ନୂଆଦିଲ୍ଲୀ,୨୫/୧୦: ଭାରତ ପୁଣିଥରେ ଜାତିସଂଘରେ ପାକିସ୍ତାନ ଉପରେ ବର୍ଷିଛି । ଆତଙ୍କୀସ୍ଥାନକୁ ଆଇନା ଦେଖାଇଛି ଭାରତ । ପିଓକେରେ ମାନବାଧିକାର ଉଲ୍ଲଂଘନ ବନ୍ଦ କରିବାକୁ ପାକିସ୍ତାନକୁ ଚେତାବନୀ ଦେଇଛି ଭାରତ । ଭାରତ ସମଗ୍ର ବିଶ୍ୱକୁ ଗୋଟିଏ ପରିବାର ଭାବରେ ବିବେଚନା କରେ ଏବଂ ସବୁ ସମ୍ପ୍ରଦାୟର ଲୋକଙ୍କ ସହ ଯୋଡି ହୋଇ ରହିବା ବିଶ୍ୱାସ କରେ । ମୁଁ ଜୋର ଦେଇ କହିବାକୁ ଚାହୁଁଛି ଯେ, ଜମ୍ମୁ ଏବଂ କାଶ୍ମୀର ଭାରତର ଏକ ଅବିଚ୍ଛେଦ୍ୟ ଅଂଶ ଥିଲା, ଅଛି ଏବଂ ସର୍ବଦା ରହିବ ବୋଲି କହିଛନ୍ତି ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ପବର୍ଥନେନି ହରିଶ ।

​​​​​​​ଜାତିସଂଘରେ ଭାରତର ସ୍ଥାୟୀ ପ୍ରତିନିଧି ପବର୍ଥନେନି ହରିଶ କହିଛନ୍ତି, '' ଭାରତ ନିରନ୍ତର ଭାବରେ ସମସ୍ତ ସମାଜ ଏବଂ ଲୋକଙ୍କ ପାଇଁ ନ୍ୟାୟ, ମର୍ଯ୍ୟାଦା, ସୁଯୋଗ ଏବଂ ସମୃଦ୍ଧି ପାଇଁ ସମର୍ଥନ କରି ଆସିଛି । ଏହି କାରଣରୁ ଭାରତ ବହୁପାକ୍ଷିକତା, ଆନ୍ତର୍ଜାତୀୟ ସହଭାଗୀତା ଏବଂ ସହଯୋଗରେ ବିଶ୍ୱାସ ରଖେ । ଭାରତ ସର୍ବଦା ଗ୍ଲୋବାଲ୍ ସାଉଥ୍ ଭାଇଭଉଣୀମାନଙ୍କ ସହିତ ଛିଡ଼ା ହୋଇଛି । ଆମେ ଭାରତର ଗଣତାନ୍ତ୍ରିକ ପରମ୍ପରା ଏବଂ ସାମ୍ବିଧାନିକ ଢାଞ୍ଚା ଅନୁସାରେ ଆମର ମୌଳିକ ଅଧିକାର ବ୍ୟବହାର କରୁ । ଏହି ଧାରଣାଗୁଡ଼ିକ ପାକିସ୍ତାନ ପାଇଁ ଅପରିଚିତ । ଅବୈଧ ଭାବରେ ଦଖଲ କରିଥିବା ଅଞ୍ଚଳରେ ଚାଲିଥିବା ମାନବାଧିକାର ଉଲ୍ଲଂଘନ ପାକିସ୍ତାନକୁ ବନ୍ଦ କରିବାକୁ ଚେତାବନୀ ଦେଉଛୁ । ଏକାଠୀ ହୋଇ ଜାତିସଂଘକୁ ଏକ ନୂତନ ଯୁଗ ପାଇଁ ଉପଯୁକ୍ତ କରିବାର ଏହି ଦୃଷ୍ଟିକୋଣକୁ ସାକାର କରିବାକୁ ମୁଁ ସମସ୍ତ ସଦସ୍ୟ ରାଷ୍ଟ୍ରଙ୍କୁ ହାତ ମିଳାଇବାକୁ ଅନୁରୋଧ କରୁଛି ।''