚୌଧୁରୀଙ୍କୁ ଚାପୁଡା ମାରିଥିଲେ। ଘଟଣାସ୍ଥଳରେ ମୁତୟନ ପୋଲିସ ତାଙ୍କୁ ରୋକିଥିଲା।
ପୂର୍ବତନ କଂଗ୍ରେସ ନେତା ନରେଶ ମୀନା ନିର୍ଦ୍ଦଳୀୟ ରୂପରେ ନିର୍ବାଚନ ଲଢୁଥିବା କାରଣରୁ ପାର୍ଟି ତାଙ୍କୁ ନିଲମ୍ବିତ କରିଥିଲା। କାରଣ ପାର୍ଟି ଦେଭଲି-ଉନିୟାରା ଉପ ନିର୍ବାଚନ ପାଇଁ ତାଙ୍କ ସ୍ଥାନରେ କସ୍ତୁର ଚନ୍ଦ ମୀନାଙ୍କୁ ପ୍ରାର୍ଥୀ କରିଥିଲା। ଭାରତ ଆଦିବାସୀ ପାର୍ଟି ଦ୍ବାରା ସମର୍ଥିତ ମୀନା ନିର୍ଦ୍ଦଳୀୟ ରୂପରେ ନିର୍ବାଚନ ଲଢିବା ଉପ-ନିର୍ବାଚନରେ ସମ୍ଭାବିତ ଭୋଟ ବିଭାଜନକୁ ଚିନ୍ତା ବଢାଇଛି। ଉଲ୍ଲେଖନୀୟ ଯେ, ଦେଭଲି-ଉନିୟାରା ଆସନ ପାଇଁ ଉପ-ନିର୍ବାଚନର ଆବଶ୍ୟକତା ଏଥିପାଇଁ ରହିଛି, କାରଣ କଂଗ୍ରେସ ନେତା ହରିଶ ଚନ୍ଦ୍ରମୀନା, ଯିଏକି ୨୦୧୮ ଓ ୨୦୨୩ ରେ ଏହି ଆସନରୁ ଜିତିଥିଲେ। ସାଧାରଣ ନିର୍ବାଚନ ପରେ ଲୋକସଭାକୁ ଚାଲିଯିବା ପରେ ଏହି ଆସନ ଖାଲି ପଡିଥିଲା।
