ନୂଆଦିଲ୍ଲୀ,୨/୦୬: ୨୦୨୩ ଏବଂ ୨୦୨୮ ମଧ୍ୟରେ ଭାରତରେ ଅତିଧନୀ ବା ହାଇ ନେଟ୍ୱର୍ଥ ଇଣ୍ଡିଭିଜୁଆଲ(ୟୁଏଚ୍ଏନ୍ଡବ୍ଲ୍ୟୁଆଇ)ଙ୍କ ସଂଖ୍ୟା ୫୦% ବଢ଼ିବ । ଏହା ସମଗ୍ର ବିଶ୍ୱରେ ହେବ ଦ୍ରୁତ ଅଭିବୃଦ୍ଧି । ମ୍ୟାକ୍କିନ୍ସେ ଆଣ୍ଡ୍ କମ୍ପାନି ଏବଂ ବିଓଏଫ୍ ପକ୍ଷରୁ ପ୍ରସ୍ତୁତ ଏକ ରିପୋର୍ଟରେ ଏହି ଅନୁମାନ କରାଯାଇଛି ।
୩ କୋଟି ଡଲାର ବା ତଦ୍ଦୁର୍ଦ୍ଧ ନେଟ୍ ସମ୍ପତ୍ତି ଥିବା ବ୍ୟକ୍ତିଙ୍କୁ ଅତିଧନୀ କୁହାଯାଇଥାଏ । ୨୦୨୩ ସୁଦ୍ଧା ଭାରତରେ ଏହି ବର୍ଗଙ୍କ ସଂଖ୍ୟା ଥିଲା ୧୩,୨୬୩ । ୨୦୨୨ ତୁଳନାରେ ଏଥିରେ ୬.୧% ବୃଦ୍ଧି ଘଟିଥିଲା ।
ଦ ଷ୍ଟେଟ୍ ଅଫ୍ ଫ୍ୟାଶନ୍ ଲକ୍ଜ୍ୟୁରୀ ରିପୋର୍ଟ ଅନୁସାରେ, ଜନସଂଖ୍ୟା ଏବଂ ସଂରଚନାତ୍ମକ ପରିବର୍ତ୍ତନଗୁଡ଼ିକ ଦ୍ୱାରା ୨୦୨୫ରେ ଭାରତୀୟ ଲକ୍ଜ୍ୟୁରୀ ବଜାରରେ ୧୫ରୁ ୨୦% ଅଭିବୃଦ୍ଧି ଅନୁମାନ ରହିଛି । ଏହା ମୁତାବକ ଜିଓ ୱାର୍ଲଡ ପ୍ଲାଜା ଏବଂ ଗ୍ୟାଲେରିଜ୍ ଲାଫାୟେଟ୍ ଭଳି ନୂଆ ଲକ୍ଜ୍ୟୁରୀ ମଲ୍ ଏବଂ ଡିପାର୍ଟମେଣ୍ଟାଲ ଷ୍ଟୋର ଟିୟର୍ ୱାନ୍ ସହରରେ ଲକ୍ଜ୍ୟୁରୀ ରିୟଲ୍ ଇଷ୍ଟେଟ୍କୁ ବଢ଼ାଉଛି ।
ଏଥିରେ ଆହୁରି କୁହାଯାଇଛି ଯେ, ଯଦିଓ ବିଳାସ ସାମଗ୍ରୀରେ ୨୮% ସାମଗ୍ରୀ ଏବଂ ସେବା ଟିକସ ବା ଜିଏସ୍ଟି ରହିଛି ତଥାପି ୭,୦୦,୦୦୦ ଟଙ୍କା ବା ୮,୪୦୦ ଆମେରିକୀୟ ଡଲାରରୁ ଅଧିକ ମୂଲ୍ୟର ଆମଦାନି ସାମଗ୍ରୀଗୁଡ଼ିକ ଉପରେ ବର୍ଦ୍ଧିତ ଟିକସ ଦ୍ୱାରା ଘରୋଇ ବ୍ୟୟ ବଢିବ । ଏହା ଲକ୍ଜ୍ୟୁରୀ ବଜାରକୁ ତ୍ୱରାନ୍ୱିତ କରିବ ।
ରିପୋର୍ଟ ମୁତାବକ, ଭାରତ ତୁଳନାରେ ଜାପାନର ଲକ୍ଜ୍ୟୁରୀ ବଜାରରେ ୨୦୨୫ରେ ୬ରୁ ୧୦% ଅଭିବୃଦ୍ଧି ଦେଖାଦେବ । ଏଥିସହିତ ଏକ ପ୍ରମୁଖ ଲକ୍ଜ୍ୟୁରୀ ବଜାର ଭାବେ ଜାପାନ ଏହାର ସ୍ଥାନ ବଜାୟ ରଖିବ । ଜାପାନର ଲକ୍ଜ୍ୟୁରୀ ବଜାରରେ ବୃଦ୍ଧି ଘରୋଇ ଚାହିଦା ଏବଂ ପର୍ଯ୍ୟଟନ ଖର୍ଚ୍ଚ ଉଭୟ ଦ୍ୱାରା ପ୍ରେରିତ ହେବ । ନିକଟରେ ନୀତି ଆୟୋଗ ସିଇଓ ବିଭିଆର୍ ସୁଭ୍ରମଣ୍ୟମ ଘୋଷଣା କରିଥିଲେ ଯେ, ଭାରତ ଜାପାନଠାରୁ ପାର୍ ହୋଇ ବିଶ୍ୱର ଚତୁର୍ଥ ବୃହତ୍ ଅର୍ଥବ୍ୟବସ୍ଥା ପାଲଟିଛି । ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ତଥ୍ୟକୁ ଦର୍ଶାଇ ସେ କହିଥିଲେ ଯେ, ଭାରତର ଅର୍ଥବ୍ୟବସ୍ଥା ୪ ଟ୍ରିଲିୟନ ଡଲାରରେ ପହଞ୍ଚିଯାଇଛି ।
ରିପୋର୍ଟ ଅନୁସାରେ, ୟୁଏଚ୍ଏନ୍ଡବ୍ଲ୍ୟୁଆଇ ବା ଅତିଧନୀ ଜନସଂଖ୍ୟାରେ ଜାପାନ ଏସିଆର ଦ୍ୱିତୀୟ ବୃହତ୍ ରାଷ୍ଟ୍ର । ୨୦୨୩ରୁ ୨୦୨୮ ମଧ୍ୟରେ ଏଠାରେ ଅତିଧନୀଙ୍କ ସଂଖ୍ୟା ୧୨% ବଢ଼ିବା ନେଇ ଅନୁମାନ କରାଯାଇଛି । ଅନ୍ୟପକ୍ଷରେ, ଭାରତରେ ୟୁଏଚ୍ଏନ୍ଡବ୍ଲ୍ୟୁଆଇ ଅଭିବୃଦ୍ଧି ଜାପାନଠାରୁ ଅଧିକ ରହିବ ।
ଆଇଏମ୍ଏଫ୍ର ବିଶ୍ୱ ଅର୍ଥନୈତିକ ଦୃଶ୍ୟପଟ ରିପୋର୍ଟର ଏପ୍ରିଲ ସଂସ୍କରଣରେ କୁହାଯାଇଥିଲା ଯେ, ଆର୍ଥିକବର୍ଷ ୨୦୨୫- ୨୬ ପାଇଁ ଭାରତର ନୋମିନାଲ ଜିଡିପି ପ୍ରାୟ ୪.୧୮୭ ଟ୍ରିଲିୟନ ଆମେରିକୀୟ ଡଲାରରେ ପହଞ୍ଚିପାରେ । ଏହା ଜାପାନର ସମ୍ଭାବ୍ୟ ଜିଡିପିଠାରୁ ସାମାନ୍ୟ ଅଧିକ, ଯାହାର ଅନୁମାନ ରହିଛି ୪.୧୮୬ ଟ୍ରିଲିୟନ ଡଲାର ।
ରିପୋର୍ଟରେ କୁହାଯାଇଛି ଯେ, ଗତ ୫ ବର୍ଷରେ ଲକ୍ଜ୍ୟୁରୀ ଶିଳ୍ପ ଅସାଧାରଣ ମୂଲ୍ୟସୃଜନ ଅବଧିକୁ ଅନୁଭବ କରିଛି । ୨୦୧୯ ଏବଂ ୨୦୨୩ ମଧ୍ୟରେ ଭାରତରେ ବ୍ୟକ୍ତିଗତ ଲକ୍ଜ୍ୟୁରୀ ସାମଗ୍ରୀ, ଫ୍ୟାଶନ୍, ହ୍ୟାଣ୍ଡ୍ବ୍ୟାଗ୍, ହାତଘଡ଼ି ଏବଂ ଆଭୁଷଣର ବୃହତ୍ ଚାହିଦା ଦେଖିବାକୁ ମିଳିଛି । ଚାହିଦା ଅନୁସାରେ ଯୋଗାଣ ବୃଦ୍ଧି ସହିତ ଏହା ଆଗକୁ ବାର୍ଷିକ ୫% ଚକ୍ରବୃଦ୍ଧି ଅଭିବୃଦ୍ଧି ସହ ବଢ଼ିବ ବୋଲି ଅନୁମାନ କରାଯାଇଛି ।
ଲକ୍ଜ୍ୟୁରୀ ବ୍ରାଣ୍ଡ୍ଗୁଡ଼ିକ ବିଶ୍ୱ ବଜାରରେ ଉତ୍ତମ ପ୍ରଦର୍ଶନ କରିଛନ୍ତି ଏବଂ ବୃହତ୍ ମାତ୍ରାରେ ଲାଭ ଯୋଡ଼ିଛନ୍ତି । କିନ୍ତୁ ୨୦୨୫ରେ ଏଯାବତ୍ ଶିଳ୍ପ ସାମାନ୍ୟ ଧୀମା ରହିଛି । ଶୀର୍ଷ ବ୍ରାଣ୍ଡଗୁଡ଼ିକ ବି ପ୍ରଭାବିତ ହୋଇଛନ୍ତି । ଲକ୍ଜ୍ୟୁରୀ ମୂଲ୍ୟ ସୃଜନ କମିଛି । ଏହାସତ୍ତେ୍ୱ ଆଗକୁ ଲକ୍ଜ୍ୟୁରୀ ବଜାରରେ ବଡ଼ ଧରଣର ପରିବର୍ତ୍ତନ ଆସିବ ବୋଲି ଅନୁମାନ କରାଯାଇଛି ।
