ନୂଆଦିଲ୍ଲୀ,୨୬/୦୫: ଭାରତୀୟ ଫାର୍ମା ଶିଳ୍ପ ବର୍ତ୍ତମାନ ଚୀନକୁ କଡ଼ା ଟକ୍କର ଦେଉଛି । ଆମେରିକା ଏବଂ ଚୀନ ମଧ୍ୟରେ ଜୋରଦାର ହୋଇଥିବା ବାଣିଜ୍ୟ ଯୁଦ୍ଧରୁ ଭାରତୀୟ ଫାର୍ମା ଶିଳ୍ପକୁ ଲାଭ ମିଳୁଛି । ଏହି କ୍ରମରେ କମ୍ପାନି ଗୁଡ଼ିକ ଏବେ ସେମାନଙ୍କ ଅପରେସନକୁ ଜୋରଦାର କରିଛନ୍ତି । ବର୍ତ୍ତମାନ ଅନେକ ଭାରତୀୟ ଫାର୍ମା କମ୍ପାନି ବିଦେଶୀ କମ୍ପାନିଙ୍କ ସହ ଡିଲ୍ କରୁଛନ୍ତି । ମୋଟାମୋଟି ଭାବେ କହିବାକୁ ଭାରତୀୟ ଫାର୍ମା ଶିଳ୍ପ ଚୀନ ଲାଗି ମୁଣ୍ଡ ବିନ୍ଧା ପାଲଟିଥିବା କୁହାଯାଉଛି ।
ଇକୋନୋମିକ ଟାଇମ୍ସର ଏକ ରିପୋର୍ଟ ମୁତାବକ, ସୁବେନ ଫାର୍ମାର ଅଧ୍ୟକ୍ଷ ବିକେଶ ଶର୍ମା ନିକଟରେ ଏକ ବଡ ଡିଲ ଲାଗି ବିଦେଶୀ କମ୍ପାନିଙ୍କ ସହ ଆଲୋଚନା କରିଛନ୍ତି । ଏହି କମ୍ପାନି ଔଷଧ ପ୍ରସ୍ତୁତିରେ ଆବଶ୍ୟକୀୟ ଜରୁରୀ ସାମଗ୍ରୀ ଉତ୍ପାଦନ କରୁଛି । ହାଇଦ୍ରାବାଦ ଭିତ୍ତିକ ଏହି କମ୍ପାନି ନୂଆ ଟେକ୍ନୋଲୋଜି ଉପରେ କାମ କରୁଥିବା ଏକ କମ୍ପାନିଙ୍କୁ ଅଧିଗ୍ରହଣ କରିବାକୁ ଚାହୁଁଛି । ଏହା ଦ୍ୱାରା ଆମେରିକା, ୟୁରୋପର ବିଭିନ୍ନ ଦେଶ ଗୁଡ଼ିକରେ ଏହାର ସାମଗ୍ରୀ ଦ୍ୱାରା ଉପସ୍ଥିତି ଦୃଢ଼ କରିବ ।
ଏହା ପୂର୍ବରୁ ଡିସେମ୍ବରରେ ସୁବେନ ଏନର୍ଜି ବାୟୋ ଇଙ୍କର ଅଧିକାଂଶ ଅଂଶଧନ କ୍ରୟ କରିଥିଲା । ଏହି କମ୍ପାନି ଆମେରିକାର ପ୍ରିନ୍ସଟନରେ ରହିଛି । ଏହା ଏକ ରିସର୍ଚ୍ଚ କମ୍ପାନି ହୋଇଥିବା ବେଳେ କର୍କଟ ଔଷଧ ପ୍ରସ୍ତୁତ କରୁଛି । ସୁବେନ ଏହି କମ୍ପାନିକୁ ୬୫ ନିୟୁତ ଡଲାରରେ କ୍ରୟ କରୁଛି । ଏହି ଡିଲ୍ ଦ୍ୱାରା ସୁବେନ କଣ୍ଟ୍ରାକ୍ଟ ଡେଭଲପମେଣ୍ଟ ଆଣ୍ଡ୍ ମାନୁଫାକଚରିଂ ଅର୍ଗାନାଇଜେସନ (ସିଡିଏମ୍ଓ) ବଜାରରେ ଏକ ପ୍ରମୁଖ କମ୍ପାନି ଭାବେ ଉଭା ହେବ ।
ସିଡିଏମ୍ଓ ବର୍ଗର କମ୍ପାନିଗୁଡ଼ିକ ସାଧାରଣତଃ ଅନ୍ୟ କମ୍ପାନି ଲାଗି ମେଡିସିନ ପ୍ରସ୍ତୁତ କରିଥାନ୍ତି । ଏହା ସହ ମେଡିସନ ଗୁଡ଼ିକର ବଜାରରେ ପହଞ୍ଚ ଉପରେ ମଧ୍ୟ ଏହି ବର୍ଗର କମ୍ପାନି କାମ କରିଥାନ୍ତି । ଏହା ମଧ୍ୟରେ ବାୟୋକନ କମ୍ପାନି ସିଞ୍ଜିନ ଇଣ୍ଟରନ୍ୟାଶନାଲ ଆମେରିକାର ୱାଲ୍ଟିମୋରରେ ଏମର୍ଜେଣ୍ଟ ବାୟୋସଲ୍ୟୁଶନ ନାମକ ଏକ କମ୍ପାନିକୁ କ୍ରୟ କରିଛି । ଏହି କମ୍ପାନି ପ୍ରୋଟିନ ଏବଂ ଜିନ ଭଳି ବର୍ଗରେ ମେଡିସିନ ପ୍ରସ୍ତୁତ କରୁଛି ।
୩୬.୫ ନିୟୁତ ଡଲାରରେ ଏହି ଡିଲ୍ ହୋଇଛି । ସିଞ୍ଜିନ ଇଣ୍ଟରନ୍ୟାଶନାଲର ଏମ୍ଡି ତଥା ସିଇଓ ପିଟର ଭ୍ୟାନ୍ସ କହିଛନ୍ତି, ଏହି ଡିଲ ଦ୍ୱାରା ଆମେରିକା ବଜାରରେ ଉପସ୍ଥିତି ଦୃଢ଼ କରିବାରେ ସହାୟକ ହେବ । ଏବେ ଭାରତର ସିଡିଏମ୍ଓ ଗୁଡିକ ପାଶ୍ଚାତ୍ୟ ଦେଶର ପ୍ରମୁଖ କମ୍ପାନିଗୁଡ଼ିକ ଲାଗି ମେଡିସିନ ପ୍ରସ୍ତୁତ କରୁଛନ୍ତି । ସେହିଭଳି ଆମେରିକା ଏବଂ ୟୁରୋପ ଭିତ୍ତିକ କମ୍ପାନି ଗୁଡିକୁ ଅଧିଗ୍ରହଣ କରି ନିଜ କ୍ଷମତା ବୃଦ୍ଧି କରୁଛନ୍ତି ।
ପ୍ରକ୍ରିୟା ସହ ଜଣେ ବରିଷ୍ଠ ଅଧିକାରୀ କହିଛନ୍ତି, ଭାରତୀୟ ଫାର୍ମା କମ୍ପାନିଗୁଡିକ ବିଦେଶୀ କମ୍ପାନି ଅଧିଗ୍ରହଣ ସୁଯୋଗ ହାତଛଡା କରିବାକୁ ଚାହୁଁନାହାନ୍ତି । କର୍କଟ, ଜୀନଥେରାପି ଏବଂ ବାୟୋଲୋଜି ଭଳି ବର୍ଗର କମ୍ପାନିଙ୍କ ଉପରେ ସେମାନଙ୍କ ନଜର ରହିଛି । ଚୀନ ଉପରେ ଏବେ ବିଶ୍ୱ ବଜାର କମ୍ପାନିଗୁଡ଼ିକ ନିର୍ଭରତା କମାଇବାକୁ ଚାହୁଁଛନ୍ତି । ଆମେରିକା ଏବଂ ଚୀନ ମଧ୍ୟରେ ଲାଗି ରହିଥିବା ସଙ୍କଟ ଯୋଗୁ କମ୍ପାନି ଗୁଡ଼ିକ ଚୀନ ବାହାରେ ଏକ ବିକଳ୍ପ ବଜାର ଉପରେ ନଜର ରଖିଛନ୍ତି ।
ଲୋଏଷ୍ଟ୍ରୋ ନାମକ ଏକ କନସଲଟିଂ ଫାର୍ମ ଅନୁସାରେ ପାଶ୍ଚାତ୍ୟ ଦେଶ ଗୁଡ଼ିକ ନିଜ ଦେଶରେ ଫ୍ୟାକ୍ଟ୍ରି ସ୍ଥାପନ କରୁଛନ୍ତି । ଏହା ଦ୍ୱାରା ଉଭୟ ଅନୁପାଳନ ଏବଂ ଯେଭଳି ମେଡିସିନ ଯୋଗାଣରେ କୌଣସି ସମସ୍ୟା ରହିବ ନାହିଁ ।
