ନୂଆଦିଲ୍ଲୀ,୨୯/୧୨: ଚଳିତ ଆର୍ଥିକବର୍ଷର ତୃତୀୟ ତ୍ରୟମାସରେ ଦେଶର ଚଳନ୍ତି ଖାତା ନିଅଣ୍ଟ(ସିଏଡି) ଜିଡିପିର ୨% ପାର୍ କରିପାରେ । ବିଶେଷ କରି ସୁନା ଆମଦାନି ବୃଦ୍ଧି ଯୋଗୁ ଏଭଳି ହେବ ବୋଲି ବ୍ୟାଙ୍କ୍ ଅଫ୍ ବରୋଦା ପକ୍ଷରୁ ଜାରି ଏକ ରିପୋର୍ଟରେ ଉଲ୍ଲେଖ କରାଯାଇଛି । ଅନ୍ୟପକ୍ଷରେ, ସେବା ରପ୍ତାନି ଏବଂ ରେମିଟାନ୍ସ ପ୍ରବାହ ହାରାହାରି ପ୍ରଭାବକୁ ସମ୍ଭାଳିଦେବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି ।
ସୂଚନାଯୋଗ୍ୟ, ୨୦୨୪-୨୫ରେ ଦେଶର ସିଏଡି ଜିଡିପିର ୧.୨%କୁ ଖସିଥିଲା । ଏହା ପୂର୍ବବର୍ଷ ସମାନ ସମୟରେ ୧.୩% ଥିଲା । ବର୍ଦ୍ଧିତ ବାଣିଜ୍ୟିକ ନିଅଣ୍ଟ ବି ଉଚ୍ଚ ସିଏଡିର କାରଣ । ୨୦୨୪-୨୫ ଆର୍ଥିକବର୍ଷରେ ଦେଶର ବାଣିଜ୍ୟିକ ନିଅଣ୍ଟ ୭୫୩୦ କୋଟି ଡଲାରକୁ ବୃଦ୍ଧି ପାଇଛି, ଯାହାକି ୨୦୨୩-୨୪ ସମାନ ସମୟରେ ୬୪୫୦ କୋଟି ଡଲାର ଥିଲା । ଅଣ-ତୈଳ ସାମଗ୍ରୀ ଆମଦାନିରେ ବୃହତ୍ ବୃଦ୍ଧି ଯୋଗୁ ବାଣିଜ୍ୟିକ ନିଅଣ୍ଟ ପ୍ରଶସ୍ଥ ହୋଇଛି । ଆଲୋଚ୍ୟ ସମୟରେ ସୁନା ଆମଦାନିରେ ୫୦୦ କୋଟି ଡଲାର ବୃଦ୍ଧି ଘଟିଥିଲା ।
