ନୂଆଦିଲ୍ଲୀ,୨୮।୧: ମତ୍ସ୍ୟଜୀବିଙ୍କ ପ୍ରସଙ୍ଗ ନେଇ ଶ୍ରୀଲଙ୍କା ଉପରେ ଅସନ୍ତୋଷ ପ୍ରକାଶ କଲା ଭାରତ। ବୈଦେଶିକ ମନ୍ତ୍ରଣାଳୟର କହିବା ଅନୁସାରେ, ଶ୍ରୀଲଙ୍କା ନୌସେନା ପକ୍ଷରୁ ଭାରତୀୟ ମତ୍ସ୍ୟଜୀବିଙ୍କୁ ଧରିବା ପାଇଁ ହୋଇଥିବା ଗୁଳିକାଣ୍ଡ ମାମଲାରେ କଡ଼ା ବିରୋଧ କରାଯାଇଛି। ମନ୍ତ୍ରଣାଳୟର କହିବା ଅନୁସାରେ, ଡିଲଫ୍ଟ ଦ୍ବୀପ ନିକଟରେ ଶ୍ରୀଲଙ୍କା ନୌସେନାର ଫାୟାରିଂରେ ଦୁଇ ଭାରତୀୟ ମତ୍ସଜୀବିଙ୍କ ଜାଫନା ହସ୍ପିଟାଲରେ ଚିକିତ୍ସା ଚାଲିଛି। ଏନେଇ ବୈଦେଶିକ ମନ୍ତ୍ରଣାଳୟ ଶ୍ରୀଲଙ୍କା ଦୂତାବାସ ଅଧିକାରୀଙ୍କୁ ଜବାବ ତଲବ କରିବା ସହ କଡା ବିରୋଧ ପ୍ରକାଶ କରିଛି।
ବୈଦେଶିକ ମନ୍ତ୍ରଣାଳୟ କହିଛି, ମଙ୍ଗଳବାର ସକାଳେ ଡିଲଫ୍ଟ ଦ୍ବୀପ ନିକଟରେ ୧୩ ଭାରତୀୟ ମତ୍ସ୍ୟଜୀବିଙ୍କୁ ଧରିବା ବେଳେ ଶ୍ରୀଲଙ୍କାର ନୌସେନା ପକ୍ଷରୁ ଗୁଳିମାଡ ଘଟଣା ନେଇ ସୂଚନା ମିଳିଛି। ମାଛ ଧରାଯାଉଥିବା ଡଙ୍ଗାରେ ଥିବା ୧୩ ମତ୍ସଜୀବିଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ଗୁରୁତର ରହିଛି। ତାଙ୍କର ଜାଫନା ଟିଚିଙ୍ଗ ହସ୍ପିଟାଲରେ ଚିକିତ୍ସା ଚାଲିଛି। ତିନି ଅନ୍ୟ ମତ୍ସ୍ୟଜୀବିଙ୍କୁ ସାମାନ୍ୟ ଆଘାତ ଲାଗିଛି। ତାଙ୍କର ମଧ୍ୟ ଚିକିତ୍ସା ଜାରି ରହିଛି। ଜାଫନାରେ ଭାରତୀୟ ବାଣିଜ୍ୟ ଦୂତାବାସର ଅଧିକାରୀ ଆହତ ମତ୍ସ୍ୟଜୀବିଙ୍କୁ ହସ୍ପିଟାଲରେ ଭେଟିବା ଓ ତାଙ୍କର ହାଲଚାଲ ପଚାରି ବୁଝିଛନ୍ତି। ସେମାନେ ମତ୍ସ୍ୟଜୀବି ଓ ତାଙ୍କ ପରିବାରକୁ ସବୁ ପ୍ରକାର ସହାୟତା ପ୍ରଦାନ କରିଛନ୍ତି।
ଏହା ପୂର୍ବରୁ ପୁଡୁଚେରୀ କେନ୍ଦ୍ର ଶାସିତ ରାଜ୍ୟର କରାଇକଲରୁ ଶ୍ରୀଲଙ୍କା ନୌସେନା ଦ୍ବୀପ ରାଷ୍ଟ୍ରର ଜଳକ୍ଷେତ୍ରରେ ପ୍ରବେଶ କରିବା ଅଭିଯୋଗରେ ୧୩ ଜଣ ମତ୍ସ୍ୟଜୀବିଙ୍କୁ ଗିରଫ କରିଛି। ପୁଡୁଚେରୀ ସରକାରଙ୍କ ଶୀର୍ଷ ଅଧିକାରୀ କହିଛନ୍ତି, ସରକାର ମତ୍ସ୍ୟଜୀବି ଓ ତାଙ୍କର ବୋଟ୍କୁ ଛଡାଇବା ପାଇଁ କେନ୍ଦ୍ର ସରକାର ହସ୍ତକ୍ଷେପ କରିବାର ଦାବି କରିବେ। ଗିରଫ ହୋଇଥିବା ମତ୍ସ୍ୟଜୀବିଙ୍କ ନାଁ ଜାଣିବାକୁ ଚେଷ୍ଟା କରାଯାଉଛି।
