ବ୍ରିସବେନ,୧୩/୧୨: ଚଳିତ ବର୍ଡର-ଗାଭାସ୍କର ଟ୍ରଫିର ତୃତୀୟ ଟେଷ୍ଟ ପାଇଁ ଭାରତୀୟ ଦଳ ଗୁରୁବାର ଗାବା ଗ୍ରାଉଣ୍ଡରେ ଅଭ୍ୟାସ ଆରମ୍ଭ କରିଛି । ପୁନର୍ବାର ବିଜୟ ଧାରାକୁ ଫେରିବା ପାଇଁ ଭାରତୀୟ ଦଳ ନାଲି ବଲ୍କୁ ଆପଣେଇ ନେଇଛି । ଷ୍ଟାର୍ ପେସ ବୋଲର ଯଶପ୍ରୀତ ବୁମରା ଅଭ୍ୟାସ ଶିବିରକୁ ଫେରି ସମ୍ପୂର୍ଣ୍ଣ ଫିଟ ଥିବା ପ୍ରମାଣିତ କରିଛନ୍ତି । ଏସବୁ ବାଦ ସମସ୍ତଙ୍କ ନଜର ରହିଛି ରୋହିତ ଶର୍ମାଙ୍କ ବ୍ୟାଟିଂ ସ୍ଥାନ ଉପରେ । ଆଡିଲେଡରେ ନିମ୍ନ ମଧ୍ୟ କ୍ରମ (୬ନଂ ସ୍ଥାନ)ରେ ବ୍ୟାଟିଂ କରିଥିବା ରୋହିତ ଗାବାରେ ଓପନ କରିବା ନେଇ ଯଥେଷ୍ଟ ସମ୍ଭାବନା ରହିଛି ।
ଗୁରୁବାର ଗାବା ଗ୍ରାଉଣ୍ଡରେ ଭାରତୀୟ ଦଳର ଲମ୍ବା ଅଭ୍ୟାସ ଶିବିର ଚାଲିଥିଲା । ପ୍ରତ୍ୟେକ ଖେଳାଳି ଅଭ୍ୟାସକୁ ଓହ୍ଲାଇଥିଲେ । ସମସ୍ତଙ୍କ ନଜର ରହିଥିଲା ବୁମରା ଓ ରୋହିତଙ୍କ ଉପରେ । ଆଡିଲେଡ୍ରେ ବୁମରା ବାମ ଜଙ୍ଘରେ ଯନ୍ତ୍ରଣା ଅନୁଭବ କରିଥିଲେ । ତେଣୁ ସେ ଆହତ ଥିବା ଅଷ୍ଟ୍ରେଲିଆ ଗଣମାଧ୍ୟମରେ ପ୍ରକାଶ ପାଇଥିଲା । ଦ୍ୱିତୀୟ ଟେଷ୍ଟ ଶେଷ ହେବା ପରେ ଭାରତୀୟ ଦଳ ଆଡିଲେଡରେ ଗୋଟିଏ ଦିନ ଅଭ୍ୟାସ କରିଥିଲା ଓ ବୁମରା ଉକ୍ତ ଶିବିରରେ ଯୋଗ ଦେଇ ନଥିଲେ । ଫଳରେ ତାଙ୍କ ଫିଟ୍ନେସକୁ ନେଇ ଚିନ୍ତା ବଢିଥିଲା । କିନ୍ତୁ ଆଜି ସେ ନେଟ୍ସରେ ଦୀର୍ଘ ସମୟ ଧରି ବୋଲିଂ କରି ଆଲୋଚକଙ୍କୁ ଚୁପ୍ କରିଥିଲେ । ଉଭୟ ନୂଆ ଓ ପୁରୁଣା ବଲ୍ରେ ବୁମରା ବୋଲିଂ କରିଥିଲେ ।
ଭାରତୀୟ ଦଳରେ ରହିଥିବା ସମସ୍ତ ପେସ ବୋଲର ରୋହିତଙ୍କୁ ବୋଲିଂ କରୁଥିବା ଦେଖିବାକୁ ମିଳିଥିଲା । ବୁମରା, ମହମ୍ମଦ ସିରାଜ ଓ ଆକାଶଦୀପ ନେଟ୍ସରେ ରୋହିତଙ୍କୁ ନୂଆ ବଲ୍ରେ ବୋଲିଂ କରିଥିଲେ । ଗତ ଆଡ଼ିଲେଡ୍ ଟେଷ୍ଟ ପୂର୍ବରୁ ରୋହିତ ପୁରୁଣା ପିଙ୍କ ବଲ୍ରେ ଅଭ୍ୟାସ କରୁଥିଲେ । ହେଲେ ଆଜି ନୂଆ ବଲ୍ରେ ବ୍ୟାଟିଂ କରି ଓପନିଂ ସ୍ଥାନକୁ ଫେରୁଥିବାର ସଂକେତ ଦେଇଥିଲେ। ତାଙ୍କ ସହ ଗୋଟିଏ ନେଟ୍ରେ ଯଶସ୍ୱୀ ଜୈସ୍ୱାଲ ମଧ୍ୟ ଅଭ୍ୟାସ କରିଥିଲେ । ଉଭୟଙ୍କ ଏକତ୍ର ଅଭ୍ୟାସ ଭାରତୀୟ ଦଳର ବ୍ୟାଟିଂ କ୍ରମକୁ ସ୍ପଷ୍ଟ କରିଦେଇଥିଲା । ରୋହିତ ଖେଳିଥିବା ଶେଷ ୧୨ଟି ଟେଷ୍ଟରେ ମାତ୍ର ଥରେ ଅର୍ଦ୍ଧଶତକ ଅର୍ଜନ କରିଛନ୍ତି ଓ ୮ ଥର ଦୁଇ ଅଙ୍କ ଛୁଇଁ ପାରି ନାହାନ୍ତି । ତେଣୁ ଭାରତର ଆଡିଲେଡ ଟେଷ୍ଟ ପରାଜୟ ପରଠୁ ରୋହିତଙ୍କୁ ସମାଲୋଚନା କରାଯାଉଛି ।
ଅଭ୍ୟାସ ଶିବିରରୁ ବୋଲିଂ ବିଭାଗରେ ପରିବର୍ତ୍ତନ ହେବାର ସଂକେତ ମିଳିଥିଲା । ଦ୍ୱିତୀୟ ଟେଷ୍ଟରେ ବିଫଳ ହୋଇଥିବା ହର୍ଷିତ ରାଣାଙ୍କ ସ୍ଥାନରେ ଆକାଶ ଦୀପ ତୃତୀୟ ଟେଷ୍ଟ ଖେଳିବାକୁ ଯାଉଥିବା ଅଭ୍ୟାସରୁ ଏକ ପ୍ରକାର ସ୍ପଷ୍ଟ ହୋଇଥିଲା । ପ୍ରଥମତଃ ଗାବା ପିଚ୍ରେ ବଲ୍ ଅପେକ୍ଷାକୃତ ଅଧିକ ସୁଇଂ ହେବ । ଦ୍ୱିତୀୟତଃ ଆକାଶ ଦୀପ ନିଜର ଲାଇନ ଓ ଲେଙ୍ଗଥ୍କୁ ନେଇ ବେଶ ଶୃଙ୍ଖଳିତ । ଗାବା ପିଚ୍ରେ ସେ ସଫଳ ହେବା ନିଶ୍ଚିତ । ନଚେତ ଶୃଙ୍ଖଳିତ ବୋଲିଂ କରି ରନ୍ ଗତରେ ଅଂକୁଶ ଲଗାଇବାର କ୍ଷମତା ତାଙ୍କ ନିକଟରେ ରହିଛି । ଆଜି ସେ ନୂଆ ବଲ୍ରେ ବୋଲିଂ ଅଭ୍ୟାସ କରିଥିଲେ ।
