ଲକ୍ଷ୍ନୌ ୦୪/୦୪: ଚଳିତ ଆଇପିଏଲ୍ର ୧୬ତମ ଲିଗ୍ ମୁକାବିଲାରେ ଆଜି ଲକ୍ଷ୍ନୌ ସୁପରଜାଏଣ୍ଟ୍ସ ଘରୋଇ ଗ୍ରାଉଣ୍ଡ୍ରେ ମୁମ୍ବାଇ ଇଣ୍ଡିଆନ୍ସକୁ ଭେଟିବାକୁ ଯାଉଛି । ଏକାନ୍ନା ଷ୍ଟାଡ଼ିୟମ୍ରେ ଏକ ଘମାଘୋଟ ଲଢ଼େଇ ପାଇଁ ଉଭୟ ଦଳ ପ୍ରସ୍ତୁତ ରହିଛନ୍ତି । ଏଥିସହ ଫୋକସ୍ରେ ରହିଛି ଉଭୟ ଦଳର ବ୍ୟାଟିଂ ବିଭାଗ । ଉଭୟ ଦଳରେ ତାରକା ଖେଳାଳି ରହିଥିଲେ ହେଁ ଏପର୍ଯ୍ୟନ୍ତ ଅଧିକାଂଶ ବ୍ୟାଟର ଫର୍ମ ଫେରି ପାଇନାହାନ୍ତି ।
ମୁମ୍ବାଇ ଇଣ୍ଡିଆନ୍ସ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଚେନ୍ନାଇ ସୁପରକିଙ୍ଗ୍ସ ଓ ଗୁଜରାଟ ଟାଇଟନ୍ସ ଠାରୁ ପରାଜିତ ହେବା ପରେ ତୃତୀୟ ମ୍ୟାଚ୍ରେ କୋଲକାତା ନାଇଟ ରାଡଇର୍ସକୁ ହରାଇ ପଏଣ୍ଟ ଖାତା ଖୋଲିଥିଲା । ଏଣିକି ବିଜୟ ଧାରାରେ ବ୍ରେକ୍ ଲଗାଇବାକୁ ଚାହୁଁନାହିଁ ମୁମ୍ବାଇ ଇଣ୍ଡିଆନ୍ସ । ସମସ୍ତ ତ୍ରୁଟି ସୁଧାରି ଆଜି ଆଉ ୨ପଏଣ୍ଟ ହାତେଇବାକୁ ଦଳ ଉଦ୍ୟମ କରିବ ।
ସୁପରଜାଏଣ୍ଟ୍ସ ପ୍ରଦର୍ଶନରେ ଉତ୍ଥାନ ପତନ ଜାରି ରହିଛି । ପ୍ରଥମ ମ୍ୟାଚ୍ରେ ଦଳ ଦିଲ୍ଲୀ କ୍ୟାପିଟାଲ୍ସ ଠାରୁ ପରାଜିତ ହୋଇଥିଲା ଓ ପରବର୍ତ୍ତୀ ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦକୁ ହରାଇଥିଲା । ମାତ୍ର ଏହାପରେ ଦଳ ପଞ୍ଜାବ କିଙ୍ଗ୍ସ ଠାରୁ ପରାଜିତ ହୋଇ ପଏଣ୍ଟ ତାଲିକାର ଷଷ୍ଠ ସ୍ଥାନକୁ ଖସିଛି । ଘରୋଇ ଗ୍ରାଉଣ୍ଡ୍ରେ ବିଜୟଧାରାକୁ ଫେରିବା ପାଇଁ ପନ୍ତବାହିନୀ ବ୍ୟାକୁଳ । ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଆଧିପତ୍ୟ ଜାରି ରଖିବାକୁ ସୁପରଜାଏଣ୍ଟ୍ସ ପ୍ରୟାସ କରିବ । ପୂର୍ବ ରେକର୍ଡ ସୁପରଜାଏଣ୍ଟ୍ସ ପକ୍ଷରେ ରହିଛି । ଉଭୟ ଦଳ ମଧ୍ୟରେ ମୋଟ୍ ୬ଟି ମ୍ୟାଚ୍ ଖେଳାଯାଇଛି । ଏଥିରୁ ସୁପରଜାଏଣ୍ଟ୍ସ ୫ଟି ମ୍ୟାଚ୍ରେ ବିଜୟୀ ହୋଇଛି । ମୁମ୍ବାଇ ଇଣ୍ଡିଆନ୍ସ ଖାତାରେ ରହିଛି ମାତ୍ର ଗୋଟିଏ ବିଜୟ । ଉଭୟ ଦଳର ବୋଲିଂ ବିଭାଗ ଉନ୍ନତ ରହିଛି ।
ଏଣିକି ମ୍ୟାଚ୍ ଜିତିବାକୁ ହେଲେ ଉଭୟ ଦଳକୁ ବ୍ୟାଟିଂରେ ଉନ୍ନତି ଆଣିବାକୁ ହେବ । ମୁମ୍ବାଇ ଇଣ୍ଡିଆନ୍ସ ଦଳରେ ଏପର୍ଯ୍ୟନ୍ତ କୌଣସି ବ୍ୟାଟର ଦକ୍ଷତା ମୁତାବକ ପ୍ରଦର୍ଶନ କରିନାହାନ୍ତି । ର୍ୟାନ୍ ରିକେଲଟନ କୋଲକାତା ନାଇଟ ରାଇଡର୍ସ ବିପକ୍ଷରେ ଅର୍ଦ୍ଧଶତକ ଅର୍ଜନ କରିଥିଲେ ହେଁ ପ୍ରାରମ୍ଭରୁ ବାରମ୍ବାର ଜୀବନଦାନ ପାଇଥିଲେ । ରୋହିତ ଶର୍ମାଙ୍କ ଫର୍ମକୁ ନେଇ ମଧ୍ୟ ଦଳ ଚିନ୍ତାରେ ରହିଛି । କେବଳ ସୂର୍ଯ୍ୟକୁମାର ଯାଦବ ଫର୍ମକୁ ଫେରିବା ଭଳି ମନେ ହେଉଛି ।
ଠିକ୍ ସେହିପରି ସୁପରଜାଏଣ୍ଟ୍ସ ଦଳରେ ମିଚେଲ ମାର୍ଶ ଓ ନିକୋଲାସ ପୂରନଙ୍କୁ ଛାଡ଼ିଦେଲେ ଅନ୍ୟ କାହା ବ୍ୟାଟ୍ରୁ ସେଭଳି ଆଖି ଦୃଶିଆ ଇନିଂସ ଦେଖିବାକୁ ମିଳିନାହିଁ । ରୋହିତଙ୍କ ଭଳି ସୁପରଜାଏଣ୍ଟ୍ସ ମଧ୍ୟ ରିଷଭ ପନ୍ତଙ୍କ ଫର୍ମକୁ ନେଇ ଚିନ୍ତାରେ ରହିଛି । ଉଭୟ ଦଳର ପେସ୍ ବୋଲିଂ ବିଭାଗ ସୁଦୃଢ । ମାତ୍ର ଏକାନ୍ନା ଷ୍ଟାଡ଼ିୟମ୍ର ପିଚ ସ୍ପିନରଙ୍କୁ ସହାୟତା କରିବାର ଯଥେଷ୍ଟ ସମ୍ଭାବନା ରହିଛି । ତେଣୁ ଆଜି ସ୍ପିନରମାନେ ମ୍ୟାଚ୍ ଫଳାଫଳ ନିର୍ଣ୍ଣୟ କରିବା ଆଶା କରାଯାଉଛି । ସୁପରଜାଏଣ୍ଟ୍ସର ରବି ବିଷ୍ଣୋଇ ଓ ଦିଗବେଶ ରାଠି, ମୁମ୍ବାଇ ଇଣ୍ଡିଆନ୍ସର ମିଚେଲ ସାଣ୍ଟନର ଓ ବିଘ୍ନେଶ ପୁଥୁରଙ୍କ ପ୍ରଦର୍ଶନ ଉପରେ ନଜର ରହିବ ।
ଏକାନ୍ନା ଷ୍ଟାଡ଼ିୟମ ପିଚ୍ ସ୍ପିନରଙ୍କୁ ସହାୟତା କରିବ। ନୂଆ ବଲ୍ରେ ବ୍ୟାଟିଂ ମଧ୍ୟ ସହଜ ହେବ । ଆଜି ନାଲି ମାଟି ପିଚ୍ରେ ମ୍ୟାଚ୍ ଖେଳାଯିବ । ରାତ୍ରିରେ କାକର ପ୍ରଭାବ ରହିବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦ୍ବାଦଶ
ସୁପରଜାଏଣ୍ଟ୍ସ: ଆଡେନ ମାରକ୍ରମ, ମିଚେଲ ମାର୍ଶ, ନିକୋଲାସ ପୂରନ, ରିଷଭ ପନ୍ତ (ଅଧିନାୟକ), ଆୟୂଷ ବାଦୋନି, ଡେଭିଡ୍ ମିଲର, ଅବଦୁଲ ସମଦ, ସର୍ଦୁଲ ଠାକୁର, ଦିଗବେଶ ରାଠି, ଆକାଶ ଦୀପ, ରବି ବିଷ୍ଣୋଇ, ଏମ ସିଦ୍ଧାର୍ଥ ।
ମୁମ୍ବାଇ ଇଣ୍ଡିଆନ୍ସ: ରୋହିତ ଶର୍ମା, ର୍ୟାନ ରିକେଲଟନ, ସୂର୍ଯ୍ୟକୁମାର ଯାଦବ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା (ଅଧିନାୟକ), ନମନ ଧିର, ମିଚେଲ ସାଣ୍ଟନର, ଦୀପକ ଚହର, ଟ୍ରେଣ୍ଟ ବୋଲ୍ଟ, ଅଶ୍ୱନୀ କୁମାର, ବିଘ୍ନେଶ ପୁଥୁର, ମୁଜିବ ଉର ରେହମାନ ।
IPL 2025: ହାଇଦ୍ରାବାଦର ଲଜ୍ଜାଜନକ ପରାଜୟ, ୮୦ ରନରେ ଜିତିଲା କୋଲକାତା
