ନୂଆଦିଲ୍ଲୀ,୩୧/୦୫: ଭିଏତନାମ ସହ ସ୍ବାକ୍ଷରିତ ହେଲା ଭାରତର ବ୍ରହ୍ମୋସ ଚୁକ୍ତି । ଭାରତ ଏବଂ ଭିଏତନାମ ମଧ୍ୟରେ ଅତ୍ୟାଧୁନିକ ସୁପରସୋନିକ କ୍ରୁଜ୍ ମିସାଇଲ୍ ବ୍ରହ୍ମୋସ୍ ଯୋଗାଣ ପାଇଁ ଚୁକ୍ତି ସ୍ୱାକ୍ଷରିତ ହୋଇଛି । ଭାରତ ଆଉ କେବଳ ପ୍ରତିରକ୍ଷା ଉପକରଣର କ୍ରେତା ନୁହେଁ, ବରଂ ଏକ ପ୍ରମୁଖ ରପ୍ତାନିକାରୀ ଭାବରେ ବିଶ୍ୱ ସ୍ତରରେ ନିଜର ଉପସ୍ଥିତି ପ୍ରତିଷ୍ଠିତ କରୁଛି । ସିଙ୍ଗାପୁରରେ ଅନୁଷ୍ଠିତ ସାଙ୍ଗ୍ରି-ଲା ଆଲୋଚନାରେ, ଭାରତୀୟ ପ୍ରତିରକ୍ଷା ସଚିବ ରାଜେଶ କୁମାର ସିଂହ ଏହି ସୂଚନା ପ୍ରଦାନ କରିଛନ୍ତି । ଭାରତ ତାର ନିକଟତମ ସହଯୋଗୀ ଭିଏତନାମକୁ ଘାତକ ବ୍ରହ୍ମୋସ୍ ସୁପରସୋନିକ୍ କ୍ରୁଜ୍ କ୍ଷେପଣାସ୍ତ୍ର ପ୍ରଣାଳୀ ବିକ୍ରି କରିବା ପାଇଁ ଏକ ଚୁକ୍ତି ସ୍ୱାକ୍ଷର କରିଛି । ପ୍ରାୟ ୬ ହଜାର କୋଟି ମୂଲ୍ୟର ଏହି ପ୍ରତିରକ୍ଷା ଚୁକ୍ତି ହୋଇପାରେ । ଏହା ସହିତ ଇଣ୍ଡୋନେସିଆ ସହ ମଧ୍ୟ ଏହି ମିସାଇଲ୍ ଚୁକ୍ତି ଏବେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି ।
ଦକ୍ଷିଣ-ପୂର୍ବ ଏସୀୟ ଦେଶଗୁଡ଼ିକ (ASEAN) ସହିତ ଭାରତର ବାଣିଜ୍ୟ ଏବଂ ରଣନୈତିକ ସମ୍ପର୍କ କ୍ରମାଗତ ଭାବରେ ଗଭୀର ହେଉଛି। ପ୍ରତିରକ୍ଷା ସଚିବ ସ୍ପଷ୍ଟ କରିଛନ୍ତି ଯେ, ଭାରତ ଏହି ବନ୍ଧୁତ୍ୱପୂର୍ଣ୍ଣ ରାଷ୍ଟ୍ରଗୁଡ଼ିକ ସହିତ ଏହାର ସର୍ବୋତ୍ତମ ପ୍ରତିରକ୍ଷା ପ୍ରଯୁକ୍ତିବିଦ୍ୟା ବାଣ୍ଟିବ । ଫିଲିପାଇନ୍ସ ଏହି କ୍ଷେପଣାସ୍ତ୍ରର ପ୍ରଥମ ବିଦେଶୀ ଗ୍ରାହକ ଥିଲା, ୨୦୨୨ରେ ୩୭.୫ କୋଟିର ପ୍ରତିରକ୍ଷା ଚୁକ୍ତି ସ୍ୱାକ୍ଷର କରିଥିଲା। ବର୍ତ୍ତମାନ, ଭିଏତନାମ ସହିତ ଚୁକ୍ତି ଚୂଡ଼ାନ୍ତ ହୋଇଛି, ଏବଂ ୨୦୨୬ ମାର୍ଚ୍ଚରେ ଇଣ୍ଡୋନେସିଆ ମଧ୍ୟ ଏଥିରେ ରାଜି ହୋଇଛି । ଏହି ସଦ୍ୟତମ ପ୍ରତିରକ୍ଷା ଚୁକ୍ତିର ସଠିକ୍ ଆର୍ଥିକ ବିବରଣୀ ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଘୋଷଣା କରାଯାଇ ନାହିଁ। ତଥାପି, ଗଣମାଧ୍ୟମ ରିପୋର୍ଟ ସୂଚିତ କରୁଛି ଯେ ଭାରତ ଏବଂ ଭିଏତନାମ ମଧ୍ୟରେ ସମ୍ପୂର୍ଣ୍ଣ ଚୁକ୍ତି ପ୍ରାୟ ୬ ହଜାର କୋଟି ହେବ ବୋଲି କୁହାଯାଇଛି ।
ଏହା ବି ପଢନ୍ତୁ...ଏଠାରେ ଟ୍ରେଣ୍ଡ ପାଲଟିଛି ଅଜବ ନିୟମ, ବ୍ରେକଅପ୍ କଲେ ଦେବାକୁ ପଡ଼ିବ ଫି’
ଏହି ମିସାଇଲ୍ ପାଇଁ ବିଶ୍ୱ କାହିଁକି ପାଗଳ ? ବ୍ରହ୍ମୋସ୍ କେବଳ ଏକ ଅସ୍ତ୍ର ନୁହେଁ, ବରଂ ପ୍ରତିରକ୍ଷା ଇଞ୍ଜିନିୟରିଂର ଏକ ଉନ୍ନତ ନମୂନା । ଭାରତର ପ୍ରତିରକ୍ଷା ଗବେଷଣା ଏବଂ ବିକାଶ ସଂଗଠନ (DRDO) ଏବଂ ରୁଷିଆର NPO ମାଶିନୋଷ୍ଟ୍ରୋଏନିଆର ମିଳିତ ପ୍ରୟାସରେ ବିକଶିତ ଏହି କ୍ଷେପଣାସ୍ତ୍ରର ନାମ ବ୍ରହ୍ମପୁତ୍ର ଏବଂ ମସ୍କୋ ନଦୀ ଦ୍ୱାରା ଅନୁପ୍ରାଣିତ । ଏହାର ବୈଶିଷ୍ଟ୍ୟ ହେଉଛି ଏହାର ଅବିଶ୍ୱସନୀୟ ଗତି । ଏହା ଶବ୍ଦର ଗତି (ମାକ୍ ୨.୮ ରୁ ମାକ୍ ୩) ଠାରୁ ପ୍ରାୟ ତିନି ଗୁଣ ବେଗରେ ଗତି କରେ । ୨୯୦ ରୁ ୮୦୦ କିଲୋମିଟର କ୍ଷମତା ସହିତ ସମୁଦ୍ରରେ ଗତି କରିପାରିବ । ରାଡାରକୁ ଚକମା ଦେଇ ସମୁଦ୍ରରୁ କିଛି ମିଟର ଉଚ୍ଚ ଏବଂ ଦରକାର ପଡିଲେ ୧୫ କିଲୋମିଟର ଉଚ୍ଚରେ ବି ଉଡାଣ ଭରିପାରିବ ।
