ଭୁବନେଶ୍ୱର/କଟକ,୦୩/୦୪: ପୁଣି ୧୦ ମାସ ପରେ କଟକ ବାରବାଟୀ ଷ୍ଟାଡିୟମକୁ ଫେରିବ ଅନ୍ତର୍ଜାତୀୟ କ୍ରିକେଟ ମ୍ୟାଚ୍ । ଏଥର ଦିନିକିଆ ନୁହେଁ, ଦର୍ଶକ ଦେଖିବେ ଟି-ଟ୍ୱେଣ୍ଟି । ଭାରତ ଓ ଦକ୍ଷିଣ ଆଫ୍ରିକା ହେବେ ମୁହାଁମୁହିଁ । ଡିସେମ୍ବର ୯ ତାରିଖରେ ଖେଳାଯିବ ଏହି ମ୍ୟାଚ୍ । ବିସିସିଆଇ ତା’ର ଘରୋଇ ଅନ୍ତର୍ଜାତୀୟ ସୂଚୀ ଘୋଷଣା କରିବା ପରେ ଏ ବିଷୟ ଆଜି ସ୍ପଷ୍ଟ ହୋଇଛି ।
ଏ ଖବର ଜାଣିବା ପରେ ଓଡ଼ିଶାର କ୍ରିକେଟ୍ପ୍ରେମୀ ଉତ୍ସାହିତ ହୋଇପଡ଼ିଛନ୍ତି । ପୁଣି ବାରବାଟୀ ଷ୍ଟାଡିୟମରେ ଏକ ନୂଆ ଲଢ଼େଇ ଦେଖିବା ନେଇ ଏବେଠାରୁ ଦିନ ଗଣିବା ଆରମ୍ଭ କରିଛନ୍ତି । ଗତ ମାସ ୨୨ ତାରିଖରେ ଏ ସଂପର୍କିତ ଏକ ରିପୋର୍ଟ ଜାତୀୟ ଗଣମାଧ୍ୟମରେ ପ୍ରକାଶ ପାଇଥିଲା । ମାତ୍ର ବିସିସିଆଇ ପକ୍ଷରୁ ସୂଚୀ ଚୂଡ଼ାନ୍ତ ହୋଇ ନଥିବାରୁ ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ) ପାଖରେ କିଛି ସୂଚନା ନଥିଲା । ଗତ ଫେବ୍ରୁଆରୀ ୯ ତାରିଖରେ ବାରବାଟୀରେ ଭାରତ ଓ ଇଂଲଣ୍ଡ ମଧ୍ୟରେ ଦିନିକିଆ ମ୍ୟାଚ୍ ଖେଳାଯାଇଥିଲା । ଶେଷ ଥର କଟକରେ ୨୦୨୨ ଜୁନ ୧୨ ତାରିଖରେ ଭାରତ- ଦକ୍ଷିଣ ଆଫ୍ରିକା ଟି-ଟ୍ୱେଣ୍ଟି ମ୍ୟାଚ୍ ଖେଳିଥିଲେ ।
ଅକ୍ଟୋବରରେ ଇଣ୍ଡିଜ ଖେଳିବ ୨ ଟେଷ୍ଟ
ବିସିସିଆଇ ଘୋଷିତ କ୍ରୀଡ଼ାସୂଚୀ ଅନୁସାରେ, ୱେଷ୍ଟଇଣ୍ଡିଜ ଦଳ ପ୍ରଥମେ ଭାରତ ଗସ୍ତରେ ଆସି ଘରୋଇ ଦଳ ସହ ୨ଟି ଟେଷ୍ଟ ମ୍ୟାଚ୍ ଖେଳିବ । ପ୍ରଥମ ଟେଷ୍ଟ ଅକ୍ଟୋବର ୨ରୁ ଅହମ୍ମଦାବାଦରେ ଏବଂ ଦ୍ୱିତୀୟ ଟେଷ୍ଟ ୧୦ ତାରିଖରୁ କୋଲକାତାରେ ଆରମ୍ଭ ହେବ ।
ଦ.ଆଫ୍ରିକା ଖେଳିବ ୨ ଟେଷ୍ଟ, ୩ ଦିନିକିଆ ଓ ୫ ଟି-ଟ୍ୱେଣ୍ଟି
ୱେଷ୍ଟଇଣ୍ଡିଜ ଦଳ ବାହୁଡ଼ି ଯିବା ପରେ ନଭେମ୍ବର ମାସରେ ଦକ୍ଷିଣ ଆଫ୍ରିକା ଦଳ ଆସିବ । ଏହି ଗସ୍ତରେ ଦଳ ଏକ ପୂର୍ଣ୍ଣାଙ୍ଗ ସିରିଜ ଖେଳିବ। ଯେଉଁଥିରେ ରହିଛି ୨ଟି ଟେଷ୍ଟ, ୩ଟି ଦିନିକିଆ ଏବଂ ୫ଟି ଟି-ଟ୍ୱେଣ୍ଟି ।
ନଭେମ୍ବର ୧୪ରୁ ପ୍ରଥମ ଟେଷ୍ଟ ଦିଲ୍ଲୀରେ ଏବଂ ୨୨ ତାରିଖରୁ ଦ୍ୱିତୀୟ ଟେଷ୍ଟ ଗୌହାଟୀରେ ଆରମ୍ଭ ହେବ । ଏହାପରେ ୩୦ରୁ ଦିନିକିଆ ସିରିଜ୍ ଖେଳାଯିବ । ନଭେମ୍ବର ୩୦ରେ ପ୍ରଥମ ଦିନିକିଆ ରାଞ୍ଚିରେ, ଡିସେମ୍ବର ୩ରେ ଦ୍ୱିତୀୟ ଦିନିକିଆ ରାୟପୁରରେ ଏବଂ ୬ ତାରିଖରେ ଅନ୍ତିମ ମ୍ୟାଚ୍ ଭାଇଜାଗରେ ଖେଳାଯିବ । ଏହାପରେ ଆରମ୍ଭ ହେବ ଟି-ଟ୍ୱେଣ୍ଟି ସିରିଜ୍ ।
ସିରିଜର ପ୍ରଥମ ମ୍ୟାଚ୍ ଡିସେମ୍ବର ୯ ତାରିଖରେ କଟକ, ଦ୍ୱିତୀୟ ମ୍ୟାଚ୍ ୧୧ରେ ନୂଆ ଚଣ୍ଡୀଗଡ଼, ତୃତୀୟ ମ୍ୟାଚ୍ ୧୪ରେ ଧର୍ମଶାଳା, ଚତୁର୍ଥ ମ୍ୟାଚ୍ ୧୭ରେ ଲକ୍ଷେ୍ନø ଏବଂ ପଞ୍ଚମ ମ୍ୟାଚ୍ ୧୯ ତାରିଖରେ ଅହମ୍ମଦାବାଦରେ ଖେଳାଯିବାର ସୂଚୀ ଚୂଡ଼ାନ୍ତ ହୋଇଛି ।
