ନୂଆଦିଲ୍ଲୀ,୦୧/୧୧: ଭାରତରେ ପାର୍ବଣ ଋତୁ ଚାଲିଥିବା ବେଳେ ସୁନାର କିଣାବିକା ମଧ୍ୟ ଜୋରଦାର ହେଉଛି। ଏପରିସ୍ଥଳରେ ବିଶ୍ବ ସୁନା ପରିଷଦ (ଡବ୍ଳୁଜିସି) ୨୦୨୪ର ତୃତୀୟ ତ୍ରୈମାସିକର ସୁନା ଚାହିଦା ରିପୋର୍ଟ ଜାରି କରିଛି। ଭାରତର ସୁନାର ଚାହିଦା ଚଳିତ ବର୍ଷ ଜୁଲାଇ-ସେପ୍ଟେମ୍ବର ତିନିମାସରେ ୧୮ ପ୍ରତିଶତ ବଢ଼ି ୨୪୮.୩ ଟନ୍ ରହିଛି। ସୁନାର ଆମଦାନୀ ଶୁଳ୍କରେ ହ୍ରାସ ଯୋଗୁ ଗହଣା-ଅଳଙ୍କାରର ଚାହିଦାରେ ସୁଧାର ଦେଖିବାକୁ ମିଳିଥିବା ବେଳେ ସୁନାର ଚାହିଦା ବଢ଼ିଛି। ଗତବର୍ଷ ଏହି ତିନିମାସରେ ସୁନାର ମୂଳ ଚାହିଦା ୨୧୦.୨ ଟନ୍ ଥିଲା।
ଜୁଲାଇ-ସେପ୍ଟେମ୍ବର ୨୦୨୪ ରେ ବୈଶ୍ବିକ ସୁନା ଚାହିଦା ପାଞ୍ଚ ପ୍ରତିଶତ ବୃଦ୍ଧି ହୋଇ ୧୩୧୩ ଟନ୍ରେ ପହଞ୍ଚିଛି, ଯାହାକି ତୃତୀୟ ତ୍ରୈମାସିକରେ ସର୍ବୋଚ୍ଚ ସ୍ତର ଅଟେ। ୨୦୨୪ ର ତୃତୀୟ ତ୍ରୈମାସିକ ପାଇଁ ଡବ୍ଳୁଜିସି ର ଗୋଲ୍ଡ ଡିମାଣ୍ଡ ଟ୍ରେଣ୍ଡ ରିପୋର୍ଟ ଅନୁଯାୟୀ, ଏକ ବର୍ଷ ପୂର୍ବେ ସମାନ ଅବଧିରେ ବୈଶ୍ବିକ ଚାହିଦା ୧୨୪୯.୬ ଟନ୍ ଥିଲା। ରିପୋର୍ଟ ଅନୁଯାୟୀ, ସୁନା ହାର ଅର୍ଥାତ୍ ସୁନା ମୂଲ୍ୟ ସର୍ବଦା ଉଚ୍ଚରେ ରହିଛି, ତେଣୁ ନିବେଶକଙ୍କ ମଧ୍ୟରେ ମୂଲ୍ୟ ହ୍ରାସକୁ ଅପେକ୍ଷା କରିବାର ପ୍ରବୃତ୍ତି ବଢ଼ିପାରେ। ବର୍ଷସାରା ସୁନାର ଚାହିଦା ୭୦୦ ରୁ ୭୫୦ ଟନ୍ ମଧ୍ୟରେ ରହିବାର ସମ୍ଭାବନା ଅଛି, ଯାହା ଗତ ବର୍ଷ ତୁଳନାରେ ସାମାନ୍ୟ କମ୍ ଅଟେ। ଧନ୍ତେରାଶ ଏବଂ ବିବାହକୁ ଦୃଷ୍ଟିରେ ରଖି ସୁନାର ମୋଟ ଚାହିଦା ବୃଦ୍ଧି ହେବାର ସମ୍ଭାବନା ମଧ୍ୟ ଅଛି। ୨୦୨୩ ରେ ଭାରତର ସୁନା ଚାହିଦା ୭୬୧ ଟନ୍ ଥିଲା।
ଅଳଙ୍କାର ଏବଂ ଖୁଚୁରା ଦୋକାନୀଙ୍କ ଚାହିଦା ମଧ୍ୟରେ ଜାତୀୟ ରାଜଧାନୀରେ ସୁନା ମୂଲ୍ୟ ୩୦୦ ଟଙ୍କା ବୃଦ୍ଧି ହୋଇ ୧୦ ଗ୍ରାମ ପିଛା ୮୧,୪୦୦ ଟଙ୍କା ହୋଇଛି। ମୂଲ୍ୟ ଅନୁଯାୟୀ, ଏହି କ୍ୟାଲେଣ୍ଡର ବର୍ଷର ତୃତୀୟ ତ୍ରୈମାସିକରେ ସୁନା ଚାହିଦା ୫୩ ପ୍ରତିଶତ ବୃଦ୍ଧି ହୋଇ ୧,୬୫,୩୮୦ କୋଟିରେ ପହଞ୍ଚିଥିବାବେଳେ ୨୦୨୩ର ସମାନ ଅବଧିରେ ଏହା ୧,୦୭,୭୦୦ କୋଟି ଟଙ୍କା ଥିଲା। ୨୦୨୪ ର ତୃତୀୟ ତ୍ରୈମାସିକରେ ଭାରତର ସୁନା ଚାହିଦା ୨୪୮.୩ ଟନ୍ରେ ପହଞ୍ଚିଛି, ଯାହା ବାର୍ଷିକ ୧୮ ପ୍ରତିଶତ ବୃଦ୍ଧି ହୋଇଛି। ଜୁଲାଇରେ ସୁନା ଆମଦାନୀ ଶୁଳ୍କ ହ୍ରାସ ହେତୁ ଅଳଙ୍କାରର ଚାହିଦା ଉନ୍ନତ ହୋଇଥିଲା।
