ନୂଆଦିଲ୍ଲୀ,୨୧/୦୩ : ଆସନ୍ତାକାଲିଠୁ (ଶନିବାର) ଆରମ୍ଭ ହେବ କ୍ରିକେଟ ମହାକୁମ୍ଭ ଇଣ୍ଡିଆନ ପ୍ରିମିୟର ଲିଗ୍ । ଆଇପିଏଲ ସିଜନ୍ ୧୮ ନେଇ ବଢୁଛି ଉତ୍କଣ୍ଠା । ଆଉ ମାତ୍ର କିଛି ଘଣ୍ଟାର ଅପେକ୍ଷା ଆରମ୍ଭ ହେବ ଫଟାଫଟ କ୍ରିକେଟ ଟୁର୍ଣ୍ଣାମେଣ୍ଟ ଆଇପିଏଲ । ଏଥିରେ ଟପ୍ ୩ ଲିଜେଣ୍ଡ ପ୍ଲେୟାର ଯିଏ କି ସର୍ବାଧିକ ମ୍ୟାଚ ଖେଳିଛନ୍ତି । ସେମାନେ ହେଲେ ମହେନ୍ଦ୍ର ସିଂହ ଧୋନୀ, ରୋହିତ ଶର୍ମା ଓ ବିରାଟ କୋହଲି । ଆଇପିଏଲ ଇତିହାସରେ ଏହି ୩ ଖେଳାଳିଙ୍କର ଅବିଶ୍ବସନୀୟ ଯାତ୍ରା ରହିଛି । ତେବେ ଏ ତିନି ଜଣଙ୍କ ମଧ୍ୟରେ ସବୁଠୁ ଅଧିକ ମ୍ୟାଚ କିଏ ଖେଳିଛି ଆସନ୍ତୁ ଜାଣିବା ।
ଏମଏସ୍ ଧୋନୀ-କ୍ୟାପ୍ଟେନ କୁଲ
ଆଇପିଏଲ ପ୍ଲେୟାରଙ୍କ ମଧ୍ୟରେ କ୍ୟାପ୍ଟେନ କୁଲ ଏମଏସ ଧୋନୀ ଟିକେ ସ୍ବତନ୍ତ୍ର । ଚେନ୍ନାଇ ସୁପରକିଙ୍ଗସର ଅଧିନାୟକ ଧୋନୀ ଆଇପିଏଲ ଇତିହାସରେ ସର୍ବାଧିକ ମ୍ୟାଚ ଖେଳିଛନ୍ତି । ସେ ମୋଟ୍ ୨୬୪ଟି ମ୍ୟାଚ ଖେଳିଛନ୍ତି । ୫୨୪୨ ରନ କରିଛନ୍ତି । ଧୋନୀଙ୍କ ଅଧିନାୟକତ୍ବ ସିଏସକେ ୫ ଥର ଆଇପିଏଲ ଟ୍ରଫି ନିଜ ନାମରେ କରିଛି । ଏମଏସଡିଙ୍କ ସିଏସକେ ବର୍ତ୍ତମାନ ଆଇପିଏଲର ସଫଳ ଦଳ ଭାବେ ପରିଗଣିତ ହୋଇଛି ।
ରୋହିତ ଶର୍ମା- ହିଟମ୍ୟାନ୍
ଚେନ୍ନାଇ ପରେ ଯଦି ସଫଳ ଦଳ ଭାବେ କେଉଁ ଦଳକୁ କହିବା ତେବେ ମୁମ୍ବାଇ ଇଣ୍ଡିଆନ୍ସ ନାମ ଆସିବ । ପୂର୍ବତନ ଅଧିନାୟକ ରୋହିତ ଶର୍ମାଙ୍କ ନେତୃତ୍ବରେ ମୁମ୍ବାଇ ୫ ଥର ଟ୍ରଫି ଜିତିଛି । ହିଟମ୍ୟାନ୍ ରୋହିତ ଶର୍ମା ଆଇପିଏଲ ଇତିହାସରେ ମୋଟ ୨୫୭ଟି ମ୍ୟାଚ ଖେଳିଛନ୍ତି । ଯେଉଁଥିରେ ମୋଟ୍ ୫୪୮୦ ରନ କରିଛନ୍ତି । ୨୦୨୫ରେ ମଧ୍ୟ ରୋହିତ ଖେଳିବେ ମାତ୍ର ସେ ମୁମ୍ବାଇର ଅଧିନାୟକ ନାହାନ୍ତି ।
ବିରାଟ କୋହଲି- ରନ ମେସିନ୍
କିଙ୍ଗ ବିରାଟ କୋହଲି । ଯିଏକି କ୍ରିକେଟ ପ୍ରେମୀଙ୍କ ମଧ୍ୟରେ ରନ୍ ମେସିନ ଭାବେ ଜଣାଶୁଣା । ଆଇପିଏଲରେ ରୟାଲଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳୁଥିବା ବିରାଟ କୋହଲି ୨୫୨ଟି ମ୍ୟାଚ ଖେଳିଛନ୍ତି । ଯେଉଁଥିରେ ୮୦୦୪ ରନ କରିଛନ୍ତି । ସେଥିରେ ୫୫ଟି ଅର୍ଦ୍ଧଶତକ ରହିଛି । ୨୦୧୬ ସିଜନରେ ସେ ୯୭୩ ରନ କରି ଟପ୍ ସ୍କୋରର ହୋଇଥିଲେ । ତାଙ୍କର ସ୍ପେଶାଲ ବ୍ୟାଟିଂ ଟେକ୍ନିକ ଟି-୨୦ ଫର୍ମାଟରେ ବେଞ୍ଚମାର୍କ ତିଆରି କରିଛି ।
