ନୂଆଦିଲ୍ଲୀ,୦୯ /୦୭: ଆସନ୍ତାକାଲିଠାରୁ (ଗୁରୁବାର) ଐତିହାସିକ ଲର୍ଡ୍ସ କ୍ରିକେଟ୍ ଗ୍ରାଉଣ୍ଡ୍ରେ ଆରମ୍ଭ ହେବ ଚଳିତ ଆଣ୍ଡରସନ- ତେନ୍ଦୁଲକର ଟ୍ରଫିର ତୃତୀୟ ଟେଷ୍ଟ । ଦ୍ୱିତୀୟ ଟେଷ୍ଟ ଜିତି ୧-୧ରେ ସିରିଜ ବରାବର କରିବା ପରେ ଭାରତୀୟ ଦଳ ତୃତୀୟ ଟେଷ୍ଟ ପାଇଁ ପ୍ରସ୍ତୁତି ଆରମ୍ଭ କରିଛି । ବହୁ ଖେଳାଳି ମଙ୍ଗଳବାର ଅଭ୍ୟାସରୁ ବିରତି ନେଇଥିଲେ ହେଁ ଷ୍ଟାର ପେସ୍ ବୋଲର ଯଶପ୍ରୀତ ବୁମରା ପ୍ରତ୍ୟାବର୍ତ୍ତନ ପାଇଁ ଉତ୍ସୁକତାର ସହ ଅପେକ୍ଷା କରିଥିବା ଅଭ୍ୟାସ ଶିବିରରୁ ସ୍ପଷ୍ଟ ହୋଇଛି । ଲର୍ଡ୍ସ ଗ୍ରାଉଣ୍ଡରେ ବୁମରା ମୁଖ୍ୟ ଆକର୍ଷଣ ସାଜିଥିଲେ । ଶେଷ ଥର ପାଇଁ ଜୁନ ୨୪ ତାରିଖରେ ବୁମରାଙ୍କୁ ବୋଲିଂ କରୁଥିବା ଦେଖିବାକୁ ମିଳିଥିଲା । ହେଡିଂଲେରେ ଅନୁଷ୍ଠିତ ପ୍ରଥମ ଟେଷ୍ଟର ଏହା ଥିଲା ପଞ୍ଚମ ଦିବସ । ଉକ୍ତ ଟେଷ୍ଟରେ ସେ ୪୩.୪ ଓଭର ବୋଲିଂ କରିଥିଲେ । ୧୫ଦିନ ପରେ ସେ ପୁଣିଥରେ ମ୍ୟାଚ୍କୁ ଓହ୍ଲାଇବେ ।
ବୁମରାଙ୍କ କାର୍ଯ୍ୟଭାରକୁ ସୀମିତ ରଖିବା ପାଇଁ ଯୋଜନା କରାଯାଇଥିବାରୁ ତାଙ୍କୁ ଦ୍ୱିତୀୟ ଟେଷ୍ଟରୁ ବିଶ୍ରାମ ଦିଆଯାଇଥିଲା । ତାଙ୍କ ସ୍ଥାନରେ ଆକାଶ ଦୀପ ଖେଳିଥିଲେ ଓ ୧୦ଟି ୱିକେଟ୍ ନେଇ ବିଜୟରେ ପ୍ରମୁଖ ଭୂମିକା ନିର୍ବାହ କରିଥିଲେ । ଲର୍ଡ୍ସରେ ବୁମରା ଫେରିବା ନିଶ୍ଚିତ ଥିଲେ ମଧ୍ୟ ଆକାଶ ଦୀପ ନିଜ ସ୍ଥାନ ବଜାୟ ରଖିବେ । ଫଳରେ ପ୍ରସିଦ୍ଧ କ୍ରିଷ୍ଣାଙ୍କୁ ଏକାଦଶରୁ ବାଦ ଦିଆଯିବ । ଚତୁର୍ଥ ପେସ ବୋଲର ଭାବେ ଅର୍ଶଦୀପ ରହିଛନ୍ତି ଓ ନିୟମିତ ଅଭ୍ୟାସ କରୁଛନ୍ତି । ଲର୍ଡ୍ସ ପିଚ୍ ପେସ ବୋଲରଙ୍କୁ ସୁହାଇଲେ ନୀତିଶ କୁମାର ରେଡ୍ଡୀଙ୍କ ସ୍ଥାନରେ ଅର୍ଶଦୀପଙ୍କୁ ଏକାଦଶରେ ସୁଯୋଗ ମିଳିବ ବୋଲି ଆଶା କରାଯାଉଛି । ଆଜି ବୁମରା ଦୀର୍ଘ ୧ଘଣ୍ଟା ଧରି ବୋଲିଂ ଅଭ୍ୟାସ କରିଥିଲେ । ଦ୍ୱିତୀୟ ଟେଷ୍ଟ ଖେଳିଥିବା ପେସ୍ ବାହିନୀ ଆଜି ବିଶ୍ରାମ ନେଇଥିଲା । ବୁମରାଙ୍କ ସହ ସର୍ଦୁଲ ଠାକୁର, ଅର୍ଶଦୀପ ସିଂହ, ନୀତିଶ କୁମାର ରେଡ୍ଡୀ ପ୍ରମୁଖ ବୋଲିଂ କରିଥିଲେ । ନେଟ୍ସରେ ଆଜି ବୁମରାଙ୍କୁ କରୁଣ ନାଏର, ସାଇ ସୁଦର୍ଶନ, ଅଭିମନ୍ୟୁ ଈଶ୍ୱରନ, ଧ୍ରୁବ ଜୁରେଲ ପ୍ରମୁଖ ସାମ୍ନା କରିଥିଲେ । ଆଜି ଅଭ୍ୟାସ ସେଭଳି ବାଧ୍ୟତାମୂଳକ ନଥିଲା । କେଏଲ୍ ରାହୁଲ, ଶୁଭମନ ଗିଲ୍, ଯଶସ୍ୱୀ ଜୈସ୍ୱାଲ, ରିଷଭ ପନ୍ତ, ୱାସିଂଟନ ସୁନ୍ଦର ପ୍ରମୁଖ ଅଭ୍ୟାସରୁ ବିରତ ରହିଥିଲେ । ମାତ୍ର ସବୁ ଖେଳାଳି ଗ୍ରାଉଣ୍ଡ୍ରେ ଉପସ୍ଥିତ ରହିଥିଲେ ।
ବ୍ୟାଟରଙ୍କ ପାଇଁ ଚ୍ୟାଲେଞ୍ଜ ହେବ ଲର୍ଡ୍ସ ପିଚ୍ - ତୃତୀୟ ଟେଷ୍ଟ ପାଇଁ ପ୍ରସ୍ତୁତ କରାଯାଇଥିବା ପିଚ୍ ବ୍ୟାଟରଙ୍କ ପାଇଁ କଡ଼ା ଚ୍ୟାଲେଞ୍ଜ ଆଣିବ ବୋଲି ଭାରତୀୟ ଦଳର ବ୍ୟାଟିଂ କୋଚ ସୀତାଂଶୁ କୋଟକ ପ୍ରକାଶ କରିଛନ୍ତି । ଆଜି ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଯୋଗ ଦେଇ ସେ କହିଛନ୍ତି, ପ୍ରଥମ ୨ଟି ଟେଷ୍ଟର ପିଚ୍ ତୁଳନାରେ ଲର୍ଡ୍ସ ପିଚ୍ ଅଧିକ ସବୁଜ ଦେଖାଯାଉଛି । ପିଚ୍ରେ ଘାସ ଭରି ରହିଛି । ନିୟମିତ ଭାବେ ପାଣି ସିଞ୍ଚନ ହେଉଛି । ଯାହା ଜଣା ପଡ଼ୁଛି, ପେସ୍ ବୋଲରମାନେ ପିଚ୍ର ଭରପୁର ଫାଇଦା ଉଠାଇ ପାରିବେ । ପ୍ରଥମ ୨ଟି ଇନିଂସରେ ବ୍ୟାଟିଂ କଷ୍ଟକର ହେବ । ତଥାପି ଆମେ ପ୍ରସ୍ତୁତ ଅଛୁ । ଏଠାରେ କ୍ରିଜ୍ରେ ଯେତେ ଅଧିକ ସମୟ କଟାଇ ହେବ, ସେତେ ଅଧିକ ସ୍କୋର ହୋଇ ପାରିବ । ଏଜବାଷ୍ଟନରେ(ଦ୍ୱିତୀୟ ଟେଷ୍ଟ)ର ପିଚ୍କୁ ନେଇ ଇଂଲଣ୍ଡ ଅଧିନାୟକ ବେନ ଷ୍ଟୋକ୍ସ ଦେଇଥିବା ମନ୍ତବ୍ୟକୁ କୋଟକ ଖଣ୍ଡନ କରିଛନ୍ତି ।
ଷ୍ଟୋକ୍ସ କହିଥିଲେ, ଏଜବାଷ୍ଟନରେ ଉପମହାଦେଶର ପିଚ୍ ଭଳି ଏକ ପିଚ ପ୍ରସ୍ତୁତ କରାଯାଇଥିଲା । ମାତ୍ର ଏହା ଉପରେ କୋଟକ କହିଛନ୍ତି, ମୋ ମତରେ ଏଜବାଷ୍ଟନ ପିଚ୍ ଭାରତୀୟ ପିଚ୍ ଭଳି ନଥିଲା । ଏଠାରେ ପାଖା ପାଖି ୪୦ ଓଭର ପର୍ଯ୍ୟନ୍ତ ଆମ ପେସ୍ ବୋଲରମାନେ ବଲ୍କୁ ସୁଇଂ କରାଉଥିଲେ । ପଞ୍ଚମ ଦିବସରେ ପିଚ୍ରୁ ଟର୍ଣ୍ଣ ମିଳିଥିଲା । ସେମାନେ ବଡ଼ ସ୍କୋର କରିବାର ଲକ୍ଷ୍ୟ ନେଇ ଏକ ଶକ୍ତ ପିଚ୍ ପ୍ରସ୍ତୁତ କରି ଉପରେ ଘାସ ଛାଡ଼ି ଦେଇଛନ୍ତି । ଫଳରେ ପିଚ ଫାଟୁ ନଥିଲେ ହେଁ ଭରପୁର ରନ ସଂଗୃହୀତ ହେଉଛି । ଉପମହାଦେଶର କୌଣସି ପିଚ୍ ଏଭଳି ନୁହେଁ । ୪ଦିନ ଧରି ପେସ୍ ବୋଲରମାନଙ୍କ ଫୁଟ୍ ମାର୍କ ଉପରେ ବଲ୍ ପକାଇ ସ୍ପିନରମାନେ ଟର୍ଣ୍ଣ କରିଥିଲେ । ମାତ୍ର ପିଚ୍ରୁ ସ୍ପିନରଙ୍କୁ ସାମାନ୍ୟ ସହାୟତା ମିଳି ନଥିଲା ।
