ନୂଆଦିଲ୍ଲୀ, ୨୦।୭: ସୂଚନା ଓ ପ୍ରଯୁକ୍ତିବିଦ୍ୟାର ଏହି ଯୁଗରେ ମଧ୍ୟପ୍ରାଚ୍ୟରେ ଯୁଦ୍ଧର ନିଆଁ ସାରା ବିଶ୍ୱକୁ ଚିନ୍ତାରେ ପକାଇଛି । ଏହି ସମୟରେ ଇରାନର ଦୁଇଟି ଶକ୍ତିଶାଳୀ ହାଇପରସୋନିକ ମିସାଇଲ୍ ‘ଫତହ-୧’ ଏବଂ ‘ଫତହ-୨’ ସାରା ବିଶ୍ୱର ନଜର ଆକର୍ଷଣ କରିଛି । ତେବେ ଆସନ୍ତୁ ଜାଣିବା ଏହି ଦୁଇଟି ମିସାଇଲ୍ କେତେ ଭୟଙ୍କର ଏବଂ ଏହାର ବିଶେଷତ୍ୱ କ’ଣ ? ଇରାନର ଦାବି ଅନୁଯାୟୀ, ଏହି ମିସାଇଲ୍ ଗୁଡ଼ିକ ଏତେ ଦ୍ରୁତ ଗତିରେ ଗତି କରିପାରନ୍ତି ଏବଂ ଉଡ଼ାଣ ସମୟରେ ନିଜର ଦିଗ ବଦଳାଇବାରେ ଏତେ ମାହିର ଯେ, ଏହାକୁ ରୋକିବା କଷ୍ଟକର । ଏପରିକି ଇସ୍ରାଏଲର ‘ଆଇରନ୍ ଡୋମ୍’, ଆମେରିକା ନିର୍ମିତ ‘ପାଟ୍ରିଅଟ୍’ ଏବଂ ‘ଥାଡ୍’ ଭଳି ଆଧୁନିକ ଏୟାର ଡିଫେନ୍ସ ସିଷ୍ଟମକୁ ମଧ୍ୟ ଏହା ଚକମା ଦେଇପାରିବ ବୋଲି ଇରାନ ଦାବି କରିଛି ।
ଫତହ-୧: ଇରାନର ପ୍ରଥମ ହାଇପରସୋନିକ ବାଲିଷ୍ଟିକ ମିସାଇଲ୍
ଜୁନ୍ ୨୦୨୩ରେ ଇରାନ ନିଜର ପ୍ରଥମ ସ୍ୱଦେଶୀ ହାଇପରସୋନିକ ବାଲିଷ୍ଟିକ ମିସାଇଲ୍ ‘ଫତହ-୧’କୁ ବିଶ୍ୱ ସମ୍ମୁଖକୁ ଆଣିଥିଲା । ଏହି ମିସାଇଲର ଗତି ମ୍ୟାକ୍ ୧୩ ରୁ ମ୍ୟାକ୍ ମଧ୍ୟରେ । ଅର୍ଥାତ୍ ଏହା ଶବ୍ଦର ଗତିଠାରୁ ପ୍ରାୟ ୧୩ ରୁ ୧୫ ଗୁଣ ଅଧିକ ବେଗରେ ଗତି କରିପାରେ । ଏହାର ସର୍ବାଧିକ ବେଗ ଘଣ୍ଟା ପ୍ରତି ପ୍ରାୟ ୧୮,୫୦୦ କିଲୋମିଟର । ନିଜର ସର୍ବାଧିକ ଗତି ଯୋଗୁଁ ଏହା ମାତ୍ର ୬ ରୁ ୭ ମିନିଟ୍ ମଧ୍ୟରେ ନିଜ ଲକ୍ଷ୍ୟସ୍ଥଳରେ ପହଞ୍ଚି ଆକ୍ରମଣ କରିପାରେ । ଏହାର ଅପରେସନାଲ ରେଞ୍ଜ ପ୍ରାୟ ୧,୪୦୦ କିଲୋମିଟର, ଯାହା ସମଗ୍ର ମଧ୍ୟପ୍ରାଚ୍ୟରେ ଥିବା ଯେକୌଣସି ଶତ୍ରୁ ଘାଟିକୁ ଧ୍ୱଂସ କରିବା ପାଇଁ ଯଥେଷ୍ଟ । ଏହା ପ୍ରାୟ ୨୦୦ ରୁ ୪୫୦ କିଲୋଗ୍ରାମ ପର୍ଯ୍ୟନ୍ତ ପାରମ୍ପରିକ ଯୁଦ୍ଧାସ୍ତ୍ର ବହନ କରିବାକୁ ସକ୍ଷମ ।
ଏହା ବି ପଢ଼ନ୍ତୁ... Pakistan: PoK ହିଂସାକାଣ୍ଡରୁ ନଜର ହଟାଇବାକୁ ପାକିସ୍ତାନର ନୂଆ ଚାଲ୍, UN ଦ୍ୱାରସ୍ଥ ହେଲେ ଶେହବାଜ
ଫତହ-୨: ମିସାଇଲ ପ୍ରୋଗ୍ରାମର ଆଗାମୀ ପିଢ଼ି
ହାଇପରସୋନିକ ଗ୍ଲାଇଡ୍ ଭେହିକିଲ୍: ସାଧାରଣ ବାଲିଷ୍ଟିକ ମିସାଇଲ ଗୁଡ଼ିକ ଏକ ନିର୍ଦ୍ଦିଷ୍ଟ ରାସ୍ତାରେ ଗତି କରିଥାନ୍ତି, କିନ୍ତୁ ଫତହ-୨ ରେ ଆଧୁନିକ ‘ଗ୍ଲାଇଡ୍ ଭେହିକିଲ୍’ ପ୍ରଯୁକ୍ତିବିଦ୍ୟା ବ୍ୟବହାର କରାଯାଇଛି । ଲଞ୍ଚ ହେବା ପରେ ଏହି ମିସାଇଲ୍ ପୃଥିବୀର ବାୟୁମଣ୍ଡଳ ଭିତରେ ଏବଂ ବାହାରେ କ୍ରମାଗତ ଭାବେ ନିଜର ଦିଶା ବଦଳାଇ ଘୁରି ବୁଲିଥାଏ । ଏହାର ଏହି ଅନିଶ୍ଚିତ ଗତିପଥ ଯୋଗୁଁ କୌଣସି ରାଡାର ସିଷ୍ଟମ ଏହାକୁ ଚିହ୍ନଟ କରିବା ବା ଶତ୍ରୁପକ୍ଷର ଇଣ୍ଟରସେପ୍ଟର ମିସାଇଲ ଏହାକୁ ଆକାଶରେ ଧ୍ୱଂସ କରିବା ପ୍ରାୟ ଅସମ୍ଭବ । ଇରାନ ଅନୁଯାୟୀ, ଏହି ଘାତକ ମିସାଇଲର ମାରକ କ୍ଷମତା ପ୍ରାୟ ୧,୪୦୦ ରୁ ୧,୫୦୦ କିଲୋମିଟର ପର୍ଯ୍ୟନ୍ତ ରହିଛି ।
