ନୂଆଦିଲ୍ଲୀ, ୨୩/୦୩: ଭାରତର ଅଭିବୃଦ୍ଧିରୁ ସମଗ୍ର ବିଶ୍ୱକୁ ଫାଇଦା ହେବ । ମାଇକ୍ରୋସଫ୍ଟ ସହ-ପ୍ରତିଷ୍ଠାତା ବିଲ୍ ଗେଟ୍ସ ଏହା କହିଛନ୍ତି । ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ ସେ ଏହା ପ୍ରକାଶ କରିଛନ୍ତି । ଗେଟ୍ସ ଆହୁରି ଭାରତର ଦ୍ରୁତ ନବସୃଜନକୁ ପ୍ରଶଂସା କରିଛନ୍ତି ।
ସେ କହିଲେ ଯେ, ୨୦୪୭ ସୁଦ୍ଧା ଭାରତ ବିକଶିତ ରାଷ୍ଟ୍ରରେ ପରିଣତ ହେବ । ଏହା କେବଳ ଭାରତରେ ପରିବର୍ତ୍ତନ ଆଣିବ ନାହିଁ ବରଂ ବିଶ୍ୱ ଉପରେ ବି ଏହାର ସକାରାତ୍ମକ ପ୍ରଭାବ ପଡ଼ିବ ।
ଗେଟ୍ସ କହିଲେ ଯେ, ଭାରତରେ ସ୍ୱାସ୍ଥ୍ୟ ଏବଂ ଶିକ୍ଷା ଭଳି ପ୍ରମୁଖ କ୍ଷେତ୍ରକୁ ପ୍ରାଥମିକତା ଦିଆଯାଉଛି । ଏହାର ସକାରାତ୍ମକ ଗତିଶୀଳତା ଦେଖିବାକୁ ମିଳୁଛି । ଭାରତର ଅର୍ଥନୈତିକ ଅଭିବୃଦ୍ଧି ଦୃଶ୍ୟପଟକୁ ଆଶାଜନକ କହିବା ସହ ଗେଟ୍ସ କହିଲେ ଯେ, ଭାରତରେ ବିକାଶ ହାର ୫% ରହିବ କି ୧୦%, ତାହାକୁ ନେଇ ତର୍କ ହେଉଛି । କିନ୍ତୁ ମୋତେ ଅନୁଭବ ହେଉଛି ଯେ, ଅଭିବୃଦ୍ଧି ୧୦% ପର୍ଯ୍ୟନ୍ତ ପହଞ୍ଚି ନ ପାରେ କିନ୍ତୁ ୫% ତଳକୁ ବି ଖସିବ ନାହିଁ ।
ଅର୍ଥନୈତିକ ଅଭିବୃଦ୍ଧି ସ୍ୱାସ୍ଥ୍ୟ ଏବଂ ଶିକ୍ଷାରେ ଅଧିକ ସରକାରୀ ନିବେଶକୁ ସକ୍ଷମ କରିବ, ଯାହାଦ୍ୱାରା ମହତ୍ୱପୂର୍ଣ୍ଣ ଅବସର ସୃଷ୍ଟି ହେବ । ଆର୍ଟିଫିସିଆଲ ଇଣ୍ଟେଲିଜେନ୍ସ(ଏଆଇ)କୁ ନେଇ ଗେଟ୍ସ କହିଲେ ଯେ, ଏହି ପ୍ରଯୁକ୍ତି ବିରାଟ ପରିବର୍ତ୍ତନ ଆଣିବ । ସେ ଏହାକୁ ମଧ୍ୟ ଖଣ୍ଡନ କରିଛନ୍ତି ଯେ, ଏଆଇ ଦ୍ୱାରା ବଡ଼ ଆକାରରେ ଚାକିରି ଚାଲିଯିବ ।
ଗେଟ୍ସ ଭାରତର ଏଆଇ ଡେଭଲପ୍ମେଣ୍ଟ ଆପ୍ରୋଚ୍କୁ ପ୍ରଶଂସା କରିଛନ୍ତି । ସେ କହିଲେ ଯେ, ସ୍ଥାନୀୟ ଆବଶ୍ୟକତା ଅନୁସାରେ ଭାରତ ଓପନ୍-ସୋର୍ସ ଫାଉଣ୍ଡେସନ ମଡେଲ୍କୁ ଆପଣାଇଛି । ଏହା ପ୍ରଶଂସନୀୟ । ଏହାଦ୍ୱାରା ଭାରତୀୟ ଭାଷାଗୁଡ଼ିକୁ ସପୋର୍ଟ ମିଳିବ । ଆଧାର ଏବଂ ୟୁପିଆଇ ସମେତ ଭାରତର ଡିଜିଟାଲ ପବ୍ଲିକ୍ ଭିତ୍ତିଭୂମିକୁ ପ୍ରଶଂସା କରିଛନ୍ତି ବିଲ୍ ଗେଟ୍ସ । ଏହା ବିଶ୍ୱ ପାଇଁ ଦେଶର ଅନ୍ୟତମ ମହତ୍ୱପୂର୍ଣ୍ଣ ଯୋଗଦାନ ବୋଲି ସେ କହିଛନ୍ତି । ଗେଟ୍ସ କହିଲେ ଯେ, ଯେତେଥର ଭାରତ ଆସିଛି ଅନେକ କମ୍ପାନି ଏହି ଡିଜିଟାଲ ଭିତ୍ତିଭୂମିର ଲାଭ ଉଠାଉଥିବା ଦେଖିଆସୁଛି । ସେ ବ୍ୟାଙ୍କିଙ୍ଗ୍ ହେଉ କିମ୍ବା ଷ୍ଟକ୍ ଟ୍ରେଡିଂ, ଭାରତର ନବସୃଜନ ଦ୍ରୁତ ବେଗରେ ଆଗକୁ ବଢୁଛି।
ପ୍ରକାଶଯୋଗ୍ୟ, ମାଇକ୍ରୋସଫ୍ଟର ସହ-ପ୍ରତିଷ୍ଠାତା ବିଲ୍ ଗେଟ୍ସ ବିଶ୍ୱର ୧୧ତମ ଧନୀ ବ୍ୟକ୍ତି । ଫୋର୍ବସ ଅନୁସାରେ, ତାଙ୍କ ନେଟ୍ ସମ୍ପତ୍ତି ୧୦୭୧୦ କୋଟି ଡଲାର ବା ପାଖାପାଖି ୯.୨୧ ଲକ୍ଷ କୋଟି ଟଙ୍କା । ସେ ୧୯୭୫ରେ ମାଇକ୍ରୋସଫ୍ଟର ସ୍ଥାପନା କରିଥିଲେ । ୨୦୦୦ ମସିହା ଯାଏ ସେ କମ୍ପାନିରେ ସିଇଓ ପଦରେ ଥିଲେ ।
