ନୂଆଦିଲ୍ଲୀ: ଚୀନ୍ ଚକ୍ରାନ୍ତ ‘ଅପରେସନ ସିନ୍ଦୂର’ରେ ଫେଲ୍ । ଭାରତକୁ ହରାଇବାକୁ ଡ୍ରାଗନ ରଚିଥିଲା ଷଡ଼ଯନ୍ତ୍ର । ପାକିସ୍ତାନକୁ ଦେଉଥିଲା ଲାଇଭ୍ ଅପଡେଟ୍ । ଏକ ସାଙ୍ଗରେ ମାତ୍ ଖାଇଲେ ତିନି ଶତ୍ରୁ । ଅପରେସନ ସିନ୍ଦୂରରେ ଭାରତୀୟ ସେନା ପାଇଁ ଥିଲା ବଡ଼ ଚ୍ୟାଲେଞ୍ଜ । ବ୍ୟାଟେଲ୍ ଗ୍ରାଉଣ୍ଡରେ ଭାରତ କେବଳ ପାକିସ୍ତାନ ସହ ନୁହେଁ ବରଂ ପାକ୍ର ମିତ୍ର ଦେଶ ମାନଙ୍କ ସହିତ ଲଢ଼େଇ କରୁଥିଲା । ଚିର ଶତ୍ରୁ ଚୀନ୍ ଏବଂ ତୁର୍କୀ, ଭାରତ ସହିତ ଛାୟା ଯୁଦ୍ଧ କରୁଥିଲେ । ତୁର୍କୀ ଇସଲାମାବାଦକୁ ଅସ୍ତ୍ରଶସ୍ତ୍ର ଯୋଗାଇଥିବା ବେଳେ ଡ୍ରାଗନ ଦେଉଥିଲା ସଠିକ୍ ଇନପୁଟ୍ ଡାଟା । ସାମରିକ କାର୍ଯ୍ୟକଳାପର ଲାଇଭ୍ ସୂଚନା ଦେଉଥିଲା ବେଜିଂ । ମାତ୍ର ଭାରତୀୟ ସେନା ଏହାକୁ ସଫଳତାର ସହିତ ହ୍ୟାଣ୍ଡଲ୍ କରି ପାକିସ୍ତାନକୁ ମାତ୍ ଦେଇଥିଲା । ଏନେଇ ବଡ଼ ଖୁଲାସା କରିଛନ୍ତି ସେନା ଉପମୁଖ୍ୟ ଲେଫ୍ଟନାଣ୍ଟ ଜେନେରାଲ୍ ରାହୁଲ ଆର୍ ସିଂହ ।
ଫିକି ଦ୍ୱାରା ଆୟୋଜିତ ‘ନ୍ୟୁ ଏଜ୍ ମିଲିଟାରୀ ଟେକ୍ନୋଲଜି’ କାର୍ଯ୍ୟକ୍ରମରେ ସାମିଲ୍ ହୋଇ ସେନା ଉପମୁଖ୍ୟ ଦୁଇ ଶତ୍ରୁ ଦେଶର ମୁଖା ଖୋଲି ଦେଇଛନ୍ତି । ସେ କହିଛନ୍ତି, ଭାରତୀୟ ସେନା ‘ଅପରେସନ ସିନ୍ଦୂର’ରେ ଏକସଙ୍ଗରେ ତିନି ଶତ୍ରୁ ଦେଶକୁ ପରାସ୍ତ କରିଛି । ପାକ୍ ସେନା ସାମ୍ନା ପଟକୁ ଆକ୍ରମଣ କରୁଥିବା ବେଳେ ତା ପଛ ପଟୁ ସମର୍ଥନ କରିଥିଲେ ଚୀନ୍ ଓ ତୁର୍କୀ । ଯୁଦ୍ଧ କେବଳ ଗୋଟିଏ ସୀମାରୁ ହେଉଥିଲା । ମାତ୍ର ଲଢ଼େଇ ତିନି ଦେଶ କରୁଥିଲେ । ପାକିସ୍ତାନକୁ ଅତ୍ୟାଧୁନିକ ଡ୍ରୋନ ଯୋଗାଉଥିଲା ତୁର୍କୀ । ଆଉ ତାକୁ ସଂଚାଳନ ପାଇଁ ଲାଇଭ୍ ଇନପୁଟ୍ ଦେଉଥିଲା ଚୀନ୍ । ଏହାଛଡ଼ା ଯୁଦ୍ଧରେ ପାକିସ୍ତାନ ବ୍ୟବହାର କରିଥିବା ୮୧ ପ୍ରତିଶତ ଅସ୍ତ୍ରଶସ୍ତ୍ର ଚୀନ୍ର ଥିଲା । ଡ୍ରାଗନ କିଛି ମାରାତ୍ମକ ମିସାଇଲକୁ ପାକିସ୍ତାନ ମାଧ୍ୟମରେ ଆକ୍ରମଣ କରି ପରୀକ୍ଷଣ କରିଥିଲା । ଭାରତ-ପାକିସ୍ତାନ ସଂଘର୍ଷ, ଚୀନ୍ ପାଇଁ ଏକ‘ଲାଇଭ୍ ଲ୍ୟାବ’ଥିଲା ବୋଲି ଉପସେନା ପ୍ରମୁଖ ଲେଫ୍ଟନାଣ୍ଟ ଜେନେରାଲ୍ ରାହୁଲ ଆର୍ ସିଂହ କହିଛନ୍ତି ।
ଅପରେସନ ସିନ୍ଦୂରରେ ଭାରତୀୟ ସେନାର ପ୍ରଭାବଶାଳୀ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା । ଅନ୍ତିମ ଘଣ୍ଟାରେ ପଡ଼ୋଶୀ ଦେଶର ୯ଟି ସ୍ଥାନକୁ ଟାର୍ଗେଟ୍ ଲକ୍ କରାଯାଇଥିଲା । ସୁପରସୋନିକ୍ ବାଲାଷ୍ଟିକ୍ ମିସାଇଲ୍ ବ୍ରହ୍ମୋସ ମାଡ଼ରେ ଛାନିଆ ହୋଇଯାଇଥିଲା ପାକିସ୍ତାନ । ଆଉ ବାଧ୍ୟ ହୋଇ ମୁଣ୍ଡ ନୁଆଇଁଥିଲା ଏବଂ ତୁରନ୍ତ ଅସ୍ତ୍ରବିରତି ପାଇଁ ଆବେଦନ କରିଥିଲା । କାରଣ ପାକିସ୍ତାନ ଜାଣିଥିଲା ପାଲଟା ଜବାବ ଦେବାକୁ ଚେଷ୍ଟା କଲେ ସ୍ଥିତି ଆହୁରି ଭୟଙ୍କର ହେବ । ଫିକିରେ ସେନା ଉପମୁଖ୍ୟ ଭାରତର ଏୟାର ଡିଫେନ୍ସ ସିଷ୍ଟମକୁ ପ୍ରଶଂସା କରିଛନ୍ତି । ଏହାଛଡ଼ା ଭବିଷ୍ୟତରେ ଅଧିକ ସତର୍କ ରହିବାକୁ ପରାମର୍ଶ ମଧ୍ୟ ଦେଇଛନ୍ତି ।
ପହଲଗାମ ଆତଙ୍କବାଦୀ ଆକ୍ରମଣ ପରେ ଆକ୍ସନକୁ ଆସିଥିଲେ ଭାରତ ସରକାର । ଆଉ ସେନାକୁ ଖୋଲାଖୋଲି ଛାଡ଼ି ଦେଇଥିଲେ । ବାୟୁସେନା ଅପରେସନ ସିନ୍ଦୂର ଲଞ୍ଚ କରି ପିଓକେ ସହିତ ପାକିସ୍ତାନରେ ଥିବା ଆତଙ୍କୀ ଆଡ୍ଡାକୁ ଟାର୍ଗେଟ୍ କରି ଧ୍ବସ୍ତବିଧ୍ବସ୍ତ କରି ଦେଇଥିଲା । ଏହା ପରେ ଆରମ୍ଭ ହୋଇଥିଲା ଅସଲ ଲଢ଼େଇ । ଯେଉଁଥିରେ ପାକିସ୍ତାନ ସହିତ ଚୀନ୍ ଏବଂ ତୁର୍କୀକୁ ଏକସାଙ୍ଗରେ ପରାସ୍ତ କରିଛି ଭାରତୀୟ ସେନା । ....
