ନୂଆଦିଲ୍ଲୀ, ୧୮।୯: ମ୍ୟାଲେରିଆ ବିରୋଧରେ ଲଢ଼ିବାରେ ଭାରତ ଐତିହାସିକ ପଦକ୍ଷେପ ନେଇଛି । ଏଣିକି ଆହୁରି ସହଜ ହେବ ମ୍ୟାଲେରିଆ ନିରାକରଣ । ଏହି ଟିକା ବର୍ତ୍ତମାନ ଉପଲବ୍ଧ ଥିବା ଔଷଧ ତୁଳନାରେ ବେଶ୍ ପ୍ରଭାବୀ ରହିବ ବୋଲି ଡାକ୍ତରମାନେ ମତ ଦେଇଛନ୍ତି । ଭାରତୀୟ ଚିକିତ୍ସା ଗବେଷଣା ପରିଷଦ (ICMR) ଦେଶରେ ନିର୍ମିତ ପ୍ରଥମ ମ୍ୟାଲେରିଆ ଟିକାକୁ ଅନୁମୋଦନ ଦେଇଛି । ଆଡଫାଲସିଭାକ୍ସ ନାମକ ଏହି ଟିକା ଏକକାଳୀନ ମ୍ୟାଲେରିଆର ଅନେକ ପର୍ଯ୍ୟାୟକୁ ନଷ୍ଟ କରିବା ସହ ରୋଗୀଙ୍କୁ ସୁରକ୍ଷା ଦେବାର କ୍ଷମତା ବଜାୟ ରଖେ । ବିଶେଷଜ୍ଞଙ୍କ ଅନୁଯାୟୀ, ଏହି ଟିକା ୨୦୩୦ ସୁଦ୍ଧା ମ୍ୟାଲେରିଆ ଦୂର କରିବାରେ ଏକ ବଡ଼ ସହାୟକ ପ୍ରମାଣିତ ହେବ ।
ଆଡଫାଲସିଭାକ୍ସ ନାମକ ଏହି ଟିକା ଭାରତର ପ୍ରଥମ ଟିକା ଯାହା ସବୁଠାରୁ ଘାତକ ମ୍ୟାଲେରିଆ ଜୀବାଣୁ, ପ୍ଲାଜମୋଡିୟମ୍ ଫାଲସିପେରମରୁ ସୁରକ୍ଷା ଦେବା ଲାଗି ଡିଜାଇନ୍ କରାଯାଇଛି । ଏହି ଟିକାକୁ ଭୁବନେଶ୍ୱରର ICMRର ଆଞ୍ଚଳିକ ଚିକିତ୍ସା ଗବେଷଣା କେନ୍ଦ୍ର RMRCରେ ବିକଶିତ ହୋଇଛି । ଏହି ଟିକା ରକ୍ତରେ ପହଞ୍ଚିବା ପୂର୍ବରୁ ମ୍ୟାଲେରିଆ ଜୀବାଣୁକୁ ଶରୀର ଭିତରକୁ ଯିବାକୁ ପ୍ରତିରୋଧ କରେ । ଏହା କେବଳ ବ୍ୟକ୍ତିକୁ ମ୍ୟାଲେରିଆରୁ ରକ୍ଷା କରେ ନାହିଁ, ବରଂ ଏହି ଟିକା ଏହି ରୋଗକୁ ଅନ୍ୟମାନଙ୍କୁ ବ୍ୟାପିବାରୁ ମଧ୍ୟ ରୋକେ । ଆଡାଫାଲସିଭାକ୍ସ ବିଷୟରେ ଆଉ ଏକ ବିଶେଷ କଥା ହେଉଛି ଏହାର ମୂଲ୍ୟ ବହୁତ କମ୍ । ତେଣୁ ଏହାକୁ ବହୁ ପରିମାଣରେ ତିଆରି କରାଯାଇପାରିବ ଏବଂ ଏହା ରୁମ୍ ଟେମ୍ପରେଟରରେ ୯ ମାସରୁ ଅଧିକ ସମୟ ପାଇଁ ସଂରକ୍ଷିତ କରି ରଖାଯାଇପାରିବ । ତେଣୁ, ଏହି ଟିକା ଗ୍ରାମାଞ୍ଚଳ ଏବଂ ଦୁର୍ଗମ ଅଞ୍ଚଳରେ ସହଜରେ ଉପଲବ୍ଧ ହୋଇପାରିବ ।
କିଏ ପ୍ରସ୍ତୁତ କରିବ ଏହି ଟିକା ?
ICMR ୫ଟି ଭାରତୀୟ କମ୍ପାନୀକୁ ଆଡାଫାଲସିଭାକ୍ସ ଉତ୍ପାଦନ କରିବାକୁ ଲାଇସେନ୍ସ ଦେଇଛି । ଏହି କମ୍ପାନୀଗୁଡ଼ିକ ଏହି ଟିକାକୁ ବଡ଼ ପରିମାଣରେ ଉତ୍ପାଦନ କରିବା ଏବଂ ଚୂଡ଼ାନ୍ତ ପରୀକ୍ଷଣ ସମାପ୍ତ କରିବା ପରେ ବ୍ୟବହାର ପାଇଁ ଉପଲବ୍ଧ କରାଇବେ । ଆସନ୍ତୁ ଜାଣିବା କେଉଁ କେଉଁ କମ୍ପାନିଗୁଡ଼ିକୁ ଏଥିପାଇଁ ଲାଇସେନ୍ସ ମିଳିଛି । ଇଣ୍ଡିଆନ୍ ଇମ୍ୟୁନୋଲୋଜିକାଲ୍ସ ଲିମିଟେଡ୍, ଟେକ୍ ଇନଭେନସନ୍ ଲାଇଫକେୟାର ପ୍ରାଇଭେଟ୍ ଲିମିଟେଡ୍, ପାନାକ୍ସିଆ ବାୟୋଟେକ୍ ଲିମିଟେଡ୍, ବାୟୋଲୋଜିକାଲ୍ ଇ ଲିମିଟେଡ୍ ଓ ଜାଇଡସ୍ ଲାଇଫସାଇନ୍ସେସ । ଭାରତ ୨୦୨୭ ସୁଦ୍ଧା ଦେଶରେ ନୂତନ ମ୍ୟାଲେରିଆ ମାମଲା ସଂଖ୍ୟାକୁ ଶୂନକୁ ହ୍ରାସ କରିବା ସହ ୨୦୩୦ ସୁଦ୍ଧା ଏହି ରୋଗକୁ ସମ୍ପୂର୍ଣ୍ଣ ଭାବରେ ମୂଳପୋଛ କରିବାକୁ ଲକ୍ଷ୍ୟ ରଖିଛି । ଗତ ୧୦ ବର୍ଷ ମଧ୍ୟରେ ଏହି ଦିଗରେ ଗୁରୁତ୍ୱପୂର୍ଣ୍ଣ ଅଗ୍ରଗତି ହୋଇଛି । ୨୦୧୭ରେ, ପ୍ରାୟ ୬୪ ଲକ୍ଷ ମ୍ୟାଲେରିଆ ମାମଲା ରିପୋର୍ଟ ହୋଇଥିଲା । ୨୦୨୩ ମସିହାରେ ଏହି ସଂଖ୍ୟା ୩ ହଜାର ୫୦୦କୁ ହ୍ରାସ ପାଇଛି । ମହତ୍ତ୍ୱପୂର୍ଣ୍ଣ ସୁଧାର ସତ୍ତ୍ୱେ, ମ୍ୟାଲେରିଆର ସମ୍ପୂର୍ଣ୍ଣ ନିରାକରଣ ଏପର୍ଯ୍ୟନ୍ତ ସହଜ ନୁହେଁ । ଓଡ଼ିଶା, ଛତିଶଗଡ଼, ଝାଡ଼ଖଣ୍ଡ ଏବଂ ଉତ୍ତର-ପୂର୍ବ ଭାରତର କିଛି ଅଂଶରେ ମ୍ୟାଲେରିଆ ହାର ଏବେ ବି ଅଧିକ ।
କହିରଖୁଛୁ ଯେ, ମୌସୁମୀ ପରେ ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳରେ ମ୍ୟାଲେରିଆ ମାମଲା ବୃଦ୍ଧି ପାଇଛି । କେବଳ ସେପ୍ଟେମ୍ବରରେ ଦିଲ୍ଲୀରେ ୨୬୪ ମାମଲା ରିପୋର୍ଟ ହୋଇଛି । ଏହା ଗତ ୪ ବର୍ଷ ମଧ୍ୟରେ ସର୍ବାଧିକ ସଂଖ୍ୟା । ସ୍ୱାସ୍ଥ୍ୟ ବିଶେଷଜ୍ଞଙ୍କ ମତରେ, ଆଡାଫାଲସିଭାକ୍ସ ମ୍ୟାଲେରିଆ ବିରୁଦ୍ଧରେ ଏକ ବଡ଼ ପଦକ୍ଷେପ ପ୍ରମାଣିତ ହୋଇପାରେ । ଏହି ଟିକା ମାରାତ୍ମକ ଜୀବାଣୁ ପ୍ଲାସମୋଡିୟମ୍ ଫାଲସିପେରମକୁ ରୋକିଥାଏ ଏବଂ ରୋଗ ବ୍ୟାପିବାକୁ ମଧ୍ୟ ରୋକିଥାଏ । ଯଦି ଭାରତର ପରୀକ୍ଷଣ, ଚିକିତ୍ସା ପଦ୍ଧଚି ଏବଂ ଆଡାଫାଲସିଭାକ୍ସ ଏକାଠି ହୁଅନ୍ତି, ତେବେ ମ୍ୟାଲେରିଆ ନିରାକରଣର ଗତି ଆହୁରି ବୃଦ୍ଧି ପାଇବ । ମଣିଷ ଉପରେ ଏହି ଟିକାର କ୍ଲିନିକାଲ୍ ପରୀକ୍ଷଣ ଖୁବ୍ ଶୀଘ୍ର ଆରମ୍ଭ ହେବ ଏବଂ ଡାକ୍ତରମାନେ ଆଶା କରୁଛନ୍ତି ଯେ ଏହି ଟିକା ଭାରତକୁ ସମୟ ପୂର୍ବରୁ ମ୍ୟାଲେରିଆ ମୁକ୍ତ କରିବାରେ ସାହାଯ୍ୟ କରିବ ।
