ନୂଆଦିଲ୍ଲୀ: ପଶ୍ଚିମ ଏସିଆରେ ଆମେରିକା ଏବଂ ଇସ୍ରାଏଲ ସହିତ ଚାଲିଥିବା ସଂଘର୍ଷ ଆଉ ଉତ୍ତେଜନା ମଧ୍ୟରେ ଇରାନ ଏହାର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ରାଷ୍ଟ୍ରଗତ ଅନ୍ତିମ ସଂସ୍କାର ପାଇଁ ସମ୍ପୂର୍ଣ୍ଣ କାର୍ଯ୍ୟସୂଚୀ ଆନୁଷ୍ଠାନିକ ଭାବରେ ଘୋଷଣା କରିଛି। ପୂର୍ବତନ ସର୍ବୋଚ୍ଚ ନେତା ଅଲି ଖାମେନେଇଙ୍କ ଅନ୍ତିମ ସଂସ୍କାର ଆସନ୍ତା ମାସ ୪ ଜୁଲାଇ ୨୦୨୬ରେ ଆରମ୍ଭ ହେବ ଏବଂ ତାଙ୍କ ଶରୀରକୁ ୯ ଜୁଲାଇ, ୨୦୨୬ ରେ ଉତ୍ତର-ପୂର୍ବ ଇରାନର ମଶାଦ ସହରସ୍ଥିତ ରେଜା ଇମାମ୍ ମସଜିଦରେ କବର ଦିଆଯିବ।
ଆମେରିକା ଏବଂ ଇସ୍ରାଏଲର ମିଳିତ ବିମାନ ଆକ୍ରମଣରେ ତାଙ୍କର ମୃତ୍ୟୁ ହୋଇଥିଲା। ତେବେ ତାଙ୍କ ମୃତ୍ୟୁର ଚାରି ମାସରୁ ଅଧିକ ସମୟ ପରେ ତାଙ୍କର ଅନ୍ତିମ ସଂସ୍କାର ହେବ । ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ମୃତ୍ୟୁ ୨୮ ଫେବୃଆରୀ, ୨୦୨୬ ରେ ହୋଇଥିଲା।
ସମ୍ପୂର୍ଣ୍ଣ ଅନ୍ତିମ ସଂସ୍କାର କାର୍ଯ୍ୟସୂଚୀ କଣ ?
ଇରାନର କମିଟି ଫର ଦ କମେମୋରେସନ ଅଫ୍ ଦ ଏସୋସିଏସନ ଅଫ ଦ ମୁଜାହିଦ୍ ଶହୀଦ ଇମାମ ପକ୍ଷରୁ ଶନିବାର ଅଲି ଖାମେନିଙ୍କ ଅନ୍ତିମ ସଂସ୍କାର ପାଇଁ ସମ୍ପୂର୍ଣ୍ଣ କାର୍ଯ୍ୟସୂଚୀ ପ୍ରକାଶ କରାଯାଇଛି। ଯୋଜନା ଅନୁଯାୟୀ, ରାଜଧାନୀ ତେହେରାନ, କୋମ୍ ଏବଂ ମଶାଦରେ ପାଞ୍ଚ ଦିନିଆ ସମାରୋହ ଅନୁଷ୍ଠିତ ହେବ।
କମିଟି ଦ୍ୱାରା ପ୍ରକାଶିତ କାର୍ଯ୍ୟସୂଚୀ ଅନୁଯାୟୀ ୪ ଏବଂ ୫ ଜୁଲାଇ ୨୦୨୬ ରେ ତେହେରାନର ଖୋମେନେଇ ମୋସାଲ୍ଲାରେ ବିଦାୟକାଳୀନ ସମାରୋହ ଅନୁଷ୍ଠିତ ହେବ। ତା’ପରେ ୬ ଜୁଲାଇରେ ତେହେରାନରେ ଏକ ଶବଦାହ ଶୋଭାଯାତ୍ରା ଅନୁଷ୍ଠିତ ହେବ। ତା’ପରେ ୭ ଜୁଲାଇ, ୨୦୨୬ ରେ ପବିତ୍ର କୋମ ନଗରୀରେ ଏକ ଶବଦାହ ଶୋଭାଯାତ୍ରା ଅନୁଷ୍ଠିତ ହେବ। ଶେଷରେ, ୯ ଜୁଲାଇ, ୨୦୨୬ ରେ ମଶାଦରେ ଏକ ଶବଦାହ ଶୋଭାଯାତ୍ରା ଅନୁଷ୍ଠିତ ହେବ ଏବଂ ଶରୀରକୁ ରେଜା ଇମାମ ମସଜିଦରେ କବର ଦିଆଯିବ।
ଖାମେନେଇଙ୍କ ପରିବାରର ଚାରି ଜଣ ସଦସ୍ୟଙ୍କୁ ମଧ୍ୟ ତାଙ୍କ ସହିତ କବର ଦିଆଯିବ…
ଆମେରିକା-ଇସ୍ରାଏଲ ଆକ୍ରମଣରେ ତାଙ୍କ ସହିତ ମୃତ୍ୟୁବରଣ କରିଥିବା ଖାମେନେଇଙ୍କ ପରିବାରର ଅନ୍ୟ ଚାରି ଜଣ ସଦସ୍ୟଙ୍କୁ ମଧ୍ୟ କବର ଦିଆଯିବ, ଯେଉଁଥିରେ ଡକ୍ଟର ମିସବାହ ଅଲ-ହୁଦା ବାକେରି କାନି, ସୟଦା ବୁଶରା ହୁସେନି ଖାମେନେଇ, ଜାହରା ହଦ୍ଦାଦ ଆଦେଲ ଏବଂ ଜାହରା ମହମ୍ମଦି ଗୋଲପାଏଗାନି ଅନ୍ତର୍ଭୁକ୍ତ ।
