ପ୍ରମୂଖ ଖବର
  • ଶ୍ରୀମନ୍ଦିରରେ ପୂଜା ହେଲା ଆଇପିଏଲ୍‌ ଟ୍ରଫି, ବିଜୟୀ ହେବାକୁ 'କୋଲକତା ନାଇଟ୍ ରାଇଡର୍ସ'ର ପ୍ରାର୍ଥନା
  • ||
  • ଶ୍ରୀମନ୍ଦିରରେ ମହାପ୍ରଭୁଙ୍କର ବଡ଼ ମହାସ୍ନାନ, ବେହେରଣ ଦ୍ୱାର ନିକଟରେ ପଡିଥିଲା ରକ୍ତ ଛିଟା
  • ||
  • ବାଲେଶ୍ୱର : ଘରେ ପଶି ଅଙ୍ଗନବାଡ଼ି କର୍ମୀଙ୍କୁ ହାଣିଲେ ଦୁର୍ବୃତ୍ତ, ପୋଲିସର ତଦନ୍ତ ଆରମ୍ଭ
  • ||
  • ନୂଆଦିଲ୍ଲୀ ରେଳଷ୍ଟେସନ ଦଳାଚକଟା ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଲେ ଅଶ୍ୱିନୀ
  • ||
  • ନୂଆଦିଲ୍ଲୀ ରେଳଷ୍ଟେସନ ଦଳାଚକଟା ଘଟଣା, ମୃତ୍ୟୁ ସଂଖ୍ୟା ୧୮କୁ ବୃଦ୍ଧି, ଶୋକବ୍ୟକ୍ତ କଲେ ରାଷ୍ଟ୍ରପତି, ପ୍ରଧାନମନ୍ତ୍ରୀ
  • ||
  • ଓଡ଼ିଶା ଅର୍ଥନୈତିକ ସର୍ଭେ ରିପୋର୍ଟ: ଚଳିତ ବର୍ଷ ଅଭିବୃଦ୍ଧି ୭.୨%କୁ ହ୍ରାସ, ଆଗାମୀ ବର୍ଷ ୮.୫% ହାରରେ ବଢ଼ିବ
  • ||
  • କଟକ : ଷ୍ଟ୍ରିଟ୍‌ ଲାଇଟ୍‌ ଖୁଣ୍ଟରୁ ଯୁବକଙ୍କୁ ଝୁଲନ୍ତା ମୃତଦେହ ଉଦ୍ଧାର, କାରଣ ଅସ୍ପଷ୍ଟ
  • ||
  • ଗରମରୁ ମିଳିବ ସାମାନ୍ୟ ଆଶ୍ୱସ୍ତି: ଆସନ୍ତା ୧୯ରୁ ୨୧ ଯାଏ ବର୍ଷା ସମ୍ଭାବନା, ବିଭିନ୍ନ ଜିଲ୍ଲାକୁ ଆଲର୍ଟ ଜାରି
  • ||

୮୭ ମୁହାଁ ଟଙ୍କା... ଆଗକୁ ମହଙ୍ଗା ହେବ ଆମଦାନି, ବଢ଼ିବ ତେଲ ଦର

Published By : Prameya | January 14, 2025 9:31 AM

ମୁମ୍ବାଇ,୧୪/୦୧: ମନ୍ଥର ଅଭିବୃଦ୍ଧି ଏବଂ ଅନ୍ୟାନ୍ୟ ଆଶଙ୍କା ମଧ୍ୟରେ ଦୁର୍ବଳ ହୋଇଚାଲିଛି ଟଙ୍କା । ଆମେରିକୀୟ ଡଲାର ତୁଳନାରେ ଏହାର  ବିନିମୟ ମୂଲ୍ୟ ୮୭ ସ୍ତର ଆଡ଼କୁ ଗଲାଣି । ସପ୍ତାହର ପ୍ରଥମ କାରବାର  ଦିବସ ଅର୍ଥାତ୍‌ ସୋମବାର ଡଲାର ତୁଳନାରେ ୫୭ ପଇସା ଖସିଛି ଟଙ୍କା ।  ଏହାର ବିନିମୟ ମୂଲ୍ୟ ୮୬.୬୧ ସ୍ତରକୁ ଖସିଯାଇଛି । ଏଯାବତ୍‌ ଏହା  ସବୁଠାରୁ ନିମ୍ନ ସ୍ତର । ଜାନୁଆରୀ ୧୦ରେ ଏହା ୮୬.୦୪ ସ୍ତରରେ ବନ୍ଦ  ହୋଇଥିଲା । ଦୁଇବର୍ଷରେ ଟଙ୍କା ମୂଲ୍ୟରେ ସର୍ବବୃହତ୍‌ ହ୍ରାସ ଘଟିଛି ।

ବିଶେଷଜ୍ଞଙ୍କ  ଅନୁସାରେ, ଟଙ୍କା ଦୁର୍ବଳ ହେବା ପଛରେ ଅନେକ କାରଣ ରହିଛି । ଇତିମଧ୍ୟରେ ଭାରତୀୟ ସେୟାର ବଜାରରେ ବିଦେଶୀ ନିବେଶକଙ୍କ ବିପୁଳ ମାତ୍ରାରେ ସେୟାର ବିକ୍ରି ଏହାର ଏକ ପ୍ରମୁଖ କାରଣ । ତା’ସହିତ ଭୁ-ରାଜନୈତିକ ସମସ୍ୟାଗୁଡ଼ିକ ମଧ୍ୟ ଟଙ୍କା ଉପରେ ନକାରାତ୍ମକ ପ୍ରଭାବ ପକାଉଛି । ଟଙ୍କା ମୂଲ୍ୟରେ ହ୍ରାସ ଅର୍ଥାତ୍‌ ଭାରତ ପାଇଁ ଅନେକ ସାମଗ୍ରୀର ଆମଦାନି  ବ୍ୟୟବହୁଳ ହେବ । ଏହାବ୍ୟତୀତ ବିଦେଶ ଭ୍ରମଣ ଏବଂ ବିଦେଶରେ ପାଠପଢ଼ା ବି ମହଙ୍ଗା ହେବ । ପେଟ୍ରୋଲିୟମ ସାମଗ୍ରୀ ଏବଂ ସୁନା ଦାମ ବଢ଼ିବ । ସାମଗ୍ରୀ ଦର ବଢ଼ିବା ସହ ମୁଦ୍ରାସ୍ଫୀତି ଚିନ୍ତା ଆହୁରି ତେଜିବ । ଦେଶରେ ବିଦେଶୀ ନିବେଶ କମିବ । 

ଅନ୍ୟପକ୍ଷରେ, ଟଙ୍କାର ବିନିମୟ ମୂଲ୍ୟ ଖସିବା ଦ୍ୱାରା  ବିଦେଶୀ ପର୍ଯ୍ୟଟକଙ୍କ ପାଇଁ ଭାରତ ଭ୍ରମଣ ଶସ୍ତା ହେବ । ଦେଶର ମେଡିକାଲ ପର୍ଯ୍ୟଟନ ଶିଳ୍ପକୁ ଫାଇଦା  ମିଳିବ । ବିଦେଶରୁ ଡଲାର ପଠାଇଲେ ଏହାର ଅଧିକ ବଦଳ ମୂଲ୍ୟ ମିଳିବ । ଡିସେମ୍ବରରୁ ଟଙ୍କା ଦରରେ  ୨% ହ୍ରାସ ଘଟିଛି । ଆଉ କିଛି ଦିନ ଏହା ଚାପ ମଧ୍ୟରେ ରହିବ ବୋଲି ବିଶେଷଜ୍ଞମାନେ ଆଶଙ୍କା ପ୍ରକାଶ  କରିଛନ୍ତି । ବର୍ତ୍ତମାନ ପରିସ୍ଥିତିରେ ଟଙ୍କାକୁ ଟ୍ରାକ୍‌କୁ ଆଣିବା ପାଇଁ ଆର୍‌ବିଆଇର ହସ୍ତକ୍ଷେପ ଲୋଡ଼ା । କେନ୍ଦ୍ରୀୟ  ବ୍ୟାଙ୍କକୁ ଏହାର ସଂକୁଚିତ ହେଉଥିବା ବୈଦେଶିକ ମୁଦ୍ରା ଭଣ୍ଡାରକୁ ଦେଖିଚାହିଁ ବ୍ୟବହାର କରିବାକୁ ପଡ଼ିବ  ବୋଲି ଏମାନେ ମତ ଦେଇଛନ୍ତି । ଦୁର୍ବଳ ଟଙ୍କାକୁ ଟ୍ରାକ୍‌କୁ ଆଣିବା ପାଇଁ ଆର୍‌ବିଆଇ ସ୍ପଟ୍‌ ଏବଂ ଫର୍‌ୱାର୍ଡ  ମାର୍କେଟରେ ଡଲାର ବିକ୍ରି କରୁଛି । 

ସୂଚନାଯୋଗ୍ୟ, ଜାନୁଆରୀ ୩ରେ ଶେଷ ହୋଇଥିବା ସପ୍ତାହରେ  ଦେଶର ବୈଦେଶିକ ମୁଦ୍ରା ଭଣ୍ଡାର ୬୩୪୬୦ କୋଟି ଡଲାରକୁ ଖସିଆସିଛି । ବିଶ୍ୱର ପ୍ରାୟ ୮୫%  କାରବାର ଆମେରିକୀୟ ଡଲାରରେ ହୋଇଥାଏ । ଏହାକୁ ବିଶ୍ୱର ସବୁଠାରୁ ସ୍ଥିର କରେନ୍ସି ଭାବେ ଗଣନା  କରାଯାଇଥାଏ । ବିଶ୍ୱବ୍ୟାପୀ କେନ୍ଦ୍ରୀୟ ବ୍ୟାଙ୍କଗୁଡ଼ିକରେ ଥିବା ବିଦେଶୀ ମୁଦ୍ରା ମଧ୍ୟରେ ୬୪% ଡଲାର  ଆକାରରେ ଅଛି । ବିଶ୍ୱବ୍ୟାପୀ ୩୯% ଋଣ ଆମେରିକୀୟ ଡଲାରରେ ଦିଆଯାଇଥାଏ ।

Prameya Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.